5
Musa d Harun zzat i firɛun
1 Awarni man aya yudef Musa d Harun ɣar Firɛun, nnan as: “Ammu i iqqar SIDI, AREBBI n Israil: ‘Ejj ad iraḥ řgens inu, ḥima ad ayi iɛeyyed di řexřa!’ ”
2 Maca firɛun inna: “Min iɛna SIDI umi ɣa sřeɣ i wawař nnes uca ad jjeɣ Israil ad iffeɣ. Necc war ssineɣ SIDI u war ttejjiɣ ad iraḥ Israil.”
3 Nitni nnan: “AREBBI n Iɛibraniyyen imsagar akidneɣ, ejj aneɣ xenni ad nraḥ ticři n třata n wussan di řexřa, ad nqeddem taɣarṣt i SIDI, AREBBI nneɣ, ḥima war d aneɣ iřeqqef s ṭṭaɛun niɣ s ssif.”
4 Řexdenni inna asen ujeǧid n Miṣra: “Mayemmi, a kenniw, Musa d Harun, tessbeddem řgens x řxedmet nnes? Ruḥem kenniw, dewřem ɣar ddquřat i xawem iǧan!”
5 Inna firɛun: “Xzar, aqa řexxu řgens n temmurt d aṭṭas u kenniw texsem ad ten tessbeddem x warbar n ddquřat i xasen ttwaggent.”
6 Yumur firɛun deg wass nni i imzeyyaren n řgens u i iweqqafen nsen, inna:
7 “Zi ssa d tsawent war tticem ɛad řum i řgens maḥend ad zzayes ggen llajur am yiḍennaḍ d fariḍennaḍ. Jjem ten ad raḥen nitni, ad yrun řum i yixef nsen.
8 Řqedd n llajur i ggin iḍennaḍ d fariḍennaḍ ad xasen t teggem ɛawed, war zzayes tessneqqisem walu, minzi nitni d ifinyanen. X uya sɣuyyun ammu, qqaren: ‘Ejj aneɣ ad nraḥ ad nqeddem taɣarṣt i AREBBI nneɣ.’
9 Ittxeṣṣa řxedmet ad tiři tedqeř x iryazen-a, ḥima ad dayes řhan ammu uca war tticen ɛad taynit i wawařen ixarriqen.”
10 Řexdenni ruḥen imzeyyaren n řgens d iweqqafen nsen ggʷejen x Firɛun uca ssiwřen ak-d řgens, nnan: “Ammu i iqqar firɛun: ‘Necc war d awem tticeɣ ca ɛad řum.’
11 Ruḥem kenniw ad tyarwem řum mani t ɣa tafem, maɣar war xawem tᵉttwakkes walu zi řxedmet nwem.”
12 Řexdenni imbezzeɛ řgens x marra tammurt n Miṣra, ḥima ad yrun iɣeǧ deg wemcan n uřum.
13 Imzeyyaren ziyyaren xasen, nnan: “Kemmřem řxedmet nwem, kuř ass min dd-ittasen i kuř ass, am mammec tuɣa din řexdenni řum.”
14 Ttwafarcen iweqqafen n ayt n Israil, inni xasen ggin imzeyyaren n firɛun, nnan asen: “Mayemmi war tkemmřem tasɣart nwem n llajur am řebda, iḍennaḍ lla u ɛawed ass-a lla?”
15 Řexdenni usin-dd iweqqafen n ayt n Israil, sɣuyen ɣar firɛun, nnan: “Mayemmi tᵉttegged ammu ak-d isemɣan nnec?
16 War ittmewci bu uřum i isemɣan nnec, waxxa qqaren aneɣ: ‘Ggem llajur!’ U xzar, aqa isemɣan nnec ttᵉtten aɛmud, waxxa řɛib aqa-t di řgens nnec!”
17 Netta yarra-dd: “Kenniw d ifinyanen, d ifinyanen aṭṭas. X uya teqqarem: ‘Jjem aneɣ ad nraḥ maḥend ad nqeddem taɣarṣt i SIDI.’
18 Ruḥem řexxu ad txedmem. War d awem tticen ɛad ařum, waxxa ittxeṣṣa kenniw ad teqqimem tsebbřem řeɛbar n llajur!”
19 Řexdenni ẓrin iweqqafen n ayt n Israil, aqa-ten ḥařa, minzi ittwanna: “Kenniw war ssneqṣem walu zi llajur i dd-ittasen i kuř ass.”
20 Umi dd-ffɣen x firɛun, mmṣadafen ak-d Musa d Harun, inni tuɣa din ibedden ḥima ad ten rajan.
21 Nnan asen: “D SIDI, d wenni kenniw ittwařan, d wenni xawem i ɣa iḥekmen, minzi kenniw aqa tessarzgem aneɣ ɣar firɛun d imsexxaren nnes umi d asen teggim ssif deg ifassen nsen maḥend ad aneɣ nɣen.”
22 Řexdenni idweř Musa ɣar SIDI, inna: “A Sidi inu, mayemmi tegged řɣar di řgens-a, mayemmi d ayi tessqaded xenni?
23 Zeg wami udfeɣ ɣar firɛun ḥima ad ssiwřeɣ s Yisem nnec, ideǧ firɛun řgens-a u Cek qaɛ war tfekkid ca řgens nnec.”