7
Musa d Harun ruḥen ɣar firɛun twařa nneɣni
1 Inna SIDI i Musa: “Xzar, Necc aqa ggiɣ cek d AREBBI i firɛun d umac Harun ad ac yiři d anabi i cek.
2 Cek ad tinid marra min zi cek ɣa umureɣ uca Harun, umac, ad issiweř ak-d firɛun, ḥima ad yejj ad ffɣen ayt n Israil zi temmurt nnes.
3 Maca Necc ad ssqesḥeɣ uř n firɛun uca ad kettareɣ řeɛřamat d lmuɛjizat inu di temmurt n Miṣra.
4 Maca firɛun war ɣarwem-dd issḥessi u Necc ad ggeɣ afus inu x Miṣra uca ad ssuffɣeɣ řɛeskarat inu, řgens inu, ayt n Israil, zi temmurt n Miṣra s řeḥkamat imɣaren.
5 Řexdenni ad ssnen Imiṣriyyen belli Necc d SIDI i ǧiɣ xmi ɣa sswiẓẓḍeɣ afus inu x Miṣra uca ad ssuffɣeɣ ayt n Israil zi řwesṭ nsen.”
6 Uca ggin Musa d Harun am mammec ten yumur SIDI, wah, amenni i ggin.
7 Tuɣa Musa d ijj n bnadem n tmenyin n iseggʷusa u tuɣa Harun d ijj n bnadem n třata u-tmenyin n iseggʷusa, řami ssiwřen ak-d firɛun.
8 Uca issiweř SIDI ak-d Musa d Harun, inna:
9 “Mařa issiweř akidwem firɛun, ad yini: ‘Secnem, aqa kenniw tzemmarem ad teggem ict n lmuɛjiza!’, xenni ad tinid i Harun: ‘Ṭṭef taɣɣarct nnec uca nḍar i-tt zzat i firɛun!’, xenni ad tedweř d ict n řhaycet.”
10 Udfen xenni Musa d Harun ɣar firɛun uca ggin mammec i d asen yumur SIDI. Inḍar Harun taɣɣarct nnes zzat i firɛun d imsexxaren nnes uca tedweř d ict n řhaycet.
11 Řexdenni iřaɣa-dd ɛawed firɛun x imiɣisen d iseḥḥaren, uca tarwa n tseḥḥart n Miṣra ggin ɛawed amenni s tmegga nsen n swadday swadday d ict.
12 Inḍar kuř ijjen taɣɣarct nnes uca dewřent tiɣɣaryen nni d řhaycat. Maca taɣɣarct n Harun tsarḍ tiɣɣaryen nsen.
13 Uř n firɛun idweř iqseḥ uca war ɣarsen isři ca, am mammec tuɣa i d asen inna SIDI qbeř.
Tesɛa n jjrayeḥ timezwura
14 Řexdenni inna SIDI i Musa: “Uř n firɛun idweř iqseḥ. War ixs ad yejj ad iffeɣ řgens.
15 Ruḥ tiwecca ɣar ṣṣbeḥ ɣar firɛun. Xzar, netta ad iffeɣ ɣar waman. Cek raja din ɣar tma n yiɣzar uca ksi-dd taɣɣarct nni idewřen d afiɣar deg ufus nnec.
16 Ad as tinid: ‘SIDI, AREBBI n Iɛibraniyyen issekk ayi-dd ɣarek, inna: Ejj ad iraḥ řgens inu, ḥima ad ayi iɛbed di řexřa! Xzar, ař řexxu war texsed ad tseǧed.
17 Ammu i iqqar SIDI: ‘S man aya ad tessned belli Necc d SIDI!’ Xzar, Necc ad wteɣ aman i iǧan deg iɣzar s teɣɣarct i ɣari deg ufus inu uca ad dewřen d idammen.
18 Iseřman i iǧan deg iɣzar ad mmten ař ɣa yurṣuḍ iɣzar n Nil, ad ɛiffen Imiṣriyyen ad swen aman n iɣzar n Nil.’ ”
19 Inna SIDI ɛawed i Musa: “Ini i Harun: ‘Ksi taɣɣarct nnec, swiẓẓeḍ afus nnec x waman n Miṣra, x iɣezran nsen, x tɣezratin nsen, x iyeřmamen nsen x marra imucan manis ttmunan waman uca ad dewřen d idammen. Ad dewřen d idammen x marra tammurt n Miṣra, uřa di řeqcuɛ n ukeccuḍ d weẓru.’ ”
20 Musa d Harun ggin am mammec i d asen yumur SIDI. Issgeɛɛed Harun taɣɣarct, iwta aman nni tuɣa deg iɣzar qibač i tiṭṭawin n firɛun d imsexxaren nnes uca marra aman nni tuɣa deg iɣzar dewřen d idammen.
21 Mmuten iseřman inni tuɣa deg iɣzar uca yurṣuḍ yeɣzar ařami dewřen Imiṣriyyen war zemmaren ad zzayes swen aman uca dewřen waman d idammen di marra tammurt n Miṣra.
22 Maca tarwa n tseḥḥart n Miṣra ggin amenni s tmegga nsen n swadday swadday ařami uř n firɛun idweř iqseḥ, u netta war ɣarsen issḥess ca, am mammec d asen tuɣa inna SIDI.
23 Inneqřeb firɛun uca yudef ɣar taddart nnes uca war iggi uř nnes ɛad di man aya.
24 Marra Imiṣriyyen ɣzan x tma n iɣzar n Nil maḥend ad afen aman n tessit, minzi war zemmaren ad swen aman n iɣzar n Nil.
25 Ammu i ɛdun sebɛa ussan awarni řami iwta SIDI iɣzar n Nil.
26 Xenni inna SIDI i Musa: “Adef ɣar firɛun, ini as: ‘Ammu i iqqar SIDI: Ejj ad iffeɣ řgens inu ḥima ad ayi iɛbed.
27 Mařa tugid ad ten tejjed ad raḥen, aqa ad wteɣ marra tammurt nnec s iqarqriwen
28 uca iɣzar n Nil ad dd-iseffiy x iqarqriwen, ad zzayes-dd geɛɛden, ad adfen ɣar taddart nnec u ɣar wexxam nnec n yiḍeṣ, ad dd-asen x qama nnec uřa di taddart n imsexxaren nnec u jar řgens nnec, u ɛad deg ifarranen nnec u di tbeqyin nnec.
29 Ad xak dd-geɛɛden iqarqriwen uřa x řgens nnec u x marra imsexxaren nnec.’ ”