1 “Israil d ict n tzayart tewseɛ, tenni i dd ittawyen řɣiǧet i yixef nnes. Mammec tuɣa řɣiǧet nnes temmarni, ammu i dd-mmarenyen uřa d iɛalṭaren nnes, mecḥař tecna temmurt nnes, ammu i ggin nitni uřa d imayḍuten iqeddsen cnan. ◘ 2 Uř nsen aqa ittwabḍa, řexxu aqa daysen řɛib. Netta ad yarẓ iɛalṭaren nsen, Netta ad ihdem imayḍuten nsen iqeddsen 3 Maɣar řexxu qqaren: ‘Neccin war ɣarneɣ bu ujeǧid, maɣar neccin war neggʷid ca SIDI, u ɛad mařa tuɣa din ajeǧid: ‘Min izemmar ad aneɣ igg?’ ◘ 4 Ssawařen awařen ixwan, ttjaǧan ẓur am tteggen ijj n řɛahd, uca řḥukm idweř ittgeɛɛed am yijj n řeɛceb amesmum di řexḍuḍ n iyyaren. 5 Imezdaɣ n Samarya ad nnxeřɛen zi ssibbet n uɛejmi n Bayt-Awan, maɣar řgens nnes ad xas icḍen, uca uřa d ikehhanen nnes ad xas ceḍnen, x uɛuǧi nnes, maɣar wanita ittwakkes zzayes. 6 Ad t awyen ɣar Accur d tarzeft i ujeǧid Yarib. Ifrayim ad igg řefḍiḥet i uzeǧif nnes u Israil ad iseḍḥa zi lqarar nnes. 7 Ittwassesqar ujeǧid n Samarya am ukuffu x wudem n waman. 8 Ad ttwahedment řegɛudi n Awan, aqa-tent d ddenb n Israil. Isennanen d tzeggʷart ad uɛřan x iɛalṭaren nsen u nitni ad inin i idurar: ‘Dřem aneɣ!’ u i tewririn: ‘Wḍant-i-dd xaneɣ!’ ◘ 9 Zeg wussan n Jibɛa teggid ddnub, a Israil. Dinni qqimen nitni bedden, iwa, war ten iřeqqif řatar n umenɣi ak-d ayt n řmuɛṣiyyet di Jibɛa. ◘ 10 Aqa dayi meẓri ḥima ad ten carfeɣ u ad xasen ssmuneɣ řegnus xmi ten ɣa carfeɣ s tnayen n ixeṭṭan nsen.”

11 “Ifrayim d ict n tɛejmit ittwadarrben, tᵉttexs ad tessarwet. Necc ɛduɣ x tcuni n yiri nnes. Necc ad nedheɣ Ifrayim, Yahuda ad icarz, Yaɛqub ad inqec temmurt i yixef nnes. ◼ 12 Zarɛem tasegda i yixef nwem, mjarem tamexsiwt icewwaren maḥend ad zzayes tɛemmarem aqemmum nwem, carzem ijj n yeyyar ixwa i yixef nwem, minzi aqa-t d řḥař maḥend ad tarzum x SIDI, ař dd ɣa yas Netta u ad yarra tasegda ad xawem teccat am wenẓar.”◘

13 “Aqa kenniw tcarzem min war iḥřin, tṣeyyfem řmuɛṣiyyet, teccim řɣiǧet n uxarriq, maɣar cek tᵉtecřed x webrid i tixḍared simant nnec, x ubarru n ayt n bu-teɣruḍt nnec. 14 Ad ikkar ijj n ddriz n umenɣi ḍidd i řgens nnec u marra lqelɛat nnec ad ttwahedment am mammec ihdem Calman Bayt-Arbil deg wass n umenɣi, umi tᵉttwařbez ict n yemmas ak-d iḥenjiren nnes. 15 Ammu i igga Bayt-Il akidwem zi ssibbet n tuɛeffna nwem yuǧɣen. Ɣar řefjar ad ittwaseɣḍ ujeǧid n Israil s ijj n useɣd qaɛ.”