٨٨
١ إِزْڒِي، أَزهّذْ ن أَيْثْ ن قُورَاحْ.
إِ ؤُمقّْرَانْ ن إِمغْنَاجنْ، س ثغْنِينْثْ ن ’إِزْڒِي ن وشْضَانْ‘ غَارْ ڒحْصَارَاثْ.
أَخمِّي ن هَايْمَانْ، أَزْرَاحِي.
٢ أَ سِيذِي، أَربِّي ن ؤُسنْجمْ إِنُو،
ذڭْ وَاسّْ إِ ذِي د غَا سْغُويغْ غَاركْ
س دْجِيڒثْ،
٣ أجّْ خنِّي أَذْ د-ثَاسْ ثْژَادْجِيثْ إِنُو زَّاثكْ،
أوْشْ أَمزُّوغْ نّشْ إِ ؤُڒَاغِي إِنُو.
٤ مَاغَارْ ڒعْمَارْ إِنُو إِجِّيونْ س ڒْْمُوصِيبَاثْ،
ثُوذَارْثْ إِنُو ثُوذسْ-د ڒَْاخَارْثْ.
٥ نشّْ تّْوَاحسَّابغْ أَمْ يِينِّي د-إِهكّْوَانْ
ذڭْ وحْفُورْ ن ونْضڒْ،
أَمْ إِجّْ ن ورْيَازْ
ؤُمِي وَارْ ذَايسْ جّْهذْ عَاذْ.
٦ أَقَا تّْوَاحُوزغْ جَارْ إِمتَّانْ،
أَمْ يِينِّي إِتّْوَانْغنْ
إِنِّي إِزّْڒنْ ذڭْ ونْضڒْ،
إِنِّي وَارْ ثنْ ثتِّيذَارذْ عَاذْ،
تّْوَاقضْعنْ نِيثْنِي زڭْ ؤُفُوسْ نّشْ.
٧ شكْ ثڭِّيذْ أَيِي
ذڭْ ونْضڒْ يُودْجْغنْ قَاعْ،
ذِي ثَادْجسْثْ، ذِي ڒَْادْجَاغْ.
٨ أَسْعَارْ نّشْ إِذْقڒْ خَافِي أَطَّاسْ،
س مَارَّا ڒمْوَاجْ ن وسْعَارْ نّشْ
ثسّْذدْجذْ أَيِي. سِيلَاهْ.
٩ إِمْقَارَّابنْ إِنُو
ثسِّيڭّْوجذْ إِ-ثنْ خَافِي،
ثَارِّيذْ أَيِي ذ نّْعِي إِ نِيثْنِي.
إِتّْوَابلّعْ خَافِي،
وَارْ زمَّارغْ أَذْ د-فّْغغْ.
١٠ ثِيطّْ إِنُو ثعْمشْ س ڒغْبنْ.
أَ سِيذِي، أَسّْ مَارَّا تّْڒَاغِيغْ غَاركْ،
نشّْ سّْوِيژّْضغْ إِفَاسّنْ إِنُو غَاركْ.
١١ مَا أَذْ ثڭّذْ إِشْثْ ن لْمُوعْجِيزَا
ذڭْ إِمتَّانْ؟
نِيغْ أَذْ د-كَّارنْ ڒخْيَاڒَاثْ ن إِمتَّانْ،
مَا أَذْ شكْ قَاذَانْ؟ سِيلَاهْ.
١٢ مَا أَذْ بَارّْحنْ
س ثْمخْسِيوْثْ نّشْ إِشوَّارنْ
ذڭْ ونْضڒْ، س ڒَْامَانْ نّشْ
ذِي ثسْرَافْثْ ن ؤُهلّكْ؟
١٣ مَا أَذْ تّْوَاسّْننْثْ لْمُوعْجِيزَاثْ نّشْ
ذِي ثَادْجسْثْ،
ثَاسڭْذَا نّشْ ذِي ثمُّورْثْ ن ثَاتُّوثْ؟
١٤ أَ سِيذِي، نشّْ تّْڒَاغِيغْ شكْ،
ثَاژَادْجِيثْ إِنُو ثتَّاسْ-د زَّاثكْ غَارْ ؤُثفُّو.
١٥ مَايمِّي، أَ سِيذِي،
ثْنطَّارذْ ڒعْمَارْ إِنُو،
مَايمِّي ثسّْنُوفَّارذْ
ؤُذمْ نّشْ زَّايِي؟
١٦ زِي ثمْژِي إِنُو نشّْ ذِي ڒغْبنْ
ؤُ ڭُّورغْ غَارْ ؤُنُورِي،
كْسِيغْ إِسْنخْرِيعنْ نّشْ ضِيدّْ إِنُو،
تّْوَاحْصَارغْ زَّايْسنْ.
١٧ ثتّكّْ خَافِي ڒْْحَاذُوقْ ن وغْضَابْ نّشْ،
إِتّحَّا أَيِي ؤُسڭّْوِيذْ نّشْ.
١٨ أَسّْ مَارَّا إِتّنّضْ أَيِي-د أَمْ وَامَانْ،
إِتّْقُووَّارْ أَيِي-د مَارَّا.
١٩ أَمْعِيزّْ إِنُو ذ ؤُمدُّوكّڒْ إِنُو
ثسِّيڭّْوجذْ إِ-ثنْ خَافِي،
إِنِّي ذ أَيِي إِسّْننْ إِنُو
أَقَا أَثنْ تّْوَاڒحّْفنْ س ثَادْجسْثْ.