8
Lista n yinni dd-idewřen ak-d Ɛizra
1 Ina d izeǧifen x ibabaten n řaǧat, ak-d lista n jjadira nsen, inni akidi dd igeɛɛden zi Babil umi tuɣa teǧa tgelda n ujeǧid Artaḥcasta.
2 Zeg ayt n Finḥas: Jarcum,
zeg ayt n Itamar: Daniyal,
zeg ayt n Dawud: Ḥaṭṭuc.
3 Zeg ayt n Cakanya, zeg ayt n Faruc: Zakariyya u akides ttwazemmemen mya u-xemsin n yeryazen ak-d jjadira nsen.
4 Zeg ayt n Faḥat-Mu’ab: Ilyuɛinay, mmis n Zaraḥ-Yah, u akides mitayen n yeryazen.
5 Zeg ayt n Cakanya, mmis n Yaḥziyil, u akides teřt-mya n yeryazen.
6 Zeg ayt n Ɛadin: Ɛabid, mmis n Yunatan, u akides xemsin n yeryazen.
7 Zeg ayt n Ɛilam: Icaɛya, mmis n Ɛatalya, u akides sebɛin n yeryazen.
8 Zeg ayt n Cafaṭya: Zabadya, mmis n Mixayil, u akides tmenyin n yeryazen.
9 Zeg ayt n Yuwab: Ɛubadya, mmis n Yaḥiyil, u akides mitayen u-tmentac n yeryazen.
10 Zeg ayt n Bani: Calumit, mmis n Yucafya, u akides mya u-settin n yeryazen.
11 Zeg ayt n Babay: Zakariyya, mmis n Babay, u akides tmenya u-ɛicrin n yeryazen.
12 Zeg ayt n Ɛajad: Yuḥanan, mmis n Haqqaṭan, u akides mya u-ɛecra n yeryazen.
13 Zeg ayt n Aduniqam, ineggura, d ina d ismawen nsen: Ilifalaṭ, Yaɛiyil d Camɛiya u akidsen settin n yeryazen.
14 Zeg ayt n Biɣway: Ɛutay d Zabbud u akides sebɛin n yeryazen.
Asafar d twasit ɣar Urcalim
15 Necc ssmuneɣ ten ɣar iɣzar nni ittekken x Ahawa. Dinni newta iqiḍan nneɣ třata n wussan u necc ḥekkareɣ i řgens d ikehhanen u war ufiɣ uřa d ijjen zeg Ilawiyyen.
16 Xenni ssekkeɣ ɣar Aliɛazar, Ariyil, Camɛiya, Il-Natan, Yarib, Alnatan, Natan, Zakariyya u ɣar Macullam, inni d izeǧifen, u ɣar Yuyarib d Il-Natan, iryazen ɣarsen řefhamet.
17 Umureɣ ten x Ɛiddu, azeǧif deg wemcan umi qqaren Kasifya, uca ggiɣ asen awařen deg uqemmum nsen, ḥima ad ten inin i Ɛiddu, i učmas u i imsexxaren n Zzawect Tameqqrant deg wemcan umi qqaren Kasifya, maḥend ad aneɣ dd-awyen imsexxaren i Taddart n AREBBI nneɣ.
18 Umi tuɣa xaneɣ afus iṣebḥen n AREBBI, ssekken aneɣ-dd ijj n weryaz s řefhamet, ijjen zeg iḥenjiren n Maḥli, mmis n Lawi, mmis n Israil, u wanita d Carabya, ak-d iḥenjiren nnes d aytmas, marra idsen tmenṭac n yeryazen,
19 u ɛawed Ḥacabya u akides Icaɛya zeg ayt n Marari, ak-d aytmas d iḥenjiren nsen, ɛicrin n yeryazen.
20 U zeg imsexxaren n Zzawect Tameqqrant nni iwcin Dawud d řḥukkam i Ilawiyyen maḥend ad asen sexxaren, aqa aten mitayen u-ɛicrin n imsexxaren n Zzawect Tameqqrant inni marra ttwařaɣan s ismawen nsen.
21 Xenni řaɣiɣ dinni ɣar iɣzar n Ahawa s yijj n uẓummi, maḥend ad nessaḍar ixef nneɣ zzat i wudem n AREBBI nneɣ, maḥend ad zzayes nettar ticři d tamimunt i neccin u i tarwa nneɣ imeẓyanen u i wagřa nneɣ,
22 maɣar ttsedḥiɣ ad ttareɣ ijj n řɛeskar zi ɣar ujeǧid maḥend ad aneɣ tɛawen deg webrid ḍidd i řeɛdu, minzi tuɣa nessawař deg ujeǧid, nenna: “Afus n AREBBI aqa-t d aṣebḥan x marra inni t yarezzun, maca jjehd nnes d weɣḍab nnes ad dd-asen x marra inni i xas ittaggʷejen.”
23 Iwa neccin nẓumm u nettar aya zi AREBBI nneɣ u netta istajeb aneɣ i tẓaǧit yuǧɣen nneɣ.
24 Xenni farzeɣ tenɛac n yeryazen zeg imeqqranen n ikehhanen: Carabya d Ḥacabya u akidsen ɛecra n aytmatsen.
25 Wezneɣ zzatsen nnuqart d wureɣ d řeqcuɛ, aqa aya d tawhibt n usgeɛɛed i Taddart n AREBBI nneɣ, tenni issgeɛɛed ujeǧid ak-d imcawaren nnes d řḥukkam nnes d marra inni din ittwafen zi Israil.
26 Wezneɣ u ggiɣ asen deg ifassen nsen setta-mya u-xemsin talint n nnuqart u mya n řeqcuɛ n nnuqart iweznen mya talint u mya talint n wureɣ
27 u ɛicrin n ifenjařen n wureɣ sekkʷan ařef draxmat uřa d tnayen n řeqcuɛ n nnḥas, icellel, icna, iɣřa am wureɣ.
28 Nniɣ asen: “Kenniw d imqeddasen zzat i SIDI u řeqcuɛ-a aqa qeddsen i ǧan, uřa d nnuqart-a d wureɣ-a, aqa aya d tawhibt s řxaḍar i SIDI, AREBBI n řejdud nwem.
29 Ɛessem u ḥḍam aya ař t ɣa tweznem zzat i wudem n imeqqranen n ikehhanen d Ilawiyyen d imeqqranen n řaǧat n ibabaten n Israil di Urcalim, deg ixxamen n Taddart n SIDI.”
30 Xenni ṭṭfen ikehhanen d Ilawiyyen řewzen n nnuqart d wureɣ d řeqcuɛ ḥima ad awyen aya marra ɣar Urcalim ɣar Taddart n AREBBI nneɣ.
31 Deg wass wiss tenɛac n uyur amezwaru nekkes iqiḍan nneɣ maḥend ad nuyur ɣar Urcalim. Tuɣa afus n AREBBI xaneɣ uca ifekk aneɣ zeg ufus n řeɛdu u zeg ufus n yinni i d aneɣ iggin řfex deg webrid.
32 Uca niweḍ ɣar Urcalim u neqqim dinni třata n wussan.
33 Deg wass wiss arebɛa ittwawzen nnuqart d wureɣ d řeqcuɛ di Taddart n AREBBI nneɣ uca newca aya i ukehhan Marimut, mmis n Uriya, uca Aliɛazar, mmis n Finḥas, tuɣa-t akides uřa d Yuzabad, mmis n Yecuɛa, d Nuɛadya, mmis n Bannuy, nitni s tnayen d Ilawiyyen.
34 D man aya imsar ɛlaḥsab řqedd d řewzen n marra aya u marra řewzen ittwawzen di řweqt nni d ijjen.
35 Ayt n lmenfa inni dd-iɛeqben zi tmeḥbast, ssgeɛɛden i AREBBI n Israil tiɣarṣa n wecmaḍ: tenɛac n ifunasen imeẓyanen i marra Israil, setta u-tesɛin n icarriyyen u sebɛa u-sebɛin n izmaren, u i tɣarṣt n ddenb tenɛac n imuyan, marra aya d taɣarṣt n wecmaḍ i SIDI.
36 Nitni wcin tiweṣṣa n ujeǧid i ijeǧiden i iǧan sadu ujeǧid u i lwulat di temmurt x ujemmaḍ n iɣzar n Lfuraṭ u nitni wcin afus i řgens u i tsexxart di Taddart n AREBBI.