43
Aytmas n Yusuf usin-dd ɣar Miṣra i twařa wiss tnayen
1 Maca řaẓ tuɣa imɣar aṭṭas di temmurt.
2 Řami kemmřen ccin řḥebb n yirden nni kidsen dd-iwyen zi Miṣra, inna asen babatsen: “Dewřem-dd ɛawed uca sɣem aneɣ-dd cwayt n macca.”
3 Xenni issiweř Yahuda, inna: “Aqa aryaz nni inna aneɣ s urekkez: “War tẓarrem ɛad udem inu, mɣir mařa tiwyem-dd umatwem akidwem.”
4 Mařa tessekked umatneɣ akidneɣ, ad nraḥ din uca ad ac dd-nseɣ macca,
5 maca mařa war t tᵉssekkid akidneɣ, xenni war dinni nettraḥ, minzi aryaz nni inna aneɣ: ‘War tẓarrem ɛad udem inu mɣir mařa yusa-dd umatwem akidwem.’ ”
6 Inna Israil: “Maɣar d ayi teggim řɣar uca tennam i weryaz nni belli aqa ɣarwem ɛad umatwem nneɣni?”
7 Nitni nnan: “Aryaz nni isseqsa xaneɣ nican, u x temmurt mani nexřeq, inna: ‘Ma iddar ɛad babatwem? Ma ɣarwem ca n umatwem nneɣni?’ Xenni nɛawed as t. Ma nzemmar zeg wawařen-a ad dd-nejbed illa ad nessen zeɛma ad yini: ‘Awyem-dd umatwem?’ ”
8 Uca inna Yahuda i babas Israil: “Sekk akidi aḥenjir uca ad nekkar ad nraḥ, ḥima ad neddar u war nᵉttmetti ca neccin d cek d tarwa nneɣ.
9 Necc ad as iřiɣ d aḍman u zeg ufus inu ad t tᵉttared ɛawed. Mařa war d ac t-i-dd-arriɣ, ad t ssbeddeɣ zzatek, ad yiři xḍiɣ akidek i řebda!
10 Meɛlik war neqqim nettraja aṭṭas, tiři řexxu nedweř-dd tnayen n twařawin.”
11 Uca yarra-dd xasen Israil, babatsen: “Mařa ammu i yeǧa s tidett, ggem ammu uca ksim min icnan aṭṭas n temmurt di txuncay nwem, hwam-dd maḥend ad t tiwyem d arriɣalu i weryaz nni: cwayt n balsam d cwayt n tamment, řeɛṭur d mirru d teɣyact n pistac d ǧuz.
12 Ksim tnayen n tseqqar n tenɛacin n nnuqart akidwem uca arrem s ufus nwem nnuqart i dd-iɛeqben di txuncay nwem. Ad taɣ tuɣa d ca n lɣalaṭ.
13 Awyem-dd ɛawed umatwem akidwem, kkarem, ɛeqbem ɣar weryaz nni.
14 Uca aqa Arebbi, Amzemmar x kuřci, ad awem iwc arreḥmet zzat i wudem n weryaz nni uca ad yarxu i umatwem nneɣni d Binyamin. U min d ayi iqqimen necc, mařa ttwaḥarrmeɣ zeg iḥenjiren inu, aqa ad zzaysen ttwaḥarrmeɣ!”
15 Xenni iwyen iryazen arriɣalu uca ksin deg ufus nsen tnayen n tseqqar n tmenyat n nnuqart uřa d Binyamin uca kkaren, hwan ɣar Miṣra uca bedden zzat i wudem n Yusuf.
16 Umi iẓra Yusuf Binyamin akidsen, inna i wenni tuɣa x taddart nnes: “Sidef iryazen-a ɣar taddart, tɣarṣed i ca min iǧan i tɣarṣt, sewjed i-tt, minzi iryazen-a ad kidi ccen ɣar wezyen n wass.”
17 Igga weryaz am mammec d as inna Yusuf uca yiwi iryazen ɣar taddart n Yusuf.
18 Xenni dewřen yeryazen nni ggʷeden aṭṭas, umi ten ssidfen di taddart n Yusuf uca nitni nnan: “X tmenyat n nnuqart i d aneɣ dd-idewřen di txuncay nneɣ twařa tamezwarut iwyen aneɣ-dd da ḥima xenni ɛawed ad xaneɣ ɛefsen uca ad xaneɣ ɛeddan, xenni ad aneɣ ksin d isemɣan ak-d yeɣyař nneɣ.”
19 Qarrben-dd ɣar weryaz nni igga Yusuf x taddart uca ssiwřen akides ɣar wadaf n taddart,
20 nnan: “A sidi inu, neccin aqa nican nehwa-dd d amezwar, maḥend ad nseɣ macca.
21 Imsar umi dd-niweḍ ɣar řemraḥ uca narzem tixuncay nneɣ, neẓra nnuqart n kuř ijj ɣar werzam n uqemmum n txancet nnes, nnuqart nneɣ s řmizan nnes nican. Aqa narra i-tt-i-dd s ifassen nneɣ.
22 Ɛawed niwi-dd deg ifassen nneɣ nnuqart nneɣni, ḥima ad nseɣ macca. Neccin war nessin wi iggin nnuqart di txuncay nneɣ.”
23 Yarra-dd xasen: “Sřam xawem, war tteggʷedem ca! AREBBI nwem d AREBBI n babatwem iwca awem ict n txabect di txuncay nwem. Aqa nnuqart nwem ṭṭfeɣ tt.” Uca issuffeɣ-dd ɣarsen Cimɛun.
24 Xenni issidef weryaz iryazen nni ɣar taddart n Yusuf, iwca asen aman uca sirden iḍaren nsen. Iwca asen ɛawed řeɛřef i yeɣyař nsen.
25 U nitni sswejden arriɣalu i Yusuf, wenni igguren ad dd-yas ɣar wezyen n wass, minzi nitni sřin aqa ad ccen dinni.
26 Řami dd- yudef Yusuf ɣar taddart, wcin as-dd di taddart arriɣalu nni dd-iwyen akidsen, uca bendqen as ɣar temmurt.
27 Isseqsa ten x mammec ǧan uca inna: “Mammec iǧa babatwem awessar i xef tessiwřem? Ma aqa ɛad iddar?”
28 Nitni arrin: “Mlih i yeǧa umsexxar nnec, babatneɣ, netta ɛad iddar.” Uḍaren nitni uca netta ibendeq.
29 Řami netta issgeɛɛed tiṭṭawin nnes uca iẓra Binyamin, umas, mmis n yemmas, inna: “Ma d wa d umatwem, amaẓuẓ, min xef d ayi tessiwřem?” Xenni inna: “Ad xak iḥinn AREBBI, a mmi!”
30 Yusuf iffeɣ xenni deɣya, minzi taḥnunect nnes x umas tuɣa temɣar. Yarzu x mani ɣa iru uca yudef ɣar ijj n wexxam uca iru din.
31 Issird udem nnes uca iffeɣ-dd ɣar barra, iṭṭef deg ixef nnes, inna: “Qedmem-dd macca.”
32 Nitni sswejden as i netta weḥḥdes u i nitni weḥḥedsen uřa i Imiṣriyyen inni akides ccin weḥḥedsen, minzi Imiṣriyyen war zemmaren ad ccen aɣrum ak-d Iɛibraniyyen, minzi d man aya d jjɛifect ɣar Imiṣriyyen.
33 Uca nitni qqimen zzat i wudem nnes: amenzu deg wemcan nnes ɛlaḥsab tasɣart n tmenzut nnes uca amaẓuẓ deg wemcan nnes ɛlaḥsab temẓi nnes. Tuɣa iryazen ttbehaten, xezzaren ijjen deg wenneɣni.
34 Uca netta iqeddem asen-dd zi min tuɣa iǧan zzates, maca tasɣart n Binyamin tuɣa-tt xemsa n tseqqar ktar zi tseqqar n marra idsen. Uca swin nitni, ssenni dewřen farḥen akides.