4
Arebbi issekk Musa ɣar Miṣra
1 Xenni yarra-dd Musa, inna: “Xzar, nitni war dayi ttimnen ca uca war ttesřin ca i wawař inu, minzi ad inin: ‘SIDI war d ac dd-iban ca!’ ”
2 Xenni inna as SIDI: “Min ɣarek deg ufus nnec?” Uca yarra-dd: “D taɣɣarct.”
3 Inna: “Nḍar i-tt x temmurt!” Inḍar i-tt x temmurt, tedweř d ijj ufiɣar uca yarweř Musa zzayes.
4 Řexdenni inna SIDI i Musa: “Swiẓẓeḍ afus nnec, ṭṭef i-tt zeg unewwar nnes ...” - uca isswiẓẓeḍ Musa afus nnes, iṭṭef i-tt uca tedweř ɛawed d taɣɣarct deg ufus nnes -
5 “... ḥima ad amnen belli aqa iban ac-dd SIDI, AREBBI n řejdud nsen, AREBBI n Ibrahim, AREBBI n Isḥaq d AREBBI n Yaɛqub.”
6 Inna as SIDI ɛawed: “Sidef afus nnec deg weḥsin nnec.” Uca issidef afus nnes deg weḥsin uca umi t-i-dd-ikkes, xzar, afus nnes ibarṣ am wedfeř.
7 Uca inna: “Arr afus nnec ɛawed deg weḥsin!” Yarra afus nnes deg weḥsin uca iɛqeb issuffeɣ i-t-i-dd ɛawed zeg weḥsin, uca xzar, idweř ɛawed am min iqqimen n arrimet nnes.
8 “Mařa war zzayek uminen ca u war ɣarek dd-ttesřin i min d asen i ɣa tini řeɛřamet tamezwarut, xenni ad amnen di min d asen ɣa tini řeɛřamet taneggarut.
9 Mařa nitni war uminen ca di tnayen n řeɛřamat-a u war d ac sřin ca, xenni ksi aman n iɣzar uca farreɣ i-ten x řaẓaɣ u aman nni teksid zeg iɣzar ad dewřen d idammen x řaẓaɣ.”
10 Řexdenni inna Musa i SIDI: “A Sidi inu!, necc war ǧiɣ ca d aryaz n bu-tawařin, iḍennaḍ lla, uřa d fariḍennaḍ lla u zeg wami tebdid ad tessiwřed ak-d umsexxar nnec lla, minzi necc ɣari aqemmum ideqřen d iřes ideqřen.”
11 Inna as SIDI: “Wi iwcin aqemmum i bnadem? Niɣ wi iggin ḥed d aziynun niɣ d adehcur niɣ d wenni ittwařan niɣ d adarɣař? Ma war iǧi d Necc, SIDI?
12 Řexxu, ruḥ din, ad iřiɣ ak-d uqemmum nnec, ad ac ssecneɣ mliḥ min ɣa tinid.”
13 Maca netta inna: “A Sidi inu, sekk s ufus nnec man wen i texsed ad tessekked.”
14 Řexdenni ittwassarɣ weɣḍab n SIDI x Musa, inna: “Ma war iǧi Harun, Alawi, d umac? Necc ssneɣ, aqa netta issen ad issiweř. Xzar, aqa ad kic imsagar u xmi cek ɣa iẓar, ad ifarḥ wuř nnes.
15 Uca cek ad kis tessiwřed, ad as tegged awařen deg uqemmum nnes. Ggur ad iřiɣ ak-d uqemmum nnec d uqemmum nnes, ad awem ssɣareɣ min ɣa tinim.
16 Netta ad issiweř ak-d řgens deg wemcan nnec. Ad imsar ammu: netta ad ac yiři amecnaw aqemmum nnec u cek ad tiřid i netta amecnaw AREBBI.
17 Ad teksid taɣɣarct-a i zi ɣa tegged řeɛřamat deg ufus nnec.”
18 Iruḥ Musa uca idweř ɣar uḍeggʷař nnes Yitru, inna as: “Ejj ayi ad raḥeɣ, ad ɛeqbeɣ ɣar aytma nni iǧan di Miṣra, ḥima ad ẓareɣ, ma ɛad ddaren.” Inna Yitru i Musa: “Ruḥ di řehna.”
19 Inna SIDI ɛawed i Musa di Midyan: “Řuḥ, tdewřed ɣar Miṣra, minzi aqa mmuten marra inni tuɣa yarezzun řmewt nnec.”
20 Iksi Musa tamɣart nnes d iḥenjiren nnes uca issenya i-ten x weɣyuř, idweř-dd ɣar temmurt n Miṣra uca iksi Musa taɣɣarct n AREBBI deg ufus nnes.
21 Inna SIDI i Musa: “Xmi ɣa traḥed, ad dd-tdewřed ɛawed ɣar Miṣra, xzar ad tegged i firɛun marra lmuɛjizat nni d ac ggiɣ deg ufus nnec. Maca Necc ad ssqesḥeɣ uř nnes, řami war ixs ad iḍřeq i řgens.
22 Xenni ad tinid i firɛun: ‘Ammu i iqqar SIDI: Israil d mmi d amenzu inu.
23 Aqa nniɣ ac: Ejj ad iffeɣ mmi ad ayi iɛbed! Maca cek tugid ad t tejjed. Xzar, Necc ad nɣeɣ mmic, amenzu nnec.’ ”
24 Imsar deg webrid, deg ijj n wemcan mani ɣa ssensen, immeřqa SIDI akides u Netta tuɣa ixs ad t ineɣ.
25 Řexdenni teksi Ṣaffura ict n txedmect n weẓru, texten řeɛdařyet n mmis uca teřqef as iḍaren nnes, tenna: “S tidett cek teǧid am yijj n yesři n idammen i necc”
26 Ijja i-t xenni. Řexḍenni tenna: “Cek d isři n idammen i teǧid!”, di ssibbet n ixtanen.
27 Inna SIDI i Harun: “Ruḥ ad teřqid Musa di řexřa!” Uca iruḥ, imsagar akides ɣar wedrar n AREBBI, issudem i-t.
28 Ixebbar Musa Harun x marra awařen i d as inna SIDI wenni i-t-i-dd-issekken uřa x marra řeɛřamat i d as yumur ad igg.
29 Xenni iruḥ Musa d Harun, ssmunen marra imɣaren n ayt n Israil,
30 uca issiweř Harun s marra awařen i tuɣa inna SIDI i Musa uca igga řeɛřamat qibač i tiṭṭawin n řgens.
31 Uca yumen zzaysen řgens, sřin belli SIDI izziǧez as ayt n Israil umi iẓra řmeḥnet i di ǧan, uḍaren uca bendqen as.