8
Iqarreb-dd řḥukm x weɛbed n Ifrayim i l’aṣnam
1 “Ggem icc n icarri i usuḍi ɣar uqemmum nnec. Am yijj n ugider iṭṭaw netta sennej i Taddart n SIDI, maɣar nitni ɛeddan x Řɛahd inu u ɣewwɣen x Ccariɛa inu.
2 Nitni ad xafi dd-řaɣan: ‘AREBBI inu, neccin, Israil, aqa nessen Cek!’
3 Israil inḍar min iṣebḥen, řeɛdu ad t iḍfar.
4 Nitni ggin xasen ijeǧiden, maca nitni war ǧin ca zzayi, nitni areccḥen řḥukkam, maca Necc war tt ssineɣ. Nitni ggin řexyařat n l’aṣnam i yixef nsen, s uyenni ad ittwaqess řexyař nni.
5 Aɛejmi nnec d ijj n nnɛi, a Samarya! Aɣḍab inu yareqq qibač nsen. Ař meřmi ɣa qqimen nitni war zemmaren ad ksin tazdugi?
6 Maɣar iffeɣ-dd řexyař n ṣṣanam zi Israil, aqa ijj n bu-ṣṣenɛet igga i-t u wanita war iǧi d AREBBI. Wah, ad idweř řexyař d iwetwiten, aɛejmi n Samarya.
7 Maɣar nitni zarrɛen asemmiḍ u mejjaren taḥaryaḍt. War ttifen tidrin ɣar iɣedduyen, u zeg imendi ibedden war zzaysen tteggen ssmid, niɣ ad ittwagg, maca ad t ṣarḍen ibarraniyyen.”
8 “Aqa Israil ittwaṣarḍ. Řexxu dewřen am yict n řqecɛet jar řegnus, war dd-tusi x řxaḍar i ḥed.
9 Maɣar nitni geɛɛden ɣar Accur. Ijj n weɣyuř n řexřa ittɣima i yixef nnes waha, maca inni n Ifrayim ttxeǧaṣen i imḥibban nsen.
10 Waxxa nitni zzenzen ixef nsen i řegnus, maca ggur řexxu ad ten yarweɣ. Nitni war zemmaren ad ggen mɣir drus waha zi ssibbet n zzeyyar n ujeǧid n řḥukkam.
11 Maɣar Ifrayim igga iɛalṭaren nnes d aṭṭas, ḥima ad zzaysen iddenb. Aqa dewřen d iɛalṭaren n ddenb i netta.
12 Necc uriɣ as aṭṭas n tmesřayin zi Ccariɛa inu, maca nitni ḥesben xasent am ca n řḥajjet d taɣribt.
13 Zi tɣarṣa n ṣṣdaqi inu, aqa nitni wehhben zzaysent aysum uca ttᵉtten zzayes, maca SIDI war zzaysen yareṭṭi. Řexxu ad ixarreṣ di řmuɛṣiyyet nsen u Netta ad ixeǧeṣ ddnub nsen. Ad dd-dewřen ɣar Miṣra.
14 Maɣar Israil ittu wenni t iggin, ibna tizawiyyin, uca Yahuda ikettar tineddam ifaryen, maca Necc ad ssekkeɣ ict n tmessi di tneddam nnes, ad tecc řeqṣur nnes.”