1 “War farreḥ ca ammu, Israil, ařami i ɣa tesřiwřiwed am řegnus. Maɣar tiggʷejed x AREBBI nnec am tessefseded ixef nnec. Tettexsed řmunet n ict n temɣart n farq-ccɣeř di marra inedrar n usarwet n imendi. 2 Andrar d tsirt n uḍiř war d asen sseccen ca u binu n jdid ad tt ixeyyeb. 3 Nitni war ttɣiman ca di temmurt n SIDI. Ifrayim ad dd-idweř ɣar Miṣra u nitni ad ccen min ixemjen di Accur. 4 Nitni war seyyben ca tiwhibin n binu i SIDI u tiɣarṣa nsen war xas areṭṭant. Ad asen iřint am weɣrum n yinni iceṭṭnen. Marra inni t iccen, ad dewřen xemjen, maɣar aɣrum nsen ad yiři i řeɛmar nsen, war dd-ittis di Taddart n SIDI. 5 Min ɣa teggem xenni deg ijj n wass n řɛid ittwaggen, deg wass n Řɛid n SIDI? 6 Maɣar, xzar, aqa nitni ttaggʷejen zi ssibbet n ureddeǧ. Miṣra ad ten issmun, Muf ad ten tenḍeř. Irezzazen ad meẓẓren di nnuqart nsen, cbarq ak-d isennanen ad iṭṭef amcan n iqiḍan nsen. ◼

7 Aqa ussan n ujarreb usin-dd, aqa ussan n lɛiqab usin-dd. Nitni ad tt ssnen, inni n Israil. Anabi am yijj n abuhaři i nitni, aryaz arruḥani am yijj n bu-jnun zeg waṭṭas n řmuɛṣiyyet nnec d waṭṭas n řeɛdawet nnec. 8 Aɛessas n Ifrayim ittɛessas ak-d uɛawen n AREBBI inu, wah, netta, anabi ittaf ijj n řfex n unegmar di marra ibriden nnes, řeɛdawet di Taddart n AREBBI nnes. ◘ 9 Maɣar aqa aten ɣarqen ař iři, am deg wussan nni n Jibɛa. Netta ad iɛqeř x řmuɛṣiyyet nsen u ad ixřef ddnub nsen.”

10 “Necc ufiɣ Israil am uḍiř di řexřa, ẓriɣ řejdud nwem am yimenza n wartu di temẓi nsen. Nitni maca udfen ɣar Baɛl-Faɣur uca wcin ixef nsen s řefḍiḥet i netta uca nitni dewřen d nnɛawat am wenni tuɣa ttexsen. ◘ 11 X yinni n Ifrayim, aqa aɛuǧi nsen ad iḍu am wejḍiḍ, ad yaggʷej x wexřaq u x uɛeddis n yemmas u x tkessit n tarwa. 12 Waxxa nitni ssyamen iḥenjiren nsen ař ɣa mɣaren, Necc ad ten arreɣ nhřa iḥenjiren ařami war din iqqim bnadem. Maɣar uřa i nitni s tidett, uct, xmi xasen ɣa ḥeyydeɣ. 13 Axmi ẓriɣ Ṣur, ammu i ittwaẓẓu Ifrayim deg ict n jjihet arḍan. U řexxu ittxeṣṣa i Ifrayim ad isellem tarwa nnes i uqettař. 14 Ewc asen, a SIDI! Min i ɣa tewced? Ewc asen ijj n uɛeddis s weṭṭuw n iseyman d yebbac yuẓɣen. ◘ 15 Marra taɛeffant nsen tɛarra di Jiljal, maɣar dinni carheɣ ten x tɛeffant n tmegga nsen. Necc ad xasen aẓẓřeɣ zi Taddart inu. Ɛemmarṣ ɛad ad ten xseɣ ɛad, marra řḥukkam nsen d imɣewwɣen. ◘ 16 Ifrayim ittwawwet, iẓewran nsen uẓɣen, war ttirwen ɛad. Waxxa nitni ttarwen, Necc ad nɣeɣ imɛizzan n uɛeddis nsen. 17 AREBBI inu ad ten inḍar, maɣar nitni war ɣares ttesřin, u nitni ad dewřen ttᵉtliɛen jar řegnus.”