٩١
١ ثْمِيجَّا ثَامزْوَارُوثْ:
ونِّي إِزدّْغنْ
ذڭْ ؤُذُورِّي ن ؤُمْعُودْجِي خْ كُوڒْشِي،
أَقَا نتَّا أَذْ إِسّنْسْ
ذِي ثِيڒِي ن ؤُمْزمَّارْ خْ كُوڒْشِي.
٢ ثْمِيجَّا وِيسّْ ثْنَاينْ:
أَذْ إِنِيغْ إِ سِيذِي:
شكْ ذ أَمْشَانْ إِنُو ن ثَاروْڒَا ذ لْبُورْجْ إِنُو،
أَربِّي إِنُو، ونِّي خْ تّشْڒغْ!
٣ ثْمِيجَّا ثَامزْوَارُوثْ:
مَاغَارْ نتَّا أَذْ شكْ إِفكّْ
زِي ڒْْفخْ ن إِنيْمَارنْ ن إِجْضَاضْ،
زِي طَّاعُونْ يَاردّْدْجنْ.
٤ س أَرِّيشْ نّسْ أَذْ شكْ إِذڒْ،
سَاذُو وَافْرِيونْ نّسْ أَذْ ثَافذْ أَذُورِّي.
ڒْْمَانثْ نّسْ ذ ثَاسدَّارْثْ ثَامقّْرَانْثْ
ذ أَرُّوضْ ن وُوزَّاڒْ.
٥ وَارْ ثتّڭّْوذذْ شَا
زڭْ ؤُنخْڒِيعْ ن دْجِيڒثْ،
زِي فْڒِيثْشَا ن ڒْْقوْسْ إِ ذِينْ إِطَّاونْ س وَاسّْ،
٦ ؤُڒَا زِي طَّاعُونْ إِ د-إِتّنّْضنْ ذِي ثَادْجسْثْ،
زِي لْهَالَاكْ إِ يَاردّْدْجنْ س ؤُزِيڒْ.
٧ وَاخَّا أَذْ وْضَانْ أَڒفْ غَارْ ؤُغزْذِيسْ نّشْ
ؤُعشْرَا أَڒفْ غَارْ أَفُوسْ أَفُوسِي نّشْ،
عَاذْ وَارْ شكْ د-إِتِّيكّْوِيضْ.
٨ أَذْ ثْوَاڒِيذْ أَيَا س ثِيطَّاوِينْ نّشْ وَاهَا،
أَذْ ثْژَارذْ مَامّشْ غَا إِتّْوَاخْڒفْ
زڭْ إِعفَّاننْ.
٩ ثْمِيجَّا وِيسّْ ثْنَاينْ:
مَاغَارْ خَاكْ:
’شكْ أَ سِيذِي، أَقَا شكْ
ذ أَمْشَانْ إِنُو ن ثَاروْڒَا!‘
ثْمِيجَّا ثَامزْوَارُوثْ
أَقَا شكْ ثڭِّيذْ أَمْعُودْجِي خْ كُوڒْشِي
ذ ثَازذِّيغْثْ إِ يِيخفْ نّشْ،
١٠ وَارْ ذَايكْ ثْنطّحْ ثُوعفّْنَا،
ؤُڒَا ذ إِشْثْ ن جّْرِيحشْثْ
وَارْ د-ثْقَارَّابْ شَا غَارْ ؤُقِيضُونْ نّشْ،
١١ مَاغَارْ نتَّا أَذْ خَاكْ يُومُورْ
لْمَالَاكَاثْ نّسْ،
مَاحنْذْ أَذْ شكْ حْضَانْثْ
ذِي مَارَّا إِبْرِيذنْ نّشْ.
١٢ أَذْ شكْ كْسِينْ خْ إِفَاسّنْ نْسنْثْ،
حِيمَا أَضَارْ نّشْ وَارْ إِنڭّحْ أَژْرُو.
١٣ أَذْ ثْعفْسذْ خْ ويْرَاذْ إِزهَّارنْ
ؤُ خْ ثْڒفْسَا،
أَذْ ثْعجْنذْ خْ ويْرَاذْ أَمژْيَانْ
ذ ڒْْهَايْشثْ ن ڒبْحَارْ.
١٤ ثْمِيجَّا وِيسّْ ثْڒَاثَا زِي أَربِّي:
ؤُمِي د-إِقّنْ نتَّا غَارِي،
نشّْ أَذْ ث سّْنجْمغْ.
نشّْ أَذْ ث سّْڭعّْذغْ،
مَاغَارْ نتَّا إِسّنْ إِسمْ إِنُو.
١٥ نتَّا أَذْ أَيِي إِڒَاغَا
ؤُ نشّْ أَذْ خَاسْ د-أَرّغْ.
ذِي ڒحْصَارثْ أَقَا أَيِي غَارسْ.
نشّْ أَذْ ث فكّغْ، أَذْ أَسْ سّْعُودْجغْ.
١٦ نشّْ أَذْ ث سّْجِّيوْنغْ
أَكْ-ذ ثُوزّڭَّارْثْ ن وُوسَّانْ،
نشّْ أَذْ أَسْ سّشْنغْ أَسنْجمْ إِنُو.