18
Irmiya di taddart n uqeddar
1 Awař nni dd-yusin zi SIDI ɣar Irmiya, inna:
2 “Kkar, hwa ɣar taddart n bu-třaxt. Dinni i ɣa jjeɣ awařen inu ad ttwasřen.”
3 Xenni hwiɣ ɣar taddart n bu-třaxt, uca xzar, ufiɣ t ixeddem ict n řqecɛet x iẓra ittennḍen.
4 Mařa ixsar uɣarraf nni tuɣa ittegg zi třaxt nni iǧan deg ufus n bu-třaxt, Netta igga zzayes ɛawed ijj n uɣarraf nneɣni, am mammec d as ittɣiř d lemliḥ i bu-třaxt maḥend ad t igg.
5 Xenni yusa-dd ɣari wawař n SIDI, inna:
6 “Ma war zemmareɣ Necc ad ggeɣ akidwem am bu-třaxt wanita, a taddart n Israil, ammu i iqqar SIDI. Xzar, am třaxt deg ufus n bu-třaxt, ammu i teǧam deg ufus inu, a taddart n Israil!
7 Ict n twařa ad ssiwřeɣ x ijj n řgens u x ict n tgeldit aqa ad t qeřɛeɣ, ad t hedmeɣ u ad t teḥḥiɣ,
8 maca mařa řgens nni ad dd-idweř zi tuɛeffna nnes i x ssiwřeɣ akidsen, xenni ad nedmeɣ zi řɣar i tuɣa nwiɣ ad as t ggeɣ.
9 Ict n twařa nneɣni ad ssiwřeɣ x ijj n řgens u x ict n tgeldit belli ad t ssbeddeɣ u ad t ẓẓuɣ,
10 maca mařa ad yegg min iǧan d aɛeffan di tiṭṭawin inu umi war ttesřin ɣar tmijja inu, xenni ad nedmeɣ x min icnan i nniɣ ad kidsen t ggeɣ.
11 Xenni řexxu, siweř ak-d iryazen n Yahuda u ak-d imezdaɣ n Urcalim, ini: ‘Ammu i iqqar SIDI: Xzar, Necc sswejdeɣ ijj n řɣar ḍidd nwem u Necc ttxarraṣeɣ deg ijj n wenway xawem. Dewřem-dd xenni, kuř ijj zeg webrid nnes aɛeffan, u ɛedřem ibriden nwem d tmegga nwem.’
12 Maca nitni qqaren: ‘Řayas walu! Neccin ad neḍfar inwayen n yixef nneɣ uca ad negg kuř ijj ɛlaḥsab řeqsaḥet n wuř nnes!’ ”
13 “S uya, ammu i iqqar SIDI: ‘Seqsam řegnus, man wen isřin ɛemmarṣ am wa? Taɛzarect Israil tegga ijj n nnɛi d ameqqran.
14 Ma ad iḥeyyed ɛemmarṣ wedfeř n Lubnan zeg ict n teṣḍart deg iyyar? Ma ad aẓɣen ɛemmarṣ waman ittbuqbuqen, isemmaḍen ittazzřen?
15 Maca waxxa amenni ittu ayi řgens inu. Nitni ttawyen tiwhibin n řebxur i l’aṣnam ibeṭṭřen inni ten ijjin ad nnqarḍen deg ibriden nsen, di jjurat n wecḥař uya, maḥend ad uyuren deg izubaq n ijj n webrid war iwiṭin,
16 maḥend ad arren tammurt nsen d ict n řqecɛet n unexřiɛ d tseḍḥact i řebda. Qaɛ wenni ssenni i ɣa ikken, ad innexřeɛ, ad ihezz azeǧif nnes.
17 Am usemmiḍ n manis i dd-tneqqar tfuct ad ten zuzzareɣ zzat i řeɛdu. Necc ad asen ssecneɣ aɛrur, war iǧi udem inu, deg wass n uhellek nsen.’ ”
18 “Nitni maca nnan: ‘Asem-dd, jjem aneɣ ad negg tameɛmuč x Irmiya, maɣar Ccariɛa ɛemmarṣ ad iqḍa ɣar ukehhan, ccwar ɣar umiɣis u awař ɣar unabi. Asem-dd, ejj aneɣ ad t newwet s wawařen n yiřes nneɣ uca ejj aneɣ war nettic taynit i uřa d ijj zeg wawařen i iqqar.’ ”
Irmiya di řeḥṣaret
19 “Ḥḍa ayi, a SIDI, u seř-dd ɣar tmijja n yinni akidi ittmenɣan.
20 Ma xenni ad ittwaxřef min iṣebḥen s min war iḥřin? Maɣar nitni ɣzin ayi ict n tenḍeč! Idar mammec beddeɣ zzatek ḥima ad ssiwřeɣ di řxir nsen, ḥima ad xasen ḥeyydeɣ asɛar nnec.
21 S uya, ewc iḥenjiren nsen i řaẓ uca sellem i-ten i tzemmar n ssif uca ejj timɣarin nsen ad asent acaren iḥenjiren, ad dewřent d tijjař, ejj iryazen nsent ad ttwanɣen u iḥuḍriyyen nsent ad mmten s ssif deg umenɣi.
22 Ejj ad tᵉttwaseř tɣuyyit zi tudrin nsen, mařa Cek deɣya tɣeḍred-dd xasen ict n bandiyya umi ɣzin ict n tenḍeč ḥima ad ayi ṭṭfen, u ssarsen řefxux innuffaren i iḍaren inu.
23 A SIDI, Cek tessned marra anway nsen maḥend ad ayi nɣen. War sduriy řmuɛṣiyyet nsen u war meḥḥi ddnub nsen zzat i wudem nnec, maca ejj i-ten ad wḍan zzatek. Egg asen ammu di řweqt n weɣḍab nnec.”