٩٢
١ أَزهِّيذْ. إِجّْ ن إِزْڒِي إِ وَاسّْ ن سّبْثْ.
٢ مَامّشْ إِصْبحْ
مَاحنْذْ أَذْ نْقَاذَا سِيذِي،
أَذْ نْزهّذْ إِ يِيسمْ نّشْ،
أَ أَمْعُودْجِي خْ كُوڒْشِي،
٣ مَاحنْذْ أَذْ نْبَارّحْ
س ثْمخْسِيوْثْ نّشْ إِشوَّارنْ
غَارْ ثُوفُّوثْ،
ڒَْامَانْ نّشْ ذِي دْجْيَاڒِي،
٤ ذِي لهَارْبَا سعشْرَا ن إِفِيڒَانْ ؤُ ذِي لهَارْبَا،
س ثِيرَارْثْ خْ إِفِيڒَانْ ن ڒْْڭَامْبْرِي.
٥ مَاغَارْ شكْ ثسّْفَارْحذْ أَيِي،
أَ سِيذِي، س ثْمڭَّا نّشْ،
نشّْ أَذْ سْڒِيوڒْوغْ
خْ ڒفْعَايڒْ ن إِفَاسّنْ نّشْ.
٦ مَامّشْ مْغَارنْثْ ثْمڭَّا نّشْ، أَ سِيذِي،
مَامّشْ ؤُدْجْغنْ إِخَارِّيصنْ نّشْ!
٧ إِجّْ ن ؤُقفُّوحْ وَارْ غَارسْ مِينْ غَا إِعَاوذْ،
إِجّْ ن ؤُبُوهَاڒِي وَارْ إِفهّمْ مَانْ أَيَا.
٨ مَاڒَا إِعفَّاننْغمّْينْ أَمْ أَرْبِيعْ،
ؤُ مَارَّا إِنِّي إِتّڭّنْ ڒْْمُوعْصِييّثْ
تّْنوَّارنْ،
أَقَا أَيَا أَذْ إِسِّيوضْ أَثحِّي نْسنْ
إِ ڒبْذَا قَاعْ.
٩ شكْ ذ أَمْعُودْجِي خْ كُوڒْشِي إِ ڒبْذَا، أَ سِيذِي!
١٠ مَاغَارْ خْزَارْ، ڒْْعذْيَانْ نّشْ، سِيذِي،
ڒْْعذْيَانْ نّشْ أَذْ فْنَانْ،
مَارَّا إِنِّي إِتّڭّنْ ڒْْغشّْ
أَذْ تّْوَازدْجْعنْ.
١١ شكْ أَذْ ثسّْڭعّْذذْ أَشَّاوْ إِنُو
أَمْ ونِّي ن إِغَايْضْ ن ڒخْڒَا
أَكْ-ذ وَاشَّاونْ ذ إِزِيرَارنْ،
تّْوَاذهْنغْ س زّشْثْ ن طْرِي.
١٢ ثِيطّْ إِنُو أَذْ ثْژَارْ إِنِّي خَافِي إِتّْشكّْمنْ،
إِمزُّوغنْ إِنُو أَذْ سْڒنْ إِ إِغْرِيمنْ إِنُو
إِنِّي خَافِي د-إِكَّارنْ.
١٣ أَمْسڭّذْ أَذْ إِنوَّارْ
أَمْ ثْشجَّارْثْ ن ثِينِي،
أَذْ إِغْمِي أَمْ ثْشجَّارْثْ ن ثنْڭلْثْ
خْ إِذُورَارْ ن لُوبْنَانْ،
١٤ إِنِّي إِتّْوَاژُّونْ ذِي ثَادَّارْثْ ن سِيذِي،
أَذْ نُّووَارنْ
ذِي ڒمْرَاحَاثْ ن أَربِّي نّغْ.
١٥ نِيثْنِي أَذْ وْشنْ ڒْْغِيدْجثْ ذِي ثوْسَارْ،
أَذْ قِّيمنْ صحّنْ ذ طْرِي.
١٦ مَاحنْذْ أَذْ بَارّْحنْ،
بلِّي سِيذِي أَقَا-ث نِيشَانْ.
نتَّا ذ ثَاصْضَارْثْ إِنُو
ؤُ وَارْ ذَايسْ بُو ڒْْغشّْ.