٨٩
١ أَخمِّي ن إِثَانْ، أَزْرَاحِي.
٢ أَذْغنّْجغْ خْ ثْمڭَّا
ن ثْمخْسِيوْثْ إِشوَّارنْ ن سِيذِي إِ ڒبْذَا،
أَذْ بَارّْحغْ ڒَْامَانْ نّشْ
س ؤُقمُّومْ إِنُو زِي جِّيڒْ أَڒْ جِّيڒْ.
٣ مَاغَارْ نِّيغْ: ”ثَامخْسِيوْثْ إِشوَّارنْ
ثتّْوَابْنَا إِ ڒبْذَا،
أَقَا ثْضمْنذْ ڒَْامَانْ نّشْ
ذڭْ إِجنْوَانْ.“
٤ ”نشّْ ڭِّيغْ إِجّْ ن ڒْْعَاهْذْ
أَكْ-ذ ونِّي زَّايِي إِتّْوَافَارْزنْ،
جُّودْجغْ إِ ؤُمْسخَّارْ إِنُو ذَاوُوذْ:
٥ ’نشّْ أَذْ ضمْنغْ زَّارِيعثْ نّشْ إِ ڒبْذَا
ؤُ أَذْ بْنِيغْ ڒْْعَارْشْ نّشْ زِي جِّيڒْ أَڒْ جِّيڒْ.‘ “ سِيلَاهْ.
٦ إِجنْوَانْ تّْقَاذَانْ شكْ
خْ لْمُوعْجِيزَاث نّشْ، أَ سِيذِي،
ذڭْ وڭْرَاوْ ن إِمْقدَّاسنْ
تّْقَاذَانْ شكْ خْ ڒَْامَانْ نّشْ.
٧ مَاغَارْ مَانْ ونْ ذڭْ إِسيْنُوثنْ
إِزمَّارْ أَذْ إِتّْوَاقدّْ أَكْ-ذ سِيذِي،
مَانْ ونْ إِ إِدْجَانْ
جَارْ وَارَّاونْ ن إِربِّيثنْ
إِزمَّارْ أَذْ إِمْقُودَّا أَكْ-ذ سِيذِي؟
٨ أَربِّي إِوْعَارْ أَطَّاسْ
ذڭْ وڭْرَاوْ ن إِمْقدَّاسنْ،
مَارَّا إِنِّي ذ أَسْ د-إِنّْضنْ
تّڭّْوذنْ زَّايسْ.
٩ أَ سِيذِي، أَربِّي ن ڒْْعسْكَارَاثْ،
مَانْ ونْ غَارْ إِدْجَا ثِيزمَّارْ
أَمْ شكْ، أَ سِيذِي!
ڒَْامَانْ نّشْ إِتّنّضْ إِ شكْ.
١٠ شكْ ثْحكّْمذْ خْ نّْفَاخثْ ن ڒبْحَارْ.
خْمِي د-تّْنكَّارنْ ڒمْوَاجْ نّسْ،
أَقَا شكْ ثَارسِّيذْ إِ-ثنْ.
١١ أَقَا ثْڒبْزذْ رَاهَابْ
أَمْ يِيجّنْ ونِّي إِسّْنُوقّْبنْ،
ثْزدْجْعذْ ڒْْعذْيَانْ نّشْ
س ؤُغِيڒْ نّشْ إِجهْذنْ.
١٢ نّشْ ذ إِجنْوَانْ،
نّشْ ؤُڒَا ذ ثَامُّورْثْ.
دُّونِيثْ ذ ؤُعمَّارْ نّسْ
ثڭِّيذْ أَسنْ ذْسَاسْ.
١٣ شكْ ثْخڒْقذْ-د شَّامَالْ ذ لْجَانُوبْ،
ثابُورْ ذ هِيرْمُونْ سْڒِيوْڒِيونْ
س يِيسمْ نّشْ.
١٤ أَقَا غَاركْ أَغِيڒْ إِ ذِي ثڭِّيذْ ثَارْيَاسْثْ،
أَفُوسْ نّشْ إِجْهذْ،
أَفُوسْ أَفُوسِي نّشْ إِتّْوَاسّْڭعَّاذْ.
١٥ ثَاسڭْذَا ذ ڒْْحقّْ
أَقَا أَثنْ ذ ذْسَاسْ ن ڒْْعَارْشْ نّشْ،
ثَامخْسِيوْثْ إِشوَّارنْ ذ ڒَْامَانْ
إِتِّيزْوَارنْ زَّاثْ إِ وُوذمْ نّشْ.
١٦ سّعْذْ ن ڒْْڭنْسْ إِ إِسّْننْ أَذْ ميّْزنْ
أَسُوضِي س وسْرُودّحْ ن ڒْْبُوقْ، أَ سِيذِي،
نِيثْنِي أَذْ ؤُيُورنْ ذِي ثْفَاوْثْ ن وُوذمْ نّشْ.
١٧ نِيثْنِي أَذْ فَارْحنْ أَسّْ مَارَّا
س يِيسمْ نّشْ
ؤُشَا أَذْ د-تّْوَاسّْڭعّْذنْ
س ثْسڭْذَا نّشْ،
١٨ مَاغَارْ شكْ ذ ڒمْڒَاحثْ ن جّهْذْ نْسنْ،
إِشّْ نّغْ أَذْ إِتّْوَاسّْڭعّذْ
س ڒْْخَاضَارْ نّشْ.
١٩ ثَاسدَّارْثْ نّغْ ن ؤُسڒْقِي ن سِيذِي،
أَجدْجِيذْ نّغْ أَقَا-ث ن ؤُمْقدَّاسْ ن إِسْرَائِيل.
٢٠ إِشْثْ ن ثْوَاڒَا ثُوغَا ثسِّيوْڒذْ ذِي ڒوْحِييْ
خْ ؤُمْثِيقِّي نّشْ، ثنِّيذْ:
”س ؤُفُوسْ ن إِجّْ ن بُو-ثغْرُوضْثْ ڭِّيغْ ثْوِيزَا،
إِجّْ ونِّي إِتّْوَافَارْزنْ زِي ڒْْڭنْسْ
سّْڭعّْذغْ-ث.
٢١ نشّْ ؤُفِيغْ ذَاوُوذْ، أَمْسخَّارْ إِنُو،
ذهْنغْ ث س زّشْثْ إِقدّْسنْ،
٢٢ مَاحنْذْ أَفُوسْ إِنُو أَذْ يِيڒِي إِمْثنْ أَكِيذسْ،
وَاهْ أَغِيڒْ إِنُو أَذْ ث إِسّمْحذْ.
٢٣ ڒعْذُو وَارْ ث إِسَّاڭّْوَاذْ،
مِّيسْ ن ڒْْمُوعْصِييّثْ وَارْ ث إِحصَّارْ.
٢٤ إِنِّي ث إِحصَّارنْ أَذْ ثنْ ڒبْزغْ
زَّاثْ إِ وُوذمْ نّسْ،
إِنِّي ث إِشَارّْهنْ أَذْ ثنْ وْثغْ.
٢٥ ڒَْامَانْ إِنُو ذ ثْمخْسِيوْثْ إِنُو إِشوَّارنْ،
أَقَا أَثنْ أَكِيذسْ إِ غَا يِيڒِينْ،
أَذْ إِتّْوَاسّْڭعّذْ يِيشّْ نّسْ س يِيسمْ إِنُو.
٢٦ أَذْ سَّارْسغْ أَفُوسْ نّسْ خْ ڒبْحَارْ،
أَفُوسْ نّسْ أَفُوسِي خْ إِغزْرَانْ.
٢٧ نتَّا أَذْ خَافِي د-إِڒَاغَا:
’أَقَا شكْ ذ بَابَا إِنُو، أَربِّي إِنُو،
ذ ثَاصْضَارْثْ ن ؤُسنْجمْ إِنُو!‘
٢٨ نشّْ أَذْ ث ڭّغْ ذ أَمنْزُو إِنُو،
أَمْعُودْجِي خْ إِجدْجِيذنْ ن ثمُّورْثْ.
٢٩ إِ ڒبْذَا أَذْ حْضِيغْ
ثَامخْسِيوْثْ إِنُو إِشوَّارنْ زَّاثسْ،
ؤُ ڒْْعَاهْذْ إِنُو أَذْ غَارسْ إِقِّيمْ س ڒْْمَانثْ.
٣٠ أَذْ ژُّوغْ زَّارِيعثْ نّسْ إِ ڒبْذَا،
ڒْْعَارْشْ نّسْ مِينْ غَا كّنْ
ؤُسَّانْ ن ؤُجنَّا دْجَانْ.
٣١ مَاڒَا إِحنْجِيرنْ نّسْ حيّْذنْ
خْ شَّارِيعَا إِنُو،
وَارْ ڭُّورنْ أَكْ-ذ لْفَارَايِيضْ إِنُو،
٣٢ مَاڒَا سّْفسْذنْ ثِيوصَّا إِنُو،
وَارْ حطِّينْ ڒُْومُورَاثْ إِنُو،
٣٣ خنِّي أَذْ خدْجْصغْ
أَعدُّو نْسنْ س وعْمُوذْ،
ڒْْمُوعْصِييّثْ نْسنْ س ثيِّيثَا.
٣٤ مَاشَا وَارْ خَاسنْ تّكّْسغْ
ثَامخْسِيوْثْ إِنُو إِشوَّارنْ،
وَارْ نكَّارغْ ڒْْمَانثْ إِنُو.
٣٥ وَارْ تّْغصَّابغْ ڒْْعَاهْذْ إِنُو،
مِينْ د-إِفّْغنْ زڭْ إِينْشِيشنْ إِنُو،
وَارْ ث تّْبذِّيڒغْ.
٣٦ نشّْ جُّودْجغْ إِشْثْ ن ثْوَاڒَا
غَارْ ثْقدَّاسْثْ إِنُو:
‘وَارْ سّْخَارِّيقغْعمَّارْصْ خْ ذَاوُوذْ!‘
٣٧ زَّارِيعثْ نّسْ أَذْ ثقِّيمْ إِ ڒبْذَا،
ؤُ ڒْْعَارْشْ نّسْ أَذْ ذِينْ إِبدّْ زَّاثِي
أَمْ ثْفُوشْثْ.
٣٨ نتَّا أَذْ إِقِّيمْ إِبدّْ إِ ڒبْذَا أَمْ ثْزِيرِي
ؤُ أَشهَّاذْ ذڭْ إِسيْنُوثنْ
أَقَا-ث ذ أَمْثِيقِّي.“ سِيلَاهْ.
٣٩ مَاشَا شكْ ثْعَارّْنذْ ث غَارْ ؤُغزْذِيسْ،
ثنْضَارذْ ث،
شكْ ثْفُوڭّْمذْ خْ ؤُمذْهُونْ نّشْ.
٤٠ شكْ ثنْضَارذْ ڒْْعَاهْذْ
أَكْ-ذ ؤُمْسخَّارْ نّشْ،
ثْفسْذذْ تَّاجْ ن وعْزَاڒْ نّسْ
س ؤُبدْجَاعْ ن ثمُّورْثْ.
٤١ ثْغضْڒذْ مَارَّا ڒحْيُوذْ نّسْ،
ثْهذْمذْ ثِيندَّامْ نْسنْ إِفَارْينْ.
٤٢ مَارَّا إِنِّي د-إِكِّينْ أَبْرِيذْ كشّْضنْ ث،
نتَّا إِذْوڒْ ذ أَسحْقَارْ إِ جِّيرَانْ نّسْ.
٤٣ شكْ ثسّْڭعّْذذْ أَفُوسْ أَفُوسِي
ن يِينِّي ث إِحصَّارنْ،
ثسّْفَارّْحذْ مَارَّا ڒْْعذْيَانْ نّسْ.
٤٤ شكْ ثسّنْقڒْبذْ ڒقْضعْ ن سِّيفْ نّسْ،
شكْ ثجِّيذْ ث وَارْ إِتّْغِيمِي إِبدّْ ذڭْ ؤُمنْغِي.
٤٥ شكْ ثسّْبدّذْ أَژْرِي نّسْ،
ڒْْكُورْسِي نّسْ إِڭلّْذنْ
ثنْضَارذْ ث غَارْ ثمُّورْثْ.
٤٦ شكْ ثسّمْژِيذْ أَسْ ؤُسَّانْ ن ثمْژِي نّسْ،
ثذْڒِيذْ ث س ڒفْضِيحثْ. سِيلَاهْ.
٤٧ أَڒْ مڒْمِي عَاذْ، أَ سِيذِي،
أَذْ ثسّْنُوفَّارذْ إِخفْ نّشْ بْڒَا قطُّو،
أَذْ يَارْغْ وسْعَارْ نّشْ أَمْ ثْمسِّي؟
٤٨ عْقڒْ خْ ڒْْمِيجَاڒْ ن ثُوذَارْثْ إِنُو!
مَايمِّي د-ثْخڒْقذْ
مَارَّا أَرَّاوْ ن بْنَاذمْ أَمنِّي بَاطڒْ؟
٤٩ مَانْ أَرْيَازْ إِجهْذنْ وَارْ إِتّْوِيڒِي ڒْْموْثْ،
مَانْ أَرْيَازْ إِ غَا إِفكّنْ ڒعْمَارْ نّسْ
زڭْ ؤُفُوسْ ن ڒَْاخَارْثْ؟ سِيلَاهْ.
٥٠ أَ سِيذِي إِنُو، مَانِي دْجَانْثْ
ثْمڭَّا ن ثْمخْسِيوْثْ نّشْ ن زِيشْ،
ثِينِّي خْ ثُوغَا ثجِّيدْجذْ إِ ذَاوُوذْ
س ڒْْمَانثْ نّشْ؟
٥١ أَ سِيذِي إِنُو، عْقڒْ
خْ ؤُسحْقَارْ ن إِمْسخَّارنْ نّشْ،
نِّي أَربُّوغْ ذڭْ وحْسِينْ إِنُو
زڭْ ؤُبَارُّو ن مَارَّا ڒڭْنُوسْ،
٥٢ إِ زِي ذ أَيِي سّحْقَارَانْ
ڒْْعذْيَانْ نّشْ، أَ سِيذِي،
إِ زِي سّحْقَارَانْ إِصُورَافْ ن ؤُمذْهُونْ نّشْ.
٥٣ أَذْ إِتّْوَابَاركْ سِيذِي إِ ڒبْذَا قَاعْ!
أَمِينْ، وَاهْ، أَمِينْ!