6
Lmuɛjiza n usecci n xemsa ařaf
1 Awarni man aya iruḥ Yasuɛ ɣar ujemmaḍ n řebḥar n Ljalil, wenni umi qqaren ɛawed řebḥar n Tibiriyas.
2 Iḍfar i-t-i-dd ijj n řɣaci d ameqqran, minzi ẓrin řeɛřamat i igga i imehřac.
3 Řexdenni igeɛɛed Yasuɛ ɣar wedrar uca iqqim dinni ak-d imeḥḍaren nnes.
4 Iqarreb-dd Řɛid n Tɣarṣt n Useɛdu n Wudayen.
5 Řexdenni issgeɛɛed Yasuɛ tiṭṭawin nnes uca, umi iẓra ijj n řɣaci d ameqqran yusa-dd ɣares, inna i Filippus: “Manis i ɣa nseɣ aɣrum, ḥima ad ccen ina?”
6 Inna ammu ḥima ad t ijarreb, minzi Netta issen min ɣa yegg.
7 Yarra-dd xas Filippus: “Aɣrum s mitayen dinar war ten ittqeddi, ɛad mařa kuř ijjen zzaysen ad iksi mɣir drus waha.”
8 Ijjen zeg imeḥḍaren nnes, netta d Andrawus, umas n Cimɛun Buṭrus, inna as:
9 “Aqa da ijj n uḥenjir ɣares xemsa n tecnifin n imendi d tnayen n iseřman, maca man aya war ittqeddi i marra ina!”
10 Yasuɛ inna asen: “Sɣimem iwdan.” Tuɣa din aṭṭas n arbiɛ deg wemcan nni. S uyenni qqimen yeryazen, aqa aten di xemsa-ařaf idsen.
11 Yasuɛ iksi ticnifin, u awarni řami ibarek i tent, ibḍa i-tent x yinni din iqqimen. Ibḍa Netta amenni ɛawed iseřman, ɛlaḥsab anect ixsen ad ccen.
12 Řami jjiwnen, inna i imeḥḍaren nnes: “Yrumem iřeqqwaz iceṭṭen, ḥima uřa d ict n řḥajjet war tᵉttḍeyyiɛ!”
13 Yrun ten uca ɛemmaren tenɛac n tsuǧatin s iřeqqwaz nni iceṭṭen ɣar yinni iccin zi xemsa n tecnifin n imendi.
14 Řami ẓrin iwdan řeɛřamet i igga Yasuɛ, nnan: “Wa d tidett d Anabi i igguren ad dd-yas ɣar ddunect.”
15 Umi issen Yasuɛ, belli ad dd-asen nitni, ad t ṭṭfen ḥima ad t ggen d ajeǧid, xenni innejra ɣar wedrar, ḥaca Netta weḥḥdes.
Yasuɛ iggur x waman n řebḥar
16 Řami dd-tewḍa tmeddit, hwan-dd imeḥḍaren nnes ɣar řebḥar,
17 u awarni řami nyin di tɣarrabut, qeḍɛen řebḥar ɣar Kafarnaḥum. Tqarreb-dd taǧest u Yasuɛ tuɣa ɛad war ɣarsen dd-yusi.
18 Řebḥar innehweř xasen, minzi asemmiḍ tuɣa ittsuḍ aṭṭas.
19 Ařami tuɣa qeddfen řqedd n ɛřaḥař xemsa u-ɛicrin ař třatin ‘istadiyyen’, ɛřaḥař xemsa kilumitr, ẓrin Yasuɛ iggur x řebḥar, ittqarrab-dd ɣar tɣarrabut nsen, uca ggʷeden.
20 Maca Netta inna asen: “Aqa d NECC, war tteggʷedem ca.”
21 Nitni xsen ad t ssqebřen di tɣarrabut, uca xenni tiweḍ-dd tɣarrabut deɣya ɣar řbarr i ɣar iǧa ttraḥen.
22 Tiwecca nnes iẓra řɣaci nni ibedd x ujemmaḍ n řebḥar, belli war din tuɣi uřa d ict n tɣarrabut nneɣnit mɣir icten, tenni mani dayes udfen imeḥḍaren nnes, u Yasuɛ war yudif ca di tɣarrabut ak-d imeḥḍaren nnes.
23 Maca usint-i-dd iɣarruba nneɣni zi Tibiriyas zzat i wemcan mani ccin aɣrum nni ibarek Yasuɛ.
24 Řami iẓra řɣaci belli Yasuɛ war din iǧi ɛad uřa d imeḥḍaren nnes, nyin uřa d nitni deg iɣarruba-ya uca usin-dd ɣar Kafarnaḥum, arezzun x Yasuɛ.
Yasuɛ Netta d Aɣrum Iddaren
25 Řami t ufin x ujemmaḍ n řebḥar, nnan as: “A Amseřmad nneɣ, meřmi dd-tusid da?”
26 Yasuɛ yarra-dd xasen, inna: “S tidett, s tidett, Necc ad awem iniɣ: Kenniw tarezzum xafi, war iǧi umi teẓrim řeɛřamat, maca umi teccim aɣrum uca tejjiwnem.
27 War ttxedmem i macca ixessaren, maca i macca ittɣiman i Tudart ittduman, tenni d awem i ɣa iwc Mmis n bnadem, minzi AREBBI, Babas, issars ṭṭabeɛ nnes xas.”
28 Nnan as: “Min ɣa negg, ḥima ad negg řexdayem n AREBBI?”
29 Yarra-dd Yasuɛ, inna asen: “Ta d řxedmet n AREBBI, aqa ad tamnem deg Wenni dd-issekk Netta.”
30 Xas uca nnan as: “Man řeɛřamet i ɣa tegged xenni ḥima ad t nẓar uca ad zzayek namen? Man řxedmet i ɣa tegged?
31 Řejdud nneɣ ccin ‘manna’ di řexřa am mammec tura: ‘Netta iwca asen-dd aɣrum zeg ujenna, ḥima ad t ccen’.”
32 Inna asen Yasuɛ: “S tidett, s tidett, Necc ad awem iniɣ: War iǧi d Musa i d awem iwcin aɣrum zeg ujenna, maca Baba ittic awem Aɣrum n tidett zeg ujenna.
33 Minzi Aɣrum n AREBBI d Netta wenni dd-ihwan zeg ujenna uca ittic Tudart i ddunect.”
34 Nnan as: “A Siditneɣ, ewc aneɣ-dd řebda aɣrum-a.”
35 Yasuɛ inna asen: “NECC d Aɣrum Iddaren. Wenni ɣari dd ɣa yasen, war ittřiẓ ɛemmarṣ, u wenni dayi i ɣa yamnen, war ittfidi ɛad ɛemmarṣ.
36 Maca Necc nniɣ awem, waxxa kenniw teẓrim ayi, war tuminem ca.
37 Kuř ijj i d ayi ɣa iwc Baba, ad ɣari dd-yas u wenni ɣari dd ɣa yasen, war t ssuffuɣeɣ ca ɣar barra.
38 Minzi Necc hwiɣ-dd zeg ujenna, war iǧi ca ḥima ad ggeɣ min xseɣ Necc, maca ḥima ad ggeɣ min ixs wenni d ayi dd-issekken.
39 D man aya min ixs Wenni d ayi dd-issekken, aqa Necc war ssweddareɣ uřa d ijjen zeg yinni d ayi iwca, maca ad t-i-dd-ssnekkareɣ deg wass aneggaru.
40 D man aya min ixs Baba wenni d ayi dd-issekken, aqa kuř ijj wenni i ɣa iẓaren Mmis uca ad dayes yamen, ad ɣares tiři Tudart ittduman, uca Necc ad t-i-dd-ssnekkareɣ deg wass aneggaru.”
41 Udayen cetcan zzayes, minzi inna: “Necc d Aɣrum i dd-ihwan zeg ujenna.”
42 Nnan: “Ma d wanita war iǧi bu d Yasuɛ, mmis n Yusuf? Neccin nessen babas d yemmas! Mammec i ɣa yini Weryaz-a: ‘Necc hwiɣ-dd zeg ujenna?’ ”
43 Yasuɛ yarra-dd xasen, inna: “War ttcetcam ca jar awem.
44 War izemmar uřa d ijj ad ɣari dd-yas, mɣir mařa ijebd i-t-i-dd Baba wenni d ayi dd-issekken uca Necc ad t-i-dd-ssnekkareɣ deg wass aneggaru.
45 Aqa tura deg idlisen n inabiyyen: ‘Nitni marra ad ttwassřemden zi AREBBI!’ S uyenni kuř ijj wenni d as isřin zi Baba u iřmed i-t zzayes, ad ɣari dd-yas.
46 Uřa d ijj war izemmar ad iẓar Baba, mɣir wenni iǧan zi AREBBI, d Netta i ittwařin Baba.
47 S tidett, s tidett, Necc ad awem iniɣ: Wenni dayi ittamnen, ad ɣares tiři Tudart ittduman.
48 NECC d Aɣrum Iddaren.
49 Řejdud nwem ccin ‘manna’ di řexřa uca mmuten,
50 maca man aya d Aɣrum i dd-ihwan zeg ujenna, ḥima bnadem ad zzayes yecc, war ittmetti ca:
51 NECC d Aɣrum Iddaren i dd-ihwan zeg ujenna. Mařa ijjen icca zeg Weɣrum-a, ad iddar i řebda. Aɣrum nni i ɣa wceɣ Necc, netta d Arrimet inu i ɣa wceɣ i Tudart n ddunect.”
52 Udayen mmenɣen jar asen, nnan: “Mammec i ɣa yegg Wanita ad aneɣ iwc Arrimet nnes ḥima ad tt necc?”
53 Inna asen Yasuɛ: “S tidett, s tidett, Necc ad awem iniɣ: Mařa war tᵉttᵉttem Arrimet n Mmis n bnadem u war tessesem Idammen nnes, war ɣarwem bu Tudart deg ixef nwem.
54 Wenni i ɣa iccen Arrimet inu uca ad isuw Idammen inu, ad ɣares tiři Tudart ittduman u Necc ad t-i-dd-ssnekkareɣ deg wass aneggaru.
55 Minzi Arrimet inu d macca d tidett uca Idammen inu d tissit d tidett.
56 Wenni i ɣa iccen Arrimet inu uca ad isu Idammen inu, ad dayi iqqim u Necc dayes.
57 Am mammec d ayi dd-issekk Baba iddaren uca Necc ddareɣ zi Baba, ammu ɛawed wenni zzayi i ɣa iccen, ad zzayi iddar.
58 Wa d Aɣrum i dd-ihwan zeg ujenna. War iǧi ca am mammec ccin řejdud nwem ‘manna’ uca mmuten, wenni i ɣa iccen Aɣrum-a, ad iddar i řebda.”
59 Inna man aya di temzida, am tuɣa isseřmad di Kafarnaḥum.
Aṭṭas n imeḥḍaren bdan tteggʷejjen x Yasuɛ
60 Aṭṭas n imeḥḍaren nnes, umi sřin man aya, nnan: “Awař-a iqseḥ. Wi izemmaren ad as iseř?”
61 Maca Yasuɛ issen deg Ixef nnes, aqa imeḥḍaren nnes cetcan x man aya, uca inna asen: “Ma ad tenqarḍem di man aya?
62 I mammec mařa teẓrim Mmis n bnadem ittgeɛɛad ɣar mani iřa iǧa qbeř?
63 Arruḥ d Netta isseddaren, arrimet war tneffeɛ i walu. Awařen i d awem nniɣ, aqa aten d Arruḥ d Tudart.
64 Maca aqa din ca jar awem inni war yuminen.” Minzi Yasuɛ issen zeg umezwaru man yen iǧan inni war yuminen u man wen t i ɣa iɣdaren.
65 Inna asen: “S uyenni nniɣ awem: War izemmar uřa d ijj ad ɣari dd-yas, mɣir mařa temmewc as zi Baba.”
66 Zi řweqt nni dewřen aṭṭas zeg imeḥḍaren nnes ɣar ḍeffar, war qqimen ca gguren akides.
67 Inna Yasuɛ i tenɛac: “Ma uřa d kenniw texsem ad tuyurem?”
68 Cimɛun Buṭrus yarra-dd xas, inna: “A Sidi, wi ɣar i ɣa nraḥ? Cek ɣarek awařen n Tudart ittduman,
69 u neccin numen u nessen aqa Cek d Lmasiḥ, Mmis n AREBBI Iddaren.”
70 Yasuɛ inna asen: “Ma war iǧi d Necc i kenniw dd-ixḍaren d tenɛac? Uca ijjen zzaywem d cciṭan.”
71 Inna man aya x Yahuda, mmis n Cimɛun Isxariyuṭi, minzi wanita tuɣa ixs ad t isellem. Netta d ijjen zi tenɛac.