41
Tarjit n firɛun
1 Awarni řami ɛdun tnayen n iseggʷusa yurja firɛun aqa netta zeɛma ibedd x yeɣzar n Nil.
2 Xzar, geɛɛdent-i-dd sebɛa n tfunasin zeg iɣzar, ṣebḥent i řxezrat u ɛemmarent s weysum, heddant jar weḥtic n uɣanim.
3 U xzar, sebɛa n tfunasin nneɣni geɛɛdent-i-dd awarni asent zeg iɣzar. Nitenti war ḥřint i řxezrat, aqa kkuccḍent uca beddent zzat i tfunasin nneɣni ɣar tma n iɣzar.
4 Tifunasin i war iḥřin i řxeẓrat, tinni ikuccḍen, ṣarḍent sebɛa n tfunasin iṣebḥen i řxezrat, tinni iṣeḥḥen. Uca ifaq-dd firɛun.
5 Iṭṭeṣ ɛawed uca yurja twařa nneɣni, u xzar, zeg ict n tseṭṭa geɛɛdent sebɛa n tidrin ccurent, cnant.
6 U xzar, ɣemyent-i-dd sebɛa n tidrin qqusbaren awarni asent, isscemḍ i-tent usemmiḍ acarqi.
7 Sebɛa n tidrin qqusbarent ṣarḍent sebɛa n tidrin iyman d iccuren. Uca ifaq-dd firɛun, u xzar, aqa d ict n terjit.
8 Ɣar ṣṣbeḥ iban-dd belli buḥbeř nnes innehweř uca issekk maḥend ad dd-řaɣan i marra tarwa n tseḥḥart n Miṣra u i marra imiɣisen. Iɛawd asen firɛun tarjit nnes, maca war din tuɣi ḥed izemmar ad tt ifessar i firɛun.
9 Issiweř umeqqran n iwarraden ak-d firɛun, inna: “Deg wass-a ad ttwasɛeqřeɣ x ddnub inu.
10 Umi iffugem firɛun x imsexxaren nnes, igga ayi di řeḥbes di taddart n řqebṭan n iɛessasen n arrimet, am necc am umeqqran n ixebbazen.
11 Necc d netta nurja ict n tarjit di ǧiret d ict. Kuř ijj zzayneɣ yurja tarjit nnes s řmeɛna nnes.
12 Tuɣa din akidneɣ ijj n ubřiɣ d Aɛibrani. Tuɣa-t d amsexxar n řqebṭan n iɛessasen n arrimet. Nḥaja as tirja nneɣ uca ifessar aneɣ tent. I kuř ijj zzayneɣ ifessar as tarjit nnes.
13 Am mammec tent ifessar, amenni i imsar. Aqa Firɛun yarra ayi necc ɣar řxedmet inu u wenneɣni yuyeř i-t.”
14 Issekk firɛun ḥima ad dd-řaɣan x Yusuf uca ssuffɣen t-i-dd deɣya zeg weḥfur n imeḥbas. Iḥeff acuwwaf, ibeddeř arruḍ uca ammu i yudef ɣar firɛun.
15 Inna firɛun i Yusuf: “Necc urjiɣ ict n tarjit, war iǧi wi tt ɣa ifessaren. Maca aqa sřiɣ xak belli cek, xmi i ɣa tesřid i tarjit, tzemmared ad tt tfessared.”
16 Yarra-dd Yusuf x firɛun, inna: “War iǧi ca zzayi, maca AREBBI ad dd-yarr x mammec ɣa idweř umeddur n firɛun.”
17 Inna firɛun i Yusuf: “Di tarjit inu ẓriɣ ixef inu beddeɣ x tma n iɣzar.
18 Aqa geɛɛdent-i-dd sebɛa n tfunasin zeg iɣzar, ṣeḥḥent u ṣebḥent i řxezrat, heddant jar weḥtic n uɣanim.
19 Awarni asent sebɛa n tfunasin nneɣni geɛɛdent-i-dd. Tuɣa kkuccḍent u war ḥřint deg wudem, uẓɣent. Ammu war ḥřint, ɛemmarṣ war tent ẓriɣ di temmurt n Miṣra am tekmeř.
20 Tifunasin yuẓɣen, war iḥřin, sarḍent sebɛa n tyenduzin timezwura iṣeḥḥen.
21 Umi udfent tina deg uɛeddis nsent, ɛad war issin ḥed, belli aqa udfent deg uɛeddis nsent, aqa qqiment war ḥřint i řxezrat am qbeř. Xenni faqeɣ.
22 Ɛawed ẓriɣ di tarjit inu, xzar, zeg ict n tseṭṭa ffɣent-i-dd sebɛa n tidrin ccurent u cnant.
23 Xzar, ẓriɣ, geɛɛdent-i-dd sebɛa n tidrin qqusbarent, uẓɣent, isscemḍ i-tent usemmiḍ acarqi.
24 U sebɛa n tidrin yuẓɣen, ṣarḍent sebɛa n tidrin nni icnan. Nniɣ tarjit i tarwa n tseḥḥart, maca war din tuɣi ḥed i izemmaren ad ifessar tarjit-a.”
25 Xenni inna Yusuf i firɛun: “Tarjit n firɛun d ict. AREBBI ibeyyen i firɛun min i ɣa yegg Netta.
26 Sebɛa n tfunasin cnant aqa atent d sebɛa n iseggʷusa. Uca tidrin cnant aqa d sebɛa n iseggʷusa. D tarjit d ict.
27 Sebɛa n tfunasin uẓɣent war iḥřin tinni dd-yuřyen awarni asent, aqa d sebɛa n iseggʷusa, u sebɛa n tidrin qqusbarent, tinni isscemḍ usemmiḍ acarqi, aqa atent d sebɛa n iseggʷusa i di ɣa yiři řaẓ.
28 D wa d awař i nniɣ i firɛun. Min ɣa yegg AREBBI, aqa isscen i-t i firɛun.
29 Xzar, di sebɛa n iseggʷusa i dd-igguren ad tiři tyawant tameqqrant x marra tammurt n Miṣra.
30 Awarni asen ad dd-asen sebɛa n iseggʷusa n řaẓ. Di marra tammurt n Miṣra ad ttun marra tyawant uca řaẓ ad iteḥḥa tammurt.
31 Uca tyawant war tᵉttiři tᵉttwassen ɛad zi ssibbet n řaẓ i tt-i-dd-iḍfaren, maɣar řḥař ad yiři iqseḥ aṭṭas.
32 Ɛlaḥsab ṭṭbiɛet n tnayen n wudmawen n tarjit n firɛun, aqa tnayen n tseqqar, aqa man aya s minzi yura tt AREBBI nican u AREBBI aqa ad tt yegg deɣya.
33 Ejj firɛun řexxu ad yarzu x ijj n weryaz s řefhamet d tiɣit, maḥend ad t igg x temmurt n Miṣra.
34 Ejj firɛun ad igg ammu: ejj i-t ad igg iweqqafen x temmurt, maḥend ad ksin řexmus n řɣiǧet n temmurt n Miṣra di sebɛa n iseggʷusa n tyawant.
35 Ejj i-ten ad ssmunen marra řeɛweč deg iseggʷusa iṣebḥen i dd ɣa yasen uca ad xemmřen řḥebb n yirden sadu ufus n firɛun, maḥend ad t xemmřen d macca di tneddam.
36 Ad yiři d řexzen n macca i temmurt i sebɛa n iseggʷusa n řaẓ nni dd ɣa iwḍan x temmurt n Miṣra, ḥima tammurt war tᵉttmetti ca s řaẓ.”
37 Awařen-a banen-dd d lemliḥ i firɛun d marra imsexxaren nnes.
Yusuf idweř d řḥakem x temmurt n Miṣra
38 Xenni inna firɛun i imsexxaren nnes: “Ma izemmar ad ittwaf ca n weryaz am wa i di izeddeɣ Arruḥ n AREBBI?”
39 Uca inna firɛun i Yusuf: “Umi AREBBI immeř ac-dd marra aya, x uya war din yeǧi wenni ɣar teǧa řefhamet d tiɣit am cek.
40 Cek ad tiřid x taddart inu u i wawař nnec ad iṭaɛ řgens inu marra. Mɣir x řɛarc waha ad iřiɣ necc d ameqqran xak.”
41 Yarni inna firɛun i Yusuf: “Xzar, ggiɣ cek x marra tammurt n Miṣra.”
42 Uca ikkes firɛun taxadent nnes zeg ufus nnes, igga i-tt deg ufus n Yusuf uca issyarḍ as arruḍ n řeqṭen azdad uca igga as taseddect n wureɣ deg yiri nnes.
43 Issenya i-t di tkarrut wiss tnayen i tuɣa ɣares uca řaɣan am gguren zzates: “Qews!” Ammu i t igga x marra tammurt n Miṣra.
44 Inna firɛun i Yusuf: “Necc d firɛun, břa cek uřa d ijj ad igeɛɛed afus nnes niɣ aḍar nnes di marra tammurt n Miṣra.”
45 Iřaɣa firɛun i Yusuf s yisem n Ṣafnat-Faɛniḥ uca iwca as Asnat d tamɣart, tenni d yeǧis n Futi-Faraɛ, akehhan n Un. Uca ijuř Yusuf di temmurt n Miṣra.
46 Tuɣa Yusuf d mmis n třatin n iseggʷusa řami ibedd netta zzat i firɛun, ajeǧid n Miṣra, uca iffeɣ Yusuf zzat i firɛun uca ijuř x marra tammurt n Miṣra.
47 Uca tesseɣmi-dd temmurt di sebɛa n iseggʷusa s tyawant.
48 Issmun marra macca n sebɛa n iseggʷusa n tyawant, inni tuɣa di temmurt n Miṣra, uca ixemmeř macca di tneddam. Macca n iyyaren i d as dd-innḍen i kuř tandint, ixemmeř i-tt dayes daxeř di tendint.
49 Yusuf ixemmeř řḥebb n irden aṭṭas, anect n ijdi n řebḥar, ařami war izemmar ad ittwaḥseb, minzi tuɣa-t břa řeḥsab.
50 Qbeř i dd-yusa useggʷas amezwaru n řaẓ, mmarenyen-dd ɣar Yusuf tnayen n iḥenjiren, inni d as dd-turuw Asnat, yeǧis n Futi-Faraɛ, akehhan n Un.
51 Isemma Yusuf amenzu Manassa, minzi inna: “AREBBI aqa issettu ayi marra tamara inu d marra taddart n baba.”
52 Wiss tnayen isemma i-t Ifrayim, minzi inna: “AREBBI igga ayi s řɣiǧet di temmurt n řeḥṣaret inu.”
53 Xenni kemmřen sebɛa n iseggʷusa n ufeyyeḍ n řɣiǧet nni ikkin x temmurt n Miṣra,
54 uca bdan ad dd-asen sebɛa n iseggʷusa n řaẓ, am mammec xas issiweř Yusuf. Tuɣa řaẓ di marra timmura, maca di marra tammurt n Miṣra tuɣa dayes ɛad aɣrum.
55 Ařami tuɣa řaẓ di marra tammurt n Miṣra, isɣuy řgens ɣar firɛun x weɣrum. Uca inna firɛun i marra Imiṣriyyen: “Ruḥem ɣar Yusuf, ggem min d awem ɣa yini!”
56 Tuɣa řaẓ izeǧeɛ x marra tammurt uca yarzem Yusuf x marra min tuɣa ixemmeř, uca izzenz i-t i Imiṣriyyen, minzi tuɣa řaẓ idweř imɣar aṭṭas di temmurt n Miṣra.
57 Zi marra timmura usin-dd iwdan ɣar Miṣra ɣar Yusuf ḥima ad sɣen, minzi di marra timmura tuɣa řaẓ imɣar aṭṭas.