4
Yasuɛ ak-d temɣart zi Samariya
1 Umi issen Yasuɛ, aqa Ifarisiyyen sřin belli Netta ittegg u issɣeṭṭaṣ imeḥḍaren ktar zi Yuḥanna
2 - waxxa Yasuɛ simant nnes war isseɣḍiṣ ca, maca imeḥḍaren nnes -
3 iffeɣ-dd zi Yahudiyya, iruḥ ɛawed ɣar Ljalil.
4 Maca tuɣa ittxeṣṣa ad icuq di Samarya.
5 Netta yusa-dd ɣar ict n tendint n Isamariyyen, qqaren as Suxar, tenni ɣar ṭṭarf n iyyar i iwca Yaɛqub i mmis Yusuf.
6 Tuɣa din anu n Yaɛqub. Yuḥeř Yasuɛ zeg ibriden uca iruḥ iqqim amenni ɣar wanu, tuɣa tasaɛɛet d setta, ixs ad yini azyen n wass.
7 Tusa-dd ict n temɣart zi Samarya ḥima ad tagem aman. Yasuɛ inna as: “Ewc ayi aman, ad sweɣ!”,
8 minzi imeḥḍaren nnes tuɣa ruḥen ɣar tendint maḥend ad sɣen macca i yixef nsen.
9 Tamɣart n Samarya tenna as: “Mammec teggid tᵉttared zzayi ad teswed, aqa Cek d Uday u necc d tamɣart zi Samarya?” Minzi Udayen war nnumen ttemṣurufen ak-d imezdaɣ n Samarya.
10 Yasuɛ yarra-dd, inna as: “Maɛlik tessned timewca n AREBBI d wenni d am iqqaren: ‘Ewc ayi ad sweɣ!’, iři cem tᵉttar tt zzayes, uca Netta ad yiři iwc am Aman Iddaren.”
11 Tenna as temɣart: “A Sidi, war ɣarek i zi ɣa tagmed uca anu yuǧeɣ, manis i d ɣa tawyed Aman Iddaren?
12 Ma Cek d ameqqran zi jedditneɣ Yaɛqub wenni d aneɣ iwcin anu wanita, iswa zzayes, netta d tarwa nnes d řebhayem nnes?”
13 Yasuɛ yarra-dd, inna as: “Marra wenni i ɣa iswen zeg waman-a, ad ifud ɛawed,
14 maca wenni i ɣa iswen zeg waman i d as ɣa wceɣ Necc, netta war ittfadi ɛemmarṣ. Minzi aman i d as ɣa wceɣ Necc, ad dayes dewřen d řɛunṣar n waman i dd itteffɣen ɣar Tudart ittduman.”
15 Tamɣart tenna as: “A Sidi, ewc ayi aman-a ḥima war ttfideɣ, war dd-ttiseɣ ɛad da, ḥima ad agmeɣ.”
16 Inna as Yasuɛ: “Ruḥ, řaɣa-dd i weryaz nnem uca dweř-dd danita.”
17 Nettat tenna as: “War ɣari bu weryaz!” Yasuɛ inna as: “Tessiwřed nican umi tennid: ‘War ɣari bu weryaz!’,
18 minzi tuɣa ɣarem xemsa n yeryazen d wenni ɣarem řexxu, war iǧi bu d aryaz nnem. Man aya i tennid d tidett.”
19 Tamɣart tenna as: “A Sidi, ttwařiɣ belli Cek d anabi.
20 Řejdud nneɣ sejden deg wedrar-a, maca kenniw teqqarem belli di Urcalim mani iǧa wemcan i di icuwwar ad nesjed.”
21 Yasuɛ inna as: “Ttiqq ayi, a tameṭṭut, aqa tasaɛɛet ad dd-tas i di war tɛebbdem Baba uřa deg wedrar-a uřa di Urcalim.
22 Kenniw tɛebbdem min war tessinem, maca neccin nɛebbed min nessen, minzi Tudart zeg Wudayen.
23 Maca ad dd-taweḍ tsaɛɛet, nettat aqa-tt řexxu, belli inni iɛebbden nican, ad ɛebden Baba di Arruḥ u di tidett, minzi Baba yarezzu inni t i ɣa iɛebden ammu.
24 AREBBI d Arruḥ u inni t iɛebbden, ittxeṣṣa asen ad ɛebden s Arruḥ d tidett.”
25 Tamɣart tenna as: “Necc ssneɣ belli ad dd-yas Lmasiḥ. Xmi dd ɣa yas Netta, ad aneɣ isseřmed kuřci.”
26 Yasuɛ inna as: “Aqa d NECC, wenni kim issawařen.”
27 Am tuɣa issawař, usin-dd imeḥḍaren nnes, ttɛejben řami t ufin issawař ak-d ict n temɣart. Waxxa amenni uřa d ijj war ini: “Min tarezzud?” niɣ: “Mayemmi akides tessawařed?”
28 Xas uca tejja temɣart aqedduḥ nnes s waman, tuyur ɣar tendint, tenna i iwdan:
29 “Araḥem-dd, ad tẓarem Aryaz i d ayi inna marra min ggiɣ. Ma ad taɣ Netta d Lmasiḥ?”
30 Iwdan ffɣen-dd zi tendint, usin-dd ɣares.
31 Jar u jar ttaren zzayes imeḥḍaren nnes, nnan: “A Amseřmad nneɣ, ecc!”
32 Maca Netta inna asen: “Necc aqa ɣari ijj n macca ḥima ad zzayes ittwacc, war tt tessinem ca kenniw.”
33 Imeḥḍaren mmseqsan jar asen: “Ma yiwyi as-dd ḥed ca n macca?”
34 Yasuɛ inna asen: “Macca inu aqa ad ggeɣ min ixs wenni d ayi dd-issekken u ad kemmřeɣ řxedmet nnes.
35 Ma war teqqarem: ‘Iqqim ɛad arebɛa n iyuren uca ad dd-tas ṣṣabet’?’ Xzarem, Necc ad awem iniɣ, sgeɛɛdem tiṭṭawin nwem, xzarem deg iyyaren, aqa warɣen, wejden i ṣṣabet.
36 Wenni imejjaren ad iksi řmunet nnes, iyru řɣiǧet i Tudart ittduman, ḥima ad farḥen jmiɛ wenni izarrɛen d wenni imejjaren.
37 Minzi di man aya aqa awař-a d tidett: ‘Ijjen ad izarɛ u wenneɣni ad imjar.’
38 Necc ssekkeɣ-dd kenniw ḥima ad temjarem min umi war texdimem kenniw. Inneɣni tuɣa xeddmen, kenniw tudfem ɣar řxedmet nsen.”
39 Aṭṭas n Isamariyyen zi tendint nni umnen zzayes x wawař n temɣart i tuɣa icehhden: “Netta inna ayi marra min ggiɣ.”
40 Řami ɣares dd-usin Isamariyyen nni, sseqsan t ḥima akidsen iqqim, uca iqqim akidsen tnayen n wussan dinni.
41 Uca aṭṭas umnen zzayes zi ssibbet n wawař nnes,
42 nnan i temɣart nni: “Neccin war nettimen ca ɛad zi min d aneɣ tennid, minzi neccin nesřa i-t s yixef nneɣ, nessen belli Wa s tidett d Lmasiḥ, wenni itticen Tudart i ddunect.”
Asgenfi n mmis n umsexxar n ujeǧid
43 Awarni tnayen n wussan iffeɣ-dd Yasuɛ ssenni, iruḥ ɣar Ljalil.
44 Minzi Yasuɛ simant nnes aqa iched belli anabi war ɣares bu ccan di temmurt nnes.
45 Umi dd-yusa ɣar Ljalil, areḥḥben t-i-dd Ijaliliyyen, minzi nitni ẓrin marra min igga di Řɛid di Urcalim, minzi uřa d nitni usin-dd ɣar Řɛid.
46 Yusa-dd Yasuɛ ɛawed ɣar tendint n Qana di Ljalil mani yarra aman d binu. Tuɣa din ijj n umsexxar n ujeǧid di Kafarnaḥum ɣares mmis ihřec.
47 Řami isřa belli Yasuɛ yusa-dd zi Yahudiyya ɣar Ljalil, iruḥ ɣares, isseqsa t ḥima ad dd-ihwa maḥend ad issgenfa mmis, wenni tuɣa igguren ad immet.
48 Yasuɛ inna as: “Kenniw war ttimnem ca mařa war teẓrim řeɛřamat d lmuɛjizat.”
49 Inna as uxeddam n ujeǧid: “A Sidi, hwa-dd qbeř i ɣa immet uḥenjir inu.”
50 Yasuɛ inna as: “Ruḥ aqa mmic iddar!” Aryaz nni ittiqq deg wawař i d as inna Yasuɛ uca iruḥ.
51 Řami dd-ihwa, mmeřqan akides imsexxaren nnes, xebbaren t, nnan as: “Aqa mmic iddar”.
52 Isseqsa ten x tsaɛɛet min di iggenfa. Nnan as: “Iḍennaḍ ɣar tsaɛɛet wiss sebɛa, ixs ad yini ɣar tsaɛɛet tamezwarut n uziř, tejja xas tmessi.”
53 Xenni issen babas belli aqa imsar ɣar tsaɛɛet i d as inna Yasuɛ: “Aqa mmic iddar!” Yumen netta d marra aytbab n taddart nnes.
54 Ta tuɣa ɛawed d řeɛřamet wiss tnayen i igga Yasuɛ zeg wami dd-iffeɣ zi Yahudiyya ɣar Ljalil.