3
Yasuɛ d Nikudimus
1 Tuɣa din ijj n bnadem zeg Ifarisiyyen qqaren as Nikudimus, netta d ijj n umeqqran n Wudayen.
2 Yusa-dd ɣar Yasuɛ s ǧiřet, inna as: “A Amseřmad inu, neccin nessen belli Cek d Amseɣɣar i dd-yusin zi ɣar AREBBI, minzi war izemmar uřa d ijj ad igg řeɛřamat-a i teggid Cek, mɣir mařa akides AREBBI.”
3 Yarra-dd Yasuɛ, inna as: “S tidett, s tidett, Necc ad ac iniɣ, uřa d ijj war izemmar ad iẓar Tageldit n AREBBI mɣir mařa ittwaxřeq-dd zi jdid.”
4 Nikudimus inna as: “Mammec izemmar ijj n uwessar ad dd-ittwaxřeq ́́ɛad? War izemmar ad yadef ɛawed deg uɛeddis n yemmas, maḥend ad dd-ittwaxřeq i twařa wiss tnayen?”
5 Yasuɛ yarra-dd, inna as: “S tidett, s tidett, Necc ad ac iniɣ: Mařa ca n yijjen war dd-ixřiq ca zeg waman u zeg Arruḥ, war izemmar ad yadef ɣar Tgeldit n AREBBI.
6 Min dd-ittwaxeřqen zi ddat, netta d ddat, u min dd-ittwaxeřqen zi Arruḥ, netta d Arruḥ.
7 War tbehtem ca mařa nniɣ ac, ittxeṣṣa kenniw ad dd-tᵉttwaxeřqem zi jdid.
8 Asemmiḍ ittsuḍ manis ixs, tᵉttesřid i usuḍi nnes, war tessined ca manis dd-ittas uřa mani ittraḥ. Ammu i iǧa ɛawed marra wenni dd-ittwaxeřqen zi Arruḥ.”
9 Nikudimus yarra-dd, inna as: “Mammec i ɣa yegg ad yiři man aya?”
10 Yasuɛ yarra-dd, inna as: “Ma Cek d amseɣɣar n Israil u war tessined ca man aya?
11 S tidett, s tidett, Necc ad ac iniɣ: Neccin nessawař x min nessen, neched x min neẓra, waxxa amenni kenniw war teqbiřem ca cchadet Nneɣ.
12 Mařa ssiwřeɣ awem x min iǧan x temmurt, kenniw war timnem, mammec ɣa teggem ad tamnem mařa ssiwřeɣ awem x min iǧan deg ujenna?
13 Uřa d ijj war yuři ɣar ujenna mɣir wenni dd-ihwan zeg ujenna, aqa-t d Mmis n bnadem, d Wenni iǧan deg ujenna.
14 Am mammec issgeɛɛed Musa afiɣar di řefyafi, ammu ittxeṣṣa ad ittwassgeɛɛed Mmis n bnadem ɛawed,
15 ḥima marra wenni zzayes i ɣa yamnen, war itthellik ca, maca ad ɣares tiři Tudart ittduman.
16 Ammu i yexs AREBBI ddunect ař mani iwca ayenni n Mmis, ḥima kuř ijjen wenni zzayes i ɣa yamnen, war ihellik ca, maca ad ɣares tiři Tudart ittduman.
17 Minzi AREBBI war dd-issekk ca Mmis ɣar ddunect, ḥima ad iḥaseb ddunect, maca issekk i-t-i-dd ḥima ad zzayes teddar ddunect.
18 Wenni zzayes i ɣa yamnen, war ittwaḥasab ca. Wenni war ittimnen ca, aqa ittwaḥaseb zi řexxu, minzi netta war yumin ca deg Yisem n uyenni n Mmis n AREBBI.
19 D wa d řeḥkam, aqa Tafawt tusa-dd ɣar ddunect, maca iwdan xsen taǧest x Tfawt, minzi timegga nsen tuɣa atent d tiɛeffanin.
20 Marra wenni itteggen tuɛeffna, icarreh Tafawt, war dd-ittis ca ɣar Tfawt, ḥima war ttwawebbxent ca timegga nnes.
21 Maca wenni itteggen tidett ad dd-yas ɣar Tfawt, ḥima ad banent timegga nnes, aqa ttwaggent di AREBBI.”
Cchadet wiss tnayen n Yuḥanna Amseɣḍaṣ
22 Awarni man aya yusa-dd Yasuɛ d imeḥḍaren nnes ɣar temmurt n Yahudiyya, isseɛdu din ca n řweqt akidsen uca tuɣa isseɣḍaṣ.
23 Uřa d Yuḥanna tuɣa isseɣḍaṣ di Ɛaynun i dd-yusin ṭṭarf i Salim, minzi dinni aman aṭṭas. Usin-dd iwdan dinni uca ttwassɣeḍṣen,
24 minzi Yuḥanna tuɣa ɛad war immenḍar ca di řeḥbes.
25 Imsar ijj n umḥarweḍ jar ijjen zeg imeḥḍaren n Yuḥanna d ijj n Wuday x mammec ɣa yiři řuḍu.
26 Nitni usin-dd ɣar Yuḥanna, nnan as: “A Amseřmad nneɣ, xzar, wenni akidek iǧan x ujemmaḍ n L’Urdun, wenni min xef tcehded, aqa uřa d Netta isseɣḍaṣ u marra ttasen-dd ɣares.”
27 Yarra-dd Yuḥanna, inna asen: “Bnadem war izemmar ad iqbeř uřa d ict n tmesřact mařa war d as temmewc zeg ujenna.
28 Kenniw simant nwem tcehhdem belli necc nniɣ: ‘Necc war ǧiɣ ca d Lmasiḥ!’, maca aqa necc ttwassekkeɣ-dd zzates.
29 Wenni ɣar teǧa tesřit, netta d asři. Ameddukkeř n wesři wenni ittbeddan zzates, ittesřa ɣares, ifarreḥ s řefraḥet tameqqrant s tmijja n wesři. S uyenni, xzar, aqa tᵉttwakemmeř řefraḥet inu tanita.
30 Ittxeṣṣa ad igma Netta u necc ad neqṣeɣ.
31 Maɣar wenni dd-yusin zi sennej, Netta sennej i marra. Wenni iǧan zi temmurt, zi temmurt issawař. Wenni dd-yusin zeg ujenna, Netta sennej i marra,
32 u Netta icehhed zi min iẓra d zi min isřa, maca cchadet nnes war tt iqebbiř uřa d ijjen.
33 Wenni iqebbřen cchadet nnes d wenni issarsen ṭṭabeɛ nnes n ucemmiɛ belli aqa AREBBI d tidett.
34 Minzi wenni dd-issekk AREBBI, issawař s wawařen n AREBBI, minzi AREBBI war ittic ca Arruḥ s řmizan.
35 Babas ittexs Mmis uca igga as kuřci deg ifassen nnes.
36 Wenni ittamnen di Mmis ɣares Tudart ittduman, maca wenni war iṭṭiɛ ca Mmis, war iẓarr Tudart, maɣar aɣḍab n AREBBI ad xas iqqim.”