17
Ddnub n Yahuda
1 “Ittwaxbec ddenb n Yahuda s pluma n wuzzař, s txeft n ijj n umesmir di teřwiḥt n wuř nsen u deg waccawen n iɛalṭaren nnec.
2 Am mammec ttidaren tarwa nsen, ttidaren nitni uřa d iɛalṭaren nsen d trebbin nsen n cwarti ɣar tcejjura tizizawin x tewririn yuɛřan.
3 Adrar inu deg iyyar d wagřa nnec d marra řeknuz nnec ad ten wceɣ d takeccaḍt, uřa d řegɛudi nnec mani tᵉttwehhbed ddbayeḥ, zi ssibbet n ddnub di marra tammurt nnec.
4 Xenni ad tarxud zi tesɣart nnec nni d ac wciɣ u man aya zi ssibbet n ddnub n yixef nnec. Necc ad cek ggeɣ d ismeɣ n řɛedyan nnec deg ict n temmurt i war tessined ca, maɣar kenniw tarrim ict n tmessi ad tsareɣ weɣḍab inu nni i ɣa iqqimen icemmeḍ i řebda.”
5 “Ammu i iqqar SIDI: ‘Ad ittwanɛeř weryaz nni ittcařen x bnadem uca igga ddat d uɣiř nnes i xef ittɛemmed, u wenni uř nnes iḥeyyed x SIDI.
6 S minzi ad yiři d řɛerɛar di řexřa, wenni war ittacan x minni dd ɣa yas min icnan, d wenni i ɣa iqqimen deg imucan ittwacemḍen s řeḥmu di řexřa, deg ict temmurt tameǧaḥt war izdiɣen.
7 Ad ittwabarek weryaz nni ittcařen x SIDI d wenni iggin SIDI d řaman nnes.
8 Ad yiři am tcejjart i ittwaẓẓun ɣar tiɣezratin n waman, tenni iwtin iẓewran nnes ɣar teɣzart. War tessin ca meřmi dd ɣa yas řehmu u tifray nnes ad qqiment d tiziyzawin. Deg ijj n useggʷas n řaẓaɣ war tᵉttisřiw ca uca war tᵉttbeddi ad teksi řɣiǧet nnes.’ ”
9 “Uř d aɣeddar sennej x kuřci, war izemmar ad iggenfa, wi izemmaren ad t issen?
10 Necc, SIDI, arezzuɣ deg wuř u ttjarrabeɣ tiẓẓař, ḥima ad xeǧṣeɣ kuř ijj ɛlaḥsab tibridin nnes, ɛlaḥsab řɣiǧet n tmegga nnes.
11 Am ict n tsekkurt i issguṭṭyen x tmeǧařin nni war dd-turuw, ammu i iǧa wenni iggin agřa, maca war iǧi s řḥeqq. Di řwesṭ n wussan nnes ittxeṣṣa ad daysen ismeḥ u ɣar uneggaru nnes ad idweř d abuhaři.”
12 “Ijj n řɛarc igdaren s uɛuǧi, yuɛřan aṭṭas zeg umezwaru, ammu i yeǧa amcan n Zzawect nneɣ Iqeddsen.
13 Cek d Řayas n Israil, a SIDI, marra inni xak iḥeyyden, ad nfeḍḥen. Inni xafi iḥeyyden, ad twarin ismawen nsen deg ucař, maɣar nitni semḥen di SIDI, řɛunṣar n waman iddaren.
14 Sgenfa ayi, SIDI, xenni ad ggenfiɣ, senjem ayi, xenni ad ttwassnejmeɣ, maɣar Cek d izři n uṣebbeḥ inu.
15 Xzar, nitni qqaren ayi: ‘Mani iǧa wawař n SIDI? Ejj i-t ad dd-ixecc!’
16 Necc ɛemmarṣ war ḥṣareɣ ixef inu maḥend ad iřiɣ d ameksaw awarni ac, war meẓriɣ ɣar wass n arẓiyyet. Cek tessned t: min i d ayi dd-yusin x iyencicen inu, iffeɣ-dd zzat i tiṭṭawin nnec.
17 War d ayi snexřiɛ ca, Cek d adurri inu deg wass n řɣar.
18 Ejj inni d ayi iḍaffaren ad nfeḍḥen, maca war d ayi ttejji ad nfeḍḥeɣ, ejj i-ten ad nxeřɛen, maca war d ayi ttejji ad nxeřɛeɣ. Siweḍ-dd xasen ass n řɣar uca arẓ i-ten s ict n tareẓẓit s weḍfas.”
19 “Ammu i ɣari dd-issiweř SIDI: ‘Uyur uca bedd di tewwart n iḥenjiren n řgens, tawwurt i zi ttadfen ijeǧiden n Yahuda u i zi dd-tteffɣen nitnu, u egg ammu uřa di marra tiwwura n tendint Urcalim
20 uca ini asen: Sřem i wawař n SIDI, kenniw ijeǧiden n Yahuda d marra Yahuda d marra imezdaɣ n Urcalim inni ittadfen zi tewwura-ya.’
21 Ammu i iqqar SIDI: ‘Ḥḍam x ixef nwem ad tarbum řeḥmeř deg wass n ssebt u ad t tessidfem zi tewwura n Urcalim!
22 Deg wass n ssebt war tessuffuɣem ca uřa d ijj n řeḥmeř zi tudrin nwem u war tᵉtteggem uřa d ict n řxedmet. Kenniw ad tessqeddsem ass n ssebt am mammec weṣṣiɣ babatwem.’
23 Maca nitni war sřin ca u war d ayi wcin amezzuɣ nsen, nitni maca ɣennan ayi, maḥend war sřin u war ksin aweddeb.”
24 “Mařa tesřim-dd ɣari mliḥ, ammu i iqqar SIDI, ad yiři řami war tessidfem řeḥmeř zi tewwura n tendint-a u řami i ɣa tessqeddsem ass n ssebt, war dayes tᵉtteggem uřa d ict n řxedmet,
25 xenni ad adfen ijeǧiden d řḥukkam nni iqqimen x řɛarc n Dawud zi tewwura n tendint-a, am neddhen ikarruten d iysan, nitni d řḥukkam nsen, iryazen n Yahuda d imezdaɣ n Urcalim. Xenni tandint-a ad dayes qqimen zeddɣen imezdaɣ nnes i řebda.
26 Nitni ad dd-asen zi tneddam n Yahuda u zi jjwayeh i dd-innḍen i Urcalim, u zi temmurt n Binyamin, u zi Temmurt Iwaṭan, zi Temmurt n Idurar u zi Ljanub, nitni ad awyen taɣarṣt n wecmaḍ d ṣṣedqet n tɣarṣt d tewhibt n řɣiǧet d jjawi uca ad awyen tawhibt n uqadi di Taddart n SIDI.
27 Maca mařa kenniw war ɣari tᵉttesřim ḥima ad tessqeddsem ass n ssebt u ḥima ad tadfem zi tewwura n Urcalim s ijj n řeḥmeř deg wass n ssebt, xenni Necc ad ssarɣeɣ ict n tmessi di tewwura nnes nni i ɣa iccen řeqṣur n Urcalim u war ggur ɛemmarṣ ad texsi.”