9
Tẓaǧit d ndamet n Ɛizra
1 Awarni řami ittwakemmeř man aya marra, usin-dd ɣari řḥukkam, nnan: “Řgens n Israil d ikehhanen d Ilawiyyen war qqimen ttwamsebḍan x řegnus n temmura-ya, maɣar jjɛayef nsen am tinni n ayt n Kenɛan d Iḥittiyyen d Ifiriziyyen d Iyabusiyyen d ayt n Ɛammun d ayt n Mu’ab d Imiṣriyyen d Imuriyyen.
2 Nitni iwyen zeg yessitsen timɣarin i yixef nsen u i iḥenjiren nsen ařami ṣuren zzariɛet d tamqeddast s řegnus n temmura-ya, wah, afus n řḥukkam d imḍebbaren tuɣa-t d amezwaru di řeɣdar-a.”
3 Umi sřiɣ aya, carrgeɣ arruḍ inu d useřham inu, qeřɛeɣ-dd acuwwaf n uzeǧif u n tmart uca qqimeɣ jeɛɛareɣ.
4 Xenni munen-dd xafi marra, inni ittarjijen zi AREBBI n Israil, di ssibbet n řeɣdar n ayt n lmenfa, maca necc qqimeɣ jeɛɛareɣ ař řweqt n tewhibt n tmeddit.
5 Ɣar tewhibt n tmeddit kkareɣ zeg uswaḍeɛ inu s warruḍ inu d useřham inu icarrgen uca uḍareɣ x ifadden u sswiẓẓḍeɣ ifassen inu ɣar SIDI, AREBBI inu.
6 Nniɣ: “AREBBI inu, necc sedḥiɣ u ttwassbehdřeɣ ař war zɛimeɣ ad ɣarek dd-ssgeɛɛdeɣ udem inu, a AREBBI inu, minzi řmuɛṣiyyet nneɣ temɣar aneɣ x uzeǧif u amarwas nneɣ imɣar ař ajenna.
7 Zeg wussan n řejdud nneɣ ař ass-a aqa aneɣ deg umarwas d ameqqran u x řmuɛṣiyyet nneɣ nemmewc neccin d ijeǧiden nneɣ d ikehhanen nneɣ deg ifassen n ijeǧiden n temmura, aqa nemmewc i ssif, i tmeḥbast, i ukecceḍ u i řefḍiḥet x wudmawen nneɣ, am mammec i teǧa ass-a.
8 Řexxu tuɣa din ict n tzeḥziḥt d tameẓyant n arḍa n SIDI, AREBBI nneɣ, ḥima ad aneɣ yejj ca n yinni innejmen u ḥima ad aneɣ iwc ijj n řewted di Zzawect Tameqqrant nnes Iqeddsen u tfawt i tiṭṭawin nneɣ, a AREBBI nneɣ, u ḥima ad aneɣ dd-yarr nnefs cwayt di tesmuɣi nneɣ.
9 Aqa neccin d isemɣan, maca di tesmuɣi nneɣ war dayneɣ ismiḥ AREBBI nneɣ, maca Netta idřa aneɣ s tmexsiwt nnes icewwaren zzat i wudem n ijeǧiden n Lfurs maḥend ad aneɣ dd-yarr nnefs i usbeddi n Taddart n AREBBI twařat nneɣni, i weɛdař n řxirbat u ḥima ad aneɣ iwc ijj n wemcan ittwannḍen s řḥiḍ di Yahuda u di Urcalim.”
10 “Uca řexxu, min ɣa nini awarni uya ɛad, a AREBBI nneɣ, minzi nesmeḥ di řumurat nnec,
11 tinni tumured s tsexxart n imsexxaren nnec, inabiyyen, inni innan: ‘Tammurt tenni i ɣa tadfem maḥend ad tt tᵉṭṭfem d řwart, d ict n temmurt tᵉttwassexmej s řexmej n řegnus n temmura, s jjɛayef nsen i zi tt ccuren zi ṭṭarf ař ṭṭarf nneɣni s texmuji nsen’,
12 d inni iqqaren uřa ɛad řexxu: ‘War tticem tiḥenjirin nwem d timɣarin i iḥenjiren nsen, uřa d tiḥenjirin nsen war tent ttiwyem i iḥenjiren nwem uca war arezzum x řaman nsen niɣ řxar nsen i řebda, ḥima ad tdewřem tjehdem u ad teccem mummu n řɣiǧet n temmurt u ad tt tewcem d řwart i řebda i iḥenjiren nwem.’ ”
13 “Uca awarni marra min i d aneɣ imsaren di ssibbet n tmegga nneɣ tiɛeffanin d umarwas nneɣ ameqqran, a AREBBI nneɣ, aqa Cek war d aneɣ txeǧṣed ca mɣir drus waha ařami war nettwahellek ca s řmuɛṣiyyet nneɣ u tewcid aneɣ ɛad ina inni innejmen am tt teǧa řexxu.
14 Ma nzemmar řexxu ad narẓ twařa nneɣnit tiweṣṣa nnec u ad negg ad nedweř d iḍeggʷařen ak-d řegnus nni iggin jjɛayef-a? Ma xenni Cek war xaneɣ tseɛɛared ařami xaneɣ i ɣa teqḍid ař mani war ittɣimi ijj n řbaqi uřa d wenni innejmen?
15 A SIDI, AREBBI n Israil, Cek d amsegged, minzi neccin d inni iqqimen nnejmen am teǧa ass-a. Aqa neccin s umarwas i neǧa zzat i wudem nnec, minzi uřa d ijjen war izemmar ad ibedd zzat i wudem nnec di ssibbet-a.”