16
SIDI issawař ak-d Irmiya
1 Yusa-dd ɣari wawař n SIDI, inna:
2 “War ttawi tamɣart i yixef nnec u war ɣarek ttiřin iḥenjiren d tḥenjirin deg wemcan-a,
3 maɣar ammu i iqqar SIDI x iḥenjiren d tḥenjirin i dd ɣa ittwurwen deg wemcan-a u x yemmatsen i ten dd-yurwen u x babatsen i ten dd-ijjin di temmurt-a:
4 ‘Nitni ad mmten s ibriden iwɛaren aṭṭas, war xasen ceṭṭen u war ten neṭṭřen, nitni ad dewřen d řeɣbar i wudem n temmurt uca ad ttwaɣezzen s ssif d řaẓ, u řxecbat nsen ad dewřent d macca i ijḍaḍ n ujenna u i řewḥuc n řexřa.’ ”
5 “Maɣar ammu i iqqar SIDI: ‘War ttadef ɣar ict n taddart n wecḍan u war ccat agejdur, war areḥḥem, maɣar Necc kkseɣ řehna inu x řgens-a, tamexsiwt inu icewwaren d arreḥmet, ammu i iqqar SIDI.’
6 Imeqqranen d imeẓyanen ad mmten di temmurt-a. War ten neṭṭřen, war xasen ccaten agejdur, war xebbcen ixef nsen niɣ ad ssquccaren ixef nsen di ṭṭweɛ nsen.
7 War d asen ittwarẓ weɣrum zi ssibbet n wecḍan ḥima ad ɛezzan ca n yijjen x ijj n umetti, u war d asen tticen ad swen zeg uɣarraf n uɛezzi x babas niɣ yemmas.
8 War ttadef ɣar taddart mani tteggen zzardet maḥend ad teqqimed ɣarsen i macca d tsessit.
9 Maɣar ammu i iqqar SIDI n řɛeskarat, AREBBI n Israil: Xzar, Necc ad ssbeddeɣ zzat i tiṭṭawin nwem deg wemcan-a tmijja n warcaq d tmijja n řefraḥet, tmijja n muřay d tmijja n tesřit.”
10 “Xmi ɣa tbarrḥed marra awařen-a i řgens-a uca nitni ad sseqsan: ‘Mayemmi iqqar SIDI marra řɣar-a ameqqran xaneɣ u min iǧan d ljarima nneɣ u min iǧan d ddenb nneɣ i negga neccin ak-d SIDI, AREBBI nneɣ?’,
11 xenni ad asen tinid: ‘Maɣar řejdud nwem semḥen dayi, ammu i iqqar SIDI, uca uyuren awarni i irebbiten nneɣni uca ɛebden u sejden asen, maca semḥen dayi u war ḥḍin Ccariɛa inu.
12 U kenniw simant nwem teggim mahu x řejdud nwem, minzi xzar, kuř ijj zzaywem iḍaffar řeqsaḥet n wuř nnes aɛeffan, ařami kenniw war dd ɣari tesřim qaɛ.
13 S uyenni ad kenniw ḥejjareɣ ɣar barra zi temmurt-a ɣar ict n temmurt i war tessinem kenniw uřa d řejdud nwem, uca dinni i ɣa tɛebdem irebbiten nneɣni, ass d ǧiřet, minzi Necc war ɣarwem dd-ttarzifeɣ ɛad s ca n řxaḍar.’ ”
14 “S uya, xzar, ad dd-asen wussan, ammu i iqqar SIDI, nni di war qqaren ɛad: ‘S tidett am iddar SIDI i dd issuffɣen ayt n Israil zi Miṣra!’
15 maca: ‘S tidett am iddar SIDI wenni dd-issuffɣen ayt n Israil zi temmurt n ccamal u zi marra timmura mani xasen yuẓẓeř!’ Minzi Necc ad ten arreɣ ɣar temmurt nni wciɣ i řejdud nsen.
16 Xzar, Necc ad ssekkeɣ aṭṭas n ineymaren n iseřman, ammu i iqqar SIDI, inni ten i ɣa ymaren, u xenni ad ssekkeɣ aṭṭas n ineymaren nni xasen i ɣa yaẓẓřen zi mkuř adrar u zi mkuř tawrirt u zeg ifeǧiqen jar řejruf.
17 Maɣar tiṭṭawin inu ttwařant marra ibriden nsen, nitni war zemmaren ad zzayi nnuffaren uca řmuɛṣiyyet nsen war tzemmar ad tennuffar zzat i tiṭṭawin inu.
18 Amezwar ad xeřfeɣ s uḍeffus marra řmuɛṣiyyet nsen d marra ddnub nsen, minzi nitni ssɛiǧten tammurt inu. Nitni ccuren tasɣart inu s řxecbat n nnɛawat n l’aṣnam nsen u s jjɛayef nsen.”
19 “A SIDI, Cek d Jjehd inu d Lburj inu d amcan inu n tarewřa deg wass n řeḥṣaret. Ad ɣarek dd-asen řegnus zeg ineggura n ddunect, ad inin: ‘Tasɣart nni ṭṭfen řejdud nneɣ, dayes mɣir acmat d aɛbed n l’aṣnam ibeṭṭiřen, timesřayin i war ineffɛen.’
20 Ma izemmar bnadem ad igg irebbiten i yixef nnes? Nitni war ǧin d irebbiten.
21 S uya, xzar, twařa-ya Necc ad ten arreɣ ad cehden, ad ten arreɣ ad ssnen afus inu d jjehd inu, uca xenni ad ssnen belli Isem inu ‘SIDI’.”