42
Aytmas n Yusuf usin-dd ɣar Miṣra i twařa tamezwarut
1 Řami iẓra Yaɛqub belli aqa din řḥebb n yirden di Miṣra, xenni inna i iḥenjiren nnes “Maɣar teqqimem txezzarem ijjen deg wenneɣni?”
2 Inna: “Aqa necc sřiɣ belli din imendi di Miṣra. Ruḥem dinni uca sɣem aneɣ-dd ssenni řḥebb, ḥima ad neqqim neddar uca war nettmetti ca.”
3 Hwan ɛecra n wawmaten n Yusuf, maḥend ad raḥen ad sɣen imendi zi Miṣra.
4 Maca Yaɛqub war issekk Binyamin, umas n Yusuf, ak-d aytmas, minzi inna: “Ḥima war d as ittemsar ca n řḥajjet d taɛeffant.”
5 Jar inni dd-yusin dinni, usin-dd ɛawed ayt n Israil, maḥend ad sɣen macca, minzi tuɣa din řaẓ di temmurt n Kenɛan.
6 Tuɣa Yusuf d řḥakem x temmurt uca izzenz imendi i marra řgens n temmurt. Umi dd-iwḍen aytmas n Yusuf, bendqen as s uɣembub nsen ɣar temmurt.
7 Umi iẓra Yusuf aytmas, iɛqeř i-ten, maca igga ixef nnes axmi war ten issin uca issiweř akidsen s řeqsaḥet, inna asen: “Manis dd-tusim?” Nnan: “Zi temmurt n Kenɛan, maḥend ad nseɣ macca.”
8 Yusuf iɛeqř aytmas, maca nitni war t ɛqiřen ca.
9 Ifekkar Yusuf di tirja nni tuɣa xasen yurja, inna asen: “Kenniw d ibergagen i teǧam, tusim-dd, ḥima ad tẓarem mani war tᵉttwaḥḍi temmurt.”
10 Arrin-dd xas: “Lla, a sidi inu, ɛad imsexxaren nnec usin-dd, maḥend ad sɣen macca.
11 Marra neccin aqa aneɣ d tarwa n ijj n weryaz. Aqa aneɣ d iryazen d imtiqqan, imsexxaren nnec war ǧin ca d ibergagen.”
12 Netta yarra-dd xasen: “Lla, kenniw tusim-dd maḥend ad tẓarem tuɛɛaryent n temmurt.”
13 Nnan nitni: “Neccin d imsexxaren nnec, aqa aneɣ di tenɛac n wawmaten, tarwa n ijj n weryaz di temmurt n Kenɛan. Aqa amaẓuẓ aqa-t ak-d babatneɣ u wenneɣni war iǧi ɛad.”
14 Inna asen Yusuf: “Ma war d awem t nniɣ umi nniɣ: ‘Aqa kenniw d ibergagen!’
15 S uya tᵉttwaqeǧbem. S tidett am iddar firɛun, kenniw war dd-tteffɣem ssa, mɣir xmi dd ɣa yas umatwem amaẓuẓ danita!
16 Sekkem ijj n zzaywem, maḥend ad dd-yawi umatwem. Xenni kenniw ad tᵉttwaḥebbsem uca awařen nwem ad ttwaqeǧben, ma daywem řaman. Mařa lla, s tidett am iddar firɛun, aqa kenniw d ibergagen!”
17 Uca igga i-ten třata n wussan di řeḥbes.
18 Deg wass wiss třata inna asen Yusuf: “Ggem aya, ḥima ad teqqimem teddarem, necc tteggʷdeɣ AREBBI.
19 Mařa kenniw d iryazen d imtiqqan, jjem xenni ijj n umatwem ad iqqim icarf di taddart mani tᵉttwaḥebbsem kenniw, xenni ruḥem, ksim imendi i řaẓ n aytbab n taddart nwem.
20 Awyem-dd xenni umatwem, amaẓuẓ, maḥend ad ttwaqeǧben wawařen nwem, war tᵉttmettim ca.” Uca nitni ggin amenni.
21 Nnan i wayawya: “S tidett aqa ittxeṣṣa aneɣ ad dd-narr ddeyyet n umatneɣ, aqa neẓra řḥeṣran n řeɛmar nnes umi d aneɣ ittar aḥinni, maca war d as nesři ca! X uya dd-yusa řḥeṣran-a xaneɣ.”
22 Yarra-dd xasen Rubin, inna: “Ma war d awem t nniɣ, umi nniɣ: ‘War xeṭṭim ca ak-d uḥenjir!’, maca kenniw war tesřim ca. Xzar, idammen nnes ttwattaren řexxu!”
23 Nitni war ssinen belli ifhem asen Yusuf, minzi tuɣa aturjman jar asen.
24 Inneqřeb xasen uca isɣuy. Awarni as inneqřeb-dd ɛawed ɣarsen, issiweř akidsen, iksi zzaysen Cimɛun uca iḥebbes i-t zzat i tiṭṭawin nsen.
25 Yumur Yusuf maḥend ad ccuren tixuncay nsen s imendi u ad ggen tmenyat n nnuqart di kuř ict n txancet nsen uca wcin asen macca i webrid. U ammu i kidsen ggin.
26 Ssarbun imendi nsen x yeɣyař nsen uca ffɣen ssenni.
27 Umi yarzem ijjen zzaysen taxancet nnes, ḥima ad issecc aɣyuř nnes ɣar mani ɣa ssensen, iẓra nnuqart nnes deg arzam n uqemmum n txancet nnes.
28 Inna i yaytmas: “Nnuqart inu tedweř ayi-dd. Xzar, aqa-tt da di txancet inu!” Řexdenni ibedd asen wuř, arjijen uca nnan i wayawya: “Manawya i d aneɣ ittegg AREBBI?”
29 Uca reḥḥgen ɣar babatsen Yaɛqub di temmurt n Kenɛan uca ɛawden as marra min xasen ikkin, nnan:
30 “Aryaz, bab n temmurt, issiweř akidneɣ s řeqsaḥet, iḥesb aneɣ d ibergagen n temmurt.
31 Maca nenna as: ‘Neccin d iryazen d imtiqqan, ɛemmarṣ war neǧi d ibergagen.
32 Aqa aneɣ di tenɛac n wawmaten, iḥenjiren n babatneɣ. Ijjen war iqqim, amaẓuẓ aqa-t ass-a ak-d babatneɣ di temmurt n Kenɛan.’
33 U aryaz nni, bab n temmurt, inna aneɣ: ‘S uya ad ssneɣ, ma aqa kenniw d imtiqqan. Ad kidi tejjem ijjen zeg aytmatwem uca ad teksim macca i řaẓ nni din ɣar aytbab n taddart nwem, xenni ffɣem.
34 Awyem-dd da umatwem, amaẓuẓ, xenni ad ssneɣ belli war teǧim d ibergagen, maca d imtiqqan uca ad awem dd-arxuɣ i wamatwem nwem uca ad traḥem ad tjuřem di temmurt.’ ”
35 Umi ssexwan tixuncay nsen, ḥekkaren belli di txancet n kuř ijjen, aqa dayes tacyart s nnuqart nnes. Ẓrin nitni d babatsen ticyar s nnuqart nsen uca tudef i-ten tiggʷudi.
36 Inna asen babatsen Yaɛqub: “Aqa tḥarrmem ayi zeg iḥenjiren inu! Yusuf war dd-iḍhar ɛad uřa d Cimɛun, uca řexxu tᵉttexsem ad tnedhem Binyamin. Marra man aya ittemsaren di řeɛkes inu!”
37 Xenni issiweř Rubin ɣar babas, inna: “Ad tenɣed tnayen n iḥenjiren inu, mařa war d ac t-i-dd-arriɣ. Ewc ayi t deg ufus inu, necc aqa ad ac t-i-dd-arreɣ!”
38 Maca netta inna as: “Mmi war ittriḥ ca akidwem, minzi umas immut u netta weḥḥdes i d ayi iqqimen. Mařa iřqef i-t ca n řɣar deg webrid nni i ɣa tekkem, ad tessehwam ccib inu s wecḍan ɣar řaxart.”