1 Deg umezwar n tgelda n Yahuyaqim, mmis n Yuciya, ajeǧid n Yahuda, yusa-dd wawař-a ɣar Irmiya, inna: 2 “Ammu i d ayi inna SIDI: ‘Egg i yixef nnec iseɣwan d izayřuten, u ssars i-ten x yiri nnec ◘ 3 uca sekk i-ten i ujeǧid n Idum, i ujeǧid n Mu’ab, i ujeǧid n ayt n Ɛammun, i ujeǧid n Ṣur u i ujeǧid n Ṣidun, s ufus n imsexxaren inni dd-yusin ɣar Urcalim ɣar Ṣidqiya, ajeǧid n Yahuda. 4 Umur asen ad inin i isiditen nsen: Ammu i iqqar SIDI n řɛeskarat, AREBBI n Israil, ammu i ittxeṣṣa ad tinim i isiditen nwem: 5 S jjehd inu ameqqran d ufus inu isswiẓẓaden ggiɣ tammurt d bnadem d řebhayem nni iǧan x wudem n temmurt uca Necc ad ten wceɣ i wenni isdaheǧen di tiṭṭawin inu. ◘ 6 Xenni řexxu, Necc ggiɣ marra timmura-ya deg ufus n Nabuxadnaṣṣar, ajeǧid n Babil, amsexxar inu. Wciɣ as uřa d řmař n yeyyar, maḥend ad xas sexxaren. ◘ 7 Marra řegnus ad as sexxaren uřa i mmis d mmis n mmis ařami i dd ɣa yas řḥař i temmurt nnes. Xenni aṭṭas n řegnus d ijeǧiden imeqqranen ad ggen ad zzayes ttwasexxaren. 8 Řgens d tgeldit i war ixs ad as isexxar i Nabuxadnaṣṣar, ajeǧid n Babil, uca war ixs ad issehwa iři nnes swadday i uzayřu n ujeǧid n Babil, aqa Necc ad xeřfeɣ zi řgens nni s ssif d řaẓ d ṭṭaɛun, ammu i iqqar SIDI, ař ten i ɣa qḍiɣ s ufus nnes. 9 Kenniw xenni, war ttesřim i inabiyyen nwem d igezzanen nwem d ayt n bu-tirja nwem d ibezgawen nwem d iseḥḥaren nwem nni ɣarwem issawařen, qqaren: Kenniw war tsexxaram ca i ujeǧid n Babil!, 10 maɣar nitni ttnebban s ixarriqen maḥend ad kenniw ssiggʷejen x temmurt nwem, ařami Necc ad xawen aẓẓřeɣ uca kenniw ad tᵉttwahellkem. 11 Maca řgens nni i ɣa issaḍaren iři nnes swadday i uzayřu n ujeǧid n Babil uca ad as issexxar, aqa řgens nni ad t jjeɣ ad iqqim di temmurt nnes, uca ad tt icarz u ad dayes izdeɣ!’, ammu i iqqar SIDI.”

12 Xenni ssiwřeɣ ɣar Ṣidqiya, ajeǧid n Yahuda, ɛlaḥsab marra awařen-a, nniɣ: “Ggem iřawen nwem swadday i uzayřu n ujeǧid n Babil u sexxarem as u i řgens nnes, xenni ad teqqimem teddarem. 13 Mayemmi ɣa tᵉttwanɣem, cek d řgens nnec, s ssif d řaẓ d ṭṭaɛun, am mammec issiweř SIDI x řgens i war ixsen ad isexxar i ujeǧid n Babil. 14 War ttesřim i wawařen n inabiyyen, inni ɣarwem issawařen, qqaren: ‘Kenniw war tᵉttsexxarem ca i ujeǧid n Babil!’, maɣar nitni ttnebban awem s ixarriqen, ◘ 15 minzi Necc war ten dd-ssekkeɣ, ammu i iqqar SIDI, u nitni ttnebban s ixarriqen s Yisem inu maḥend ad kenniw aẓẓřeɣ u kenniw ad tᵉttwahellkem, kenniw d inabiyyen nni d awem ittnabben,”

16 Ssiwřeɣ uřa ak-d ikehhanen u ak-d marra řgens, nniɣ: “Ammu i iqqar SIDI: ‘War tesřim ɣar wawařen n inabiyyen nwem i iqqaren: Xzar, řeqcuɛ zi Taddart n SIDI ad ttwarren deɣya zi Babil!, maɣar nitni ttnebban i kenniw s ixarriqen. ◘ 17 War ɣarsen ttesřim ca, maca sexxarem i ujeǧid n Babil, xenni ad teqqimem teddarem. Mayemmi ɣa tedweř tendint-a d ict n řxirbet? 18 Mři nitni d inabiyyen, u awař n SIDI iǧa s tidett ɣarsen, ejj i-ten ad ttaren i SIDI n řɛeskarat, aqa řeqcuɛ i iqqimen ɛad di Taddart n SIDI u di taddart n ujeǧid n Yahuda di Urcalim war ttriḥen ɣar Babil. 19 Maɣar ammu i iqqar SIDI n řɛeskarat x ipilaren, x řebḥar n nnḥas, x tkarrutin u x marra řeqcuɛ nneɣni i iqqimen di tendint-a, 20 inni war kides iksi Nabuxadnaṣṣar, ajeǧid n Babil, umi indeh Yakunya, mmis n Yahuyaqim, ajeǧid n Yahuda, zi Urcalim ɣar Babil ak-d marra tarwa n taṣiřet n Yahuda d Urcalim, ◘ 21 wah, ammu i iqqar SIDI n řɛeskarat, AREBBI n Israil, x řeqcuɛ i iqqimen di Taddart n SIDI u di taddart n ujeǧid n Yahuda u di Urcalim: 22 Ɣar Babil ad mmeksin u ad qqimen dinni ař ass i ɣarsen dd ɣa arzfeɣ, ammu i iqqar SIDI. Xenni ad ten ssuffɣeɣ u ad ten dd-arreɣ ɣar wemcan-a.’ ” ◘