6
SIDI issiweř ak-d Musa
1 Řexdenni inna SIDI i Musa: “Řexxu ad tẓared min ɣa ggeɣ i firɛun, minzi s ufus ijehden ad ten yejj ad raḥen, wah, s ufus ijehden ad xasen yaẓẓeř zi temmurt nnes.”
2 Issiweř AREBBI ɣar Musa, inna as: “Necc d SIDI,
3 Necc baneɣ-dd i Ibrahim, d Isḥaq d Yaɛqub am Arebbi, Amzemmar x kuřci, maca s Yisem inu ‘SIDI’, tuɣa war ɣarsen ttwassneɣ ca.
4 Ɛawed ssgeɛɛdeɣ Řɛahd inu akidsen aqa ad asen wceɣ tammurt n Kenɛan, tammurt n unewji nsen mani ten tuɣa am yibarraniyyen.
5 Ɛawed Necc sřiɣ anixses n ayt n Israil, inni ittwaggen d isemɣan zeg Imiṣriyyen, aqa xarrṣeɣ di Řɛahd inu.
6 S uya ad tinid i ayt n Israil: Necc aqa ayi d SIDI u Necc ad kenniw ssuffɣeɣ zi sadu zayřu n Imiṣriyyen. Necc ad kenniw fekkeɣ zi tesmuɣi nsen, ad kenniw fdiɣ s uɣiř isswiẓẓḍen d řeḥkamat imɣaren.
7 Ad kenniw qebřeɣ d řgens inu uca ad awem iřiɣ d AREBBI u kenniw ad tessnem belli Necc d SIDI, AREBBI nwem, d wenni tuɣa kenniw issuffuɣen zi sadu zayřu n Imiṣriyyen.
8 Ad kenniw ssidfeɣ ɣar temmurt mixef ssgeɛɛdeɣ afus inu maḥend ad tt wceɣ i Ibrahim d Isḥaq d Yaɛqub u Necc ad awem tt wceɣ d řwart, Necc d SIDI!”
9 Ammu i issiweř Musa ak-d ayt n Israil, maca nitni war sřin ca ɣar Musa zi ssibbet n řeḥṣaret n tnefsect d tasmuɣi iqesḥen.
10 Uca issiweř SIDI ak-d Musa, inna:
11 “Adef ɣar firɛun, ajeǧid n Miṣra, tinid as ad iḍřeq i ayt n Israil maḥend ad ffɣen zi temmurt nnes.”
12 Maca Musa issiweř zzat i SIDI, inna: “Xzar, ayt n Israil war ɣari dd-sřin, mammec i d ayi ɣa iseř firɛun u necc aqa ɣari iyencicen war ittwaxetnen.”
13 Řexdenni issiweř SIDI ɣar Musa d Harun uca yumur i-ten ad uyuren ɣar ayt n Israil d firɛun, ajeǧid n Miṣra, ḥima ad issuffeɣ ayt n Israil zi temmurt n Miṣra.
Tarwa n Rubin, Cimɛun d Lawi
14 Ina d izeǧifen x řaǧat zi tudrin n ibabaten nsen.
Ayt n Rubin, amenzu n Israil, nitni d Hanuk d Fallu, Ḥaṣrun d Karmi. D yina d řaǧat n Rubin.
15 Ayt n Cimɛun tuɣa aten d Yamuyil d Yamin d Uhad d Yakin d Ṣuḥar d Cawul, mmi n ict n temɣart Takenɛanit. Ina d řaǧat n Cimɛun.
16 Ina d ismawen n ayt n Lawi ɛlaḥsab asettef n wexřaq nsen: Jarcum d Qahat d Marari. Tuɣa řmijař n tudart n Lawi mya u-sebɛa u-třatin n iseggʷusa.
17 Ayt n Jarcum tuɣa aten d Libna d Cimɛi ɛlaḥsab řaǧat nsen.
18 Ayt n Qahat tuɣa aten d Ɛamram d Yiṣhar d Ḥabrun d Ɛuzziyil. Tuɣa řmijař n tudart n Qahat mya u-třata u-třatin n iseggʷusa.
19 Ayt n Marari tuɣa aten d Maḥli d Muci. Ina d řaǧat n Lawi ɛlaḥsab asettef n wexřaq nsen.
20 Uca Ɛamram iksi Yukabad, ɛentis, d tamɣart i yixef nnes u nettat turuw as-dd Harun d Musa. Tuɣa řmijař n tudart n Ɛamram mya u-sebɛa u-třatin n iseggʷusa.
21 Ayt n Yiṣhar tuɣa aten d Quraḥ d Nafaj d Dikri.
22 Ayt n Ɛuzziyil tuɣa aten d Micayil d Alṣafan d Sitri.
23 Uca iksi Harun Ilicabaɛ, yeǧis n Ɛamminadab, učmas n Naḥcun, d tamɣart i yixef nnes u nettat turuw as-dd Nadab d Abihu d Aliɛazar d Itamar.
24 Ayt n Quraḥ tuɣa aten d Assir d Alqana d Abiyasaf. Ina d řaǧat n Iquraḥiyyen.
25 Uca Aliɛazar, mmis n Harun, iksi icten zeg yessis n Futiyil d tamɣart i yixef nnes uca nettat turuw as-dd Finaḥas. Ina d izeǧifen n tudrin n ibabaten n Ilawiyyen ɛlaḥsab řaǧat nsen.
26 Aqa wa d Harun d Musa i umi inna SIDI: “Suffɣem ayt n Israil zi temmurt n Miṣra am ttwasettfen nitni ɛlaḥsab iseddiyyen n řɛeskar nsen.”
27 Ina d inni issiwřen ak-d firɛun, ajeǧid n Miṣra, ḥima ad ssuffɣen ayt n Israil zi Miṣra, Musa d Harun, nitni d ina.
28 Imsar deg wass i issiweř SIDI ak-d Musa di temmurt n Miṣra,
29 aqa issiweř SIDI ak-d Musa, inna: “Necc d SIDI i ǧiɣ! Marra min d ac qqareɣ, ini t i firɛun, ajeǧid n Miṣra.”
30 Xenni inna Musa zzat i SIDI: “Aqa ɣari necc iyencicen war ittwaxetnen, mammec ɣa yegg xenni ad ɣari iseǧ firɛun?”