٩٠
أَذْلِيسْ وِيسّْ أَربْعَا: إِزهِّيذنْ 90-106
١ ثَاژَادْجِيثْ ن مُوسَا، أَرْيَازْ ن أَربِّي.
أَ سِيذِي إِنُو،
شكْ ثُوغَا ذ ثَازذِّيغْثْ نّغْ
زِي جِّيڒْ أَڒْ جِّيڒْ.
٢ قْبڒْ مَا أَذْ إِڒِينْ إِذُورَارْ،
قْبڒْ مَا أَذْ د-ثسُّوفّْغذْ
ثَامُّورْثْ ذ دُّونشْثْ،
وَاهْ أَقَا شكْ ذ أَربِّي
زِي ڒبْذَا أَڒْ ڒبْذَا.
٣ شكْ ثجِّيذْ بْنَاذمْ
أَذْ إِعْقبْ غَارْ ثْعجَّاجْثْ.
ثقَّارذْ:
”عقْبتِّيوْ-د ثَارْوَا ن بْنَاذمْ!“
٤ مَاغَارْ أَڒفْ ن إِسڭّْوُوسَا
ذِي ثِيطَّاوِينْ نّشْ
أَمْ وَاسّْ ن إِضنَّاضْ نِّي إِعْذُونْ،
ؤُڒَا أَمْ يِيشْثْ ن نُّوبثْ ن ثْعسَّاسْثْ ذِي دْجِيڒثْ.
٥ شكْ ثْفَارْضذْ ثنْ، أَقَا أَثنْ أَمْ يِيضصْ.
غَارْ ثُوفُّوثْ ڭِّينْ أَمْ أَرْبِيعْ إِيمَّانْ.
٦ غَارْ ثُوفُّوثْ إِتّْزيْزِيوْ أَرّْبِيعْ
ؤُشَا إِيمَّا،
غَارْ ثْمذِّيثْ إِتّْوَامْجَارْ، إِتَّاژغْ.
٧ مَاغَارْ نشِّينْ نفْنَا س وغْضَابْ نّشْ،
ننّخْڒعْ زڭْ وسْعَارْ نّشْ.
٨ شكْ ثڭِّيذْ ڒْْمُوعْصِييّثْ نّغْ
قِيبَاتْشْ نّشْ،
دّْنُوبْ نّغْ إِنُّوفَّارنْ
ذِي ثْفَاوْثْ ن وُوذمْ نّشْ.
٩ مَاغَارْ مَارَّا ؤُسَّانْ نّغْ أَذْ عْذُونْ
ذڭْ ؤُفُوڭمْ نّشْ إِسّڭّْوَاذنْ،
نسّعْذُو إِسڭّْوُوسَا نّغْ
أَمْ يِيجّْ ن ؤُسُوضِي.
١٠ ؤُسَّانْ ن ثُوذَارْثْ نّغْ
تّكّنْ سبْعِينْ ن إِسڭّْوُوسَا،
نِيغْ، مڒْمِي إِ غَا نِيڒِي نجْهذْ،
أَقَا ثْمَانْيِينْ ن إِسڭّْوُوسَا.
مِينْ ذَايسْ ذ أَعُودْجِي،
إِتَّارُو-د ثَامَارَا ذ ڒْْوحْرَانْ،
ذغْيَا ثتّكّْ ثْعدُّو ؤُ نطَّاوْ غَارْ ذِينْ.
١١ مَانْ ونْ إِسّْننْ
ڒْْقسْحَانْ ن وغْضَابْ نّشْ،
ؤُ مَانْ ونْ إِسّْننْ ثِيڭّْوُوذِي زَّايكْ
أَمْ د-إِتّْڒِيقْ
أَكْ-ذ أَذُوقّزْ نّشْ ن ؤُفُوڭمْ؟
١٢ سڒْمذْ أَنغْ أَذْ نْحسّبْ ؤُسَّانْ نّغْ،
حِيمَا أَذْ د-نَاوِي ؤُڒْ إِشُّورنْ س ثِيغِيثْ.
١٣ ذْوڒْ-د، أَ سِيذِي، أَڒْ مڒْمِي؟
حِينّْ خْ إِمْسخَّارنْ نّشْ.
١٤ سْجِّيونْ أَنغْ غَارْ ؤُثفُّو
س ثْمخْسِيوْثْ نّشْ إِشوَّارنْ،
خنِّي أَذْ نسْڒِيوْڒوْ،
أَذْ نْفَارْحْ مَارَّا ؤُسَّانْ نّغْ.
١٥ سْفَارْحْ أَنغْ أَنشْثْ ن وُوسَّانْ
إِ ذ أَنغْ ثحْصَارذْ،
أَنشْثْ ن إِسڭّْوُوسَا إِ ذِي نژْرَا ڒْْغَارْ.
١٦ سْشنْ ڒْْخذْمثْ نّشْ إِ إِمْسخَّارنْ نّشْ،
ڒْْعزّْ نّشْ خْ إِحنْجِيرنْ نْسنْ.
١٧ أَذْ خَانغْ ثهْوَا
ڒضْرَافثْ ن سِيذِي، أَربِّي نّغْ،
ضْمنْ شكْ ڒْْخذْمثْ ن إِفَاسّنْ نّغْ،
وَاهْ، ڒْْخذْمثْ ن إِفَاسّنْ نّغْ ضْمنْ إِ-ت.