5
Asgenfi n ijj n umehřuc di Bayt-Xisda
1 Awarni man aya yiweḍ-dd Řɛid n Wudayen uca igeɛɛed Yasuɛ ɣar Urcalim.
2 Ɣar Tewwart n Wuǧi di Urcalim tuɣa din ict n tyeřmamt n useɣḍeṣ umi qqaren s Tɛibranit ‘Bayt-Xisda’, tuɣa ɣares xemsa n iseqqifen ak-d ikulwaren d ipilaren.
3 Daysen tuɣa iqqim ijj n řɣaci d ameqqran n imehřac d idarɣařen d iqejdaḥen d ineɛḍaben, ttrajan anhezzi n waman.
4 Minzi zi řweqt ɣar řweqt ihekkwa-dd ijj n lmalak ɣar tyeřmamt-a n useɣḍeṣ, issenhezza aman, u wenni i dd ɣa ihwan d amezwaru awarni anhezzi n waman, ad ittwassgenfa, mammec ma iǧa řehřac nnes.
5 Tuɣa din ijj n bnadem dayes řehřac i yijj n řmijař n tmenya u-třatin n iseggʷusa.
6 Iẓra Yasuɛ aryaz-a isenned dinni, issen belli tuɣa iḥřec ammu aṭṭas zeg wami. Inna as: “Ma texsed ad teggenfid?”
7 Yarra-dd xas umehřuc, inna: “Wah, a Sidi, maca war ɣari ijjen wenni d ayi ɣa yiwyen ɣar tuyeřmamt n useɣḍeṣ xmi ɣa ttwassenhezzen waman. Xmi ttraḥeɣ necc, ihekkwa-dd wenneɣni zzati.”
8 Yasuɛ inna as: “Kkar, teksid tassut nnec, tuyured!”
9 Deɣya iggenfa bnadem nni uca iksi tassut nnes, yuyur. Man aya tuɣa deg wass n ssebt.
10 Nnan Wudayen i wenni tuɣa ittwassgenfan: “Wa d ssebt, war ɣarek bu ttesriḥ maḥend ad teksid tassut nnec!”
11 Yarra-dd, inna asen: “Wenni d ayi issgenfan, inna: ‘Ksi tassut nnec, traḥed!’ ”
12 Xenni sseqsan t: “Min iɛna Bnadem-a i d ac innan: ‘Ksi tassut nnec, traḥed’?”
13 Wenni ittwassgenfan war issin min iɛna Yasuɛ, minzi innejra minzi aqa din aṭṭas n řɣaci deg wemcan nni.
14 Awarni man aya yufa i-t Yasuɛ di Zzawect Tameqqrant, inna as: “Xzar, aqa teggenfid, war ttegg bu ddnub ɛad, ḥima war d ac ittemsar min iǧan d aɛeffan zi min iǧan qbeř.”
15 Aryaz iruḥ, ixebbar Udayen belli d Yasuɛ i-t issgenfan.
16 S uyenni darrcen Wudayen x Yasuɛ, arezzun ad t nɣen, minzi igga man aya di ssebt.
17 Maca Yasuɛ yarra-dd, inna asen: “Aqa Baba ixeddem ař yiḍa u xenni Necc ɛawed aqa xeddmeɣ.”
18 Di ssibbet-a arezzun Wudayen ɛad ktar ḥima ad t nɣen, war iǧi waha minzi ixařef ssebt, maca uřa minzi Netta inna aqa AREBBI d Babas, issqudda Ixef nnes ak-d AREBBI.
19 Yarra-dd Yasuɛ, inna asen: “S tidett, s tidett, Necc ad awem iniɣ, Mmis war izemmar ad igg uřa d ict n tmesřact s Yixef nnes, mɣir mařa iẓra Babas ittegg i-tt. Min ma ittegg Babas uřa d Mmis ittegg amenni.
20 Babas ittexs Mmis, isscen as marra min ittegg, uca ad as isscen řexdayem timeqqranin x tina, ḥima ad tdehcem.
21 Am mammec d issnekkar Babas imettinen uca ittic tudart, amenni uřa d Mmis ittic tudart i wenni ixs.
22 Babas war ittḥasab uřa d ijj, maca iwca lḥisab marra i Mmis
23 ḥima ad weqqaren marra Mmis am ttweqqaren Babas. Wenni war ittweqqaren Mmis war ittweqqar ca uřa d Baba wenni i-t-i-dd-issekken.
24 S tidett, s tidett, Necc ad awem iniɣ: Wenni ittesřan i wawař inu uca yumen deg wenni d ayi dd-issekken, ɣares Tudart ittduman, war dd-ittis ca ɣar lḥisab, maca netta aqa immuṭṭi zi řmewt ɣar Tudart.
25 S tidett, s tidett, Necc ad awem iniɣ: Ad dd-tas tsaɛɛet, aqa-tt řexxu, i di imettinen ad sřen tmijja n Mmis n AREBBI u inni i tt ɣa isřen, ad ddaren.
26 Maɣar am mammec Babas ɣares Tudart di ṭṭbiɛet n Yixef nnes, ammu i iwca uřa i Mmis ḥima ad ɣares tiři Tudart di ṭṭbiɛet n Yixef nnes,
27 uca iwca as ṣṣulṭa ḥima ad iḥaseb, minzi Netta d Mmis n bnadem.
28 War ttɛejibem ca s man aya, aqa ad dd-tas tsaɛɛet i di marra inni iǧan deg imeḍřan ad sřen tmijja nnes,
29 uca ad dd-ffɣen zeg imeḍřan: inni iggin taṣebḥant ad kkaren ad raḥen ɣar tnukra i tudart, u inni iggin tuɛeffna ad kkaren, ad raḥen ɣar tnukra i lḥisab.
30 Necc war zemmareɣ ad ggeɣ ca zeg Ixef inu, maca am mammec ttesřiɣ, ad ḥasbeɣ u lḥisab inu d řḥeqq, minzi Necc war arezzuɣ min xseɣ, maca min ixs Wenni d ayi dd-issekken.
31 Meɛlik cehhdeɣ i ixef inu, iři aqa cchadet inu war teǧi ca nican.
32 Aqa din Ijjen nneɣni wi xafi icehhden, u Necc ssneɣ belli cchadet i xafi icehhed, aqa d tidett i teǧa.
33 Kenniw tessekkem-dd ca n ireqqasen ɣar Yuḥanna uca netta iched i tidett.
34 Maca Necc war qebbřeɣ ca cchadet n bnadem, maca Necc qqareɣ marra man aya ḥima ad teddarem.
35 Tuɣa Netta d řefnar yareqqen, ittlillicen, u kenniw texsem ad tfarḥem s tfawt nnes ɣar ict n tsaɛɛet.
36 Maca Necc ɣari ict n cchadet d tameqqrant x tenni n Yuḥanna, minzi řexdayem i d ayi iwca Baba, ḥima ad tent kemmřeɣ, řexdayem nni i tteggeɣ cehhdent simant nsent aqa d Baba d Netta i d ayi dd-issekken.
37 Baba, wenni d ayi-dd issekken, d Netta i xafi icehhden. Kenniw ɛemmarṣ war tesřim tmijja nnes uca war teẓrim ca udem nnes,
38 uca awař nnes war daywem ittɣimi ca řebda, minzi kenniw war tᵉttimnen ca deg wenni i-t-i-dd-issekken.
39 Arzum di Tira Iqeddsen, minzi ittɣiř awem aqa daysent Tudart ittduman, u aqa atent d inni i xafi icehhden.
40 Waxxa amenni kenniw war tᵉttexsem ad ɣari dd-tasem ḥima ad ɣarwem tiři Tudart ittduman.
41 War qebbřeɣ ca aɛuǧi n iwdan,
42 maca ssneɣ kenniw, aqa kenniw war ɣarwem bu tayri n AREBBI deg ixef nwem.
43 Necc usiɣ-dd s Yisem n Baba, kenniw war d ayi tqebbřem ca. Mařa yusa-dd ca n yijjen s yisem nnes, ad t tqebřem.
44 Mammec tzemmarem ad tamnem, mařa kenniw tᵉttexsem aɛuǧi n wayawya, maca war tarezzum ca x uɛuǧi n uyenni n AREBBI d Ijjen?
45 Ma ittɣiř awem ad zzaywem cetciɣ ɣar Baba? Wenni zzaywem i ɣa icetcan d Musa x wenni tessrusam asitem nwem.
46 Minzi meɛlik tumnem zi Musa, iři tumnem dayi ɛawed, minzi netta yura xafi.
47 Mařa kenniw war tuminem ca deg Idlisen nnes, mammec ɣa teggem ad tamnem deg wawařen inu?”