٧٣
أَذْلِيسْ وِيسّْ ثْڒَاثَا: إِزهِّيذنْ 73-89
١ أَزهّذْ ن أَسَافْ.
وَاهْ، أَربِّي ذ أَصبْحَانْ إِ إِسْرَائِيل،
إِ يِينِّي س وُوڒْ إِصْفَانْ.
٢ نشّْ مَاشَا، عْڒَاحَاڒْ ثُوغَا إِضَارنْ إِنُو
فّْغنْ زڭْ وبْرِيذْ،
وَارْ إِقِّيمْ وَالُو أَذْ حْڒُودْجْضنْ إِصُورَافْ إِنُو.
٣ مَاغَارْ ثُوغَا ؤُسْمغْ زڭْ إِبُوهَاڒِييّنْ،
ڒَْامِي ژْرِيغْ أَقَا إِعفَّاننْ مْلِيحْ إِ دْجَانْ.
٤ مَاغَارْ وَارْ ذِينْ بُو إِسغْوَانْ
غَارْ ڒْْموْثْ نْسنْ،
صُّولْطَا نْسنْ أَقَا إِبدّْ نِيشَانْ.
٥ نِيثْنِي وَارْ شَارّْشنْ ذِي ثَامَارَا ن إِوْذَانْ،
وَارْ تّْوَاڒقّْفنْ س ڒْْمُوصِيبَاثْ
أَمْ وزْينْ نّغْنِي ن بْنَاذمْ.
٦ س ؤُيَا ثتَّايڒْ أَسنْ-د نّْفَاخثْ
أَمْ ثْسدّشْثْ غَارْ يِيرِي نْسنْ
ؤُشَا إِڒحّفْ أَسنْ لْعُونْفْ
أَمْ يِيجّْ ن وَارُّوضْ.
٧ ثِيطَّاوِينْ نْسنْ تّْوَافّْغنْثْ زِي ثَاذُونْثْ،
نِيثْنِيعدُّونْ ڒخْيَاڒَاثْ ن وُوڒْ نْسنْ.
٨ نِيثْنِي سْثهْزَانْ س بْطَايْطَايْ
سَّاوَاڒنْ خْ ڒْْغَارْ، خْ دّدْجْ،
أَقَا سَّاوَاڒنْ زِي سنّجْ.
٩ نِيثْنِي أَرزّْمنْ ؤُقمُّومْ نْسنْ
خْ ؤُجنَّا،
ڒْْهَارْذْ نْسنْ إِڭُّورْ خْ ثمُّورْثْ.
١٠ س ؤُيَا إِنّقْڒبْ
دَّابْ نْسنْ ن ڒْْڭنْسْ غَارْ ذَا،
أَمَانْ إِفيّْضنْ تّْسكَّافنْ ثنْ نِيثْنِي.
١١ قَّارنْ:
”مَامّشْ إِ غَا إِسّنْ أَربِّي؟“
”مَامّشْ إِ غَا إِڭّْ ؤُمْعُودْجِي خْ كُوڒْشِي
أَذْ إِسّنْ؟“
١٢ خْزَارْ، أَقَا أَثنْ ذ إِعفَّاننْ!
عَاذْ دَّارنْ ڒبْذَا ذِي ڒْْهُوذْنثْ،
سّوْسِيعنْ أَڭْڒَا نْسنْ.
١٣ س ثِيذتّْ، أَمنِّي وَاهَا
سِّيزذْڭغْ ؤُڒْ إِنُو
ؤُ سِّيرْذغْ إِفَاسّنْ إِنُو ذِي ثَازْذُوڭِي.
١٤ أَسّْ أَمْ إِمُونْ نشّْ ثِييِّيثَا ذَايِي،
كُوڒْ صّْبحْ ثتّْوَاربِّيغْ.
١٥ مَاڒَا نِّيغْ: ”ؤُڒَا ذ نشّْ أَذْ سِّيوْڒغْ أَمُّو!“،
خْزَارْ، إِڒِي غْذَارغْ
جِّيڒْ ن إِحنْجِيرنْ نّشْ.
١٦ إِتّْڒِيغْ أَيِي زمَّارغْ أَذْ فهْمغْ أَيَا،
مَاشَا ذِي ثِيطَّاوِينْ إِنُو
إِتَّاوِي-د مْغِيرْ ثَامَارَا إِبطّْڒنْ،
١٧ أَڒَامِي ؤُذْفغْ
غَارْ ثْزَاوِييِّينْ إِقدّْسنْ ن أَربِّي،
ؤُشَا حكَّارغْ إِ ثْنڭَّارُوثْ نْسنْ.
١٨ وَاهْ، شكْ ثسّْرُوسِيذْ ثنْ
خْ إِمُوشَانْ إِتّحْرُودْجُوضنْ،
شكْ ثْغطّْڒذْ ثنْ ذ ڒْْخِيرْبَاثْ.
١٩ مَامّشْ ذوْڒنْ
ذ إِشْثْ ن ڒْْقشْعثْ ن ؤُنخْڒِيعْ
ذڭْ إِشْثْ ن ثشْثِي،
تّْوَامْحَانْ ؤُ تّْوَاقْضَانْ
س إِشڒْوَاونْ إِسَّاڭّْوَاذنْ.
٢٠ أَمْ ثَارْجِيثْ غَارْ ؤُفَاقِي، أَ سِيذِي إِنُو،
أَمُّو إِ غَا ثسّحْقَارذْ
أَبيّنْ ن ڒخْيَاڒْ نْسنْ
خْمِي د غَا ثْفَاقذْ.
٢١ ڒَْامِي إِتّْوَاسَّارْزڭْ ؤُڒْ إِنُو
ذِي ڒْوقْثْ نِّي،
إِتّجِّي أَيِي ڒحْرِيقْ ذِي ثِيژَّاڒْ إِنُو.
٢٢ نشّْ ثُوغَا أَيِي ذ أَقفُّوحْ،
ثُوغَا أَيِي غَاركْ أَمْ يِيجّْ ن ڒْْوحْشْ
بْڒَا ڒعْقڒْ.
٢٣ عَاذْ مَاشَا ڒبْذَا أَقَا أَيِي غَاركْ،
شكْ ثطّْفذْ أَيِي زڭْ ؤُفُوسْ أَفُوسِي إِنُو.
٢٤ شكْ أَذْ أَيِي ثْڭوّْذذْ س شّْوَارْ نّشْ
ؤُ أَوَارْنِي مَانْ أَيَا
أَذْ أَيِي ثكْسِيذْ غَارْ ؤُعُودْجِي نّشْ.
٢٥ مَانْ ونْ إِ غَارِي ذڭْ ؤُجنَّا
حَاشَا شكْ؟
أَكِيذكْ وَارْ ثْزمَّارْ أَذْ أَيِي ثَارْضَا
ؤُڒَا ذ إِشْثْ ن ثْمسْڒَاشْثْ ذِي ثمُّورْثْ.
٢٦ مَاڒَا أَرِّيمثْ ذ وُوڒْ إِنُو
سمّْحنْ ذَايِي،
خنِّي أَربِّي ذ ثَاصْضَارْثْ ن وُوڒْ إِنُو
ذ ثَاسْغَارْثْ إِنُو إِ ڒبْذَا.
٢٧ مَاغَارْ خْزَارْ،
إِنِّي زَّايكْ إِتّڭّْوجنْ أَذْ فْنَانْ.
شكْ أَذْ ثْكحّضذْ كُوڒْ إِجّْ
ونِّي خَاكْ إِتّْحيَّاذنْ
ؤُمِي إِ غَا إِسّفْسذْ إِخفْ نّسْ،
٢٨ نشّْ مَاشَا، ڒْْذَاسثْ إِ أَربِّي ذ مْلِيحْ إِ نشّْ.
نشّْ ڭِّيغْ سِيذِي إِنُو، سِيذِي،
ذ أَمْشَانْ إِنُو ن ثَاروْڒَا،
حِيمَا أَذْ بَارّْحغْ مَارَّا ثِيمڭَّا نّشْ.