٧٤
١ أَخمِّي ن أَسَافْ.
مَايمِّي، أَ أَربِّي، ثنْضَارذْ إِ ڒبْذَا؟
مَايمِّي غَا يَارْغْ وغْضَابْ نّشْ
خْ وُودْجِي ن دّْمَانِي ن ثَاروْسَا نّشْ؟
٢ خمّمْ ذِي ثْمسْمُونْثْ نّشْ
نِّي ثُوغَا ثْكسْبذْ زڭْ وشْحَاڒْ ؤُيَا،
ثَاقْبِيتْشْ ن ثسْغَارْثْ ن ڒْْوَارْثْ نّشْ ثنِّي ثفْذِيذْ،
أَذْرَارْ ن صِيهْيُونْ ونِّي خْ ثُوغَا ثْزدّْغذْ.
٣ سْڭعّذْ إِصُورَافْ نّشْ
غَارْ مِينْ يَاردّْدْجنْ إِ ڒبْذَا.
ڒعْذُو يَارَّا مَارَّا ذ ڒْْخَارْبثْ
ذِي زَّاوشْثْ إِقدّْسنْ.
٤ إِنِّي ثُوغَا شكْ إِحصَّارنْ سّْبُوعْرُوثنْ
ذِي ڒْوسْثْ ن ومْشَانْ نّشْ ن ؤُمْسَاڭَارْ،
سّْبدَّانْ ڒعْڒَامَاثْ نْسنْ ذ ڒعْڒَامَاثْ.
٥ أَقَا نتَّا إِذْوڒْ إِتّْوَاسّنْ أَمْ يِيجّنْ
إِسّْڭعَّاذْ شّْوَاقَارْ ذِي شْبَارْقْ إِقّْننْ،
٦ ؤُ خنِّي أَرْژِينْ
مَارَّا إِنْقَاشنْ نّسْ جْمِيعْ،
س شَّاقُورْ ذ إِفْضِيسنْ.
٧ نِيثْنِي قّذنْ ثِيمسِّي
إِ ثْزَاوِييِّينْ نّشْ إِقدّْسنْ،
أَقَا عَارَّانْ ثَازذِّيغْثْ ن يِيسمْ نّشْ
أَڒْ ثَامُّورْثْ.
٨ نِيثْنِي نَّانْ ذڭْ وُوڒْ نْسنْ:
”أجّْ أَنغْ أَذْ ثنْثْ نَاردّدْجْ مَارَّا!“
أَمُّو إِ سَّارْغنْ نِيثْنِي
مَارَّا إِمُوشَانْ ن ؤُمْسَاڭَارْ ن أَربِّي
ذِي ثمُّورْثْ.
٩ ڒعْڒَامَاثْ نّغْ وَارْ ثنْثْ نتّْوِيڒِي عَاذْ،
وَارْ ذِينْ ؤُڒَا ذ إِجّْ ن ؤُنَابِي عَاذْ،
ؤُشَا ؤُڒَا ذ إِجّْ جَارْ أَنغْ إِسّنْ
أَڒْ مڒْمِي عَاذْ.
١٠ أَڒْ مڒْمِي، أَ أَربِّي،
أَذْ زَّايكْ إِسْثهْزَا ونِّي إِحصَّارنْ؟
مَا أَذْ إِشقّفْ ڒعْذُو إِ ڒبْذَا
ذڭْ يِيسمْ نّشْ؟
١١ مَايمِّي إِ ثتّڭّذْ
أَذْ ذَايْنغْ إِسْمحْ أَفُوسْ نّشْ،
أَفُوسْ نّشْ أَفُوسِي؟
سُوفُّوغْ إِ-ث زڭْ وحْسِينْ
ن ؤُپَارْثسُّو نّشْ،
قْضَا خَاسنْ.
١٢ زڭْ وشْحَاڒْ ؤُيَا
أَقَا أَربِّي ذ أَجدْجِيذْ إِنُو.
نتَّا ذ ونِّي إِ د-إِتَّاوْينْ
إِسنْجَامنْ ذِي ڒْوسْثْ ن ثمُّورْثْ.
١٣ س ثْزمَّارْ نّشْ ثْفثْقذْ ڒبْحَارْ،
إِزدْجِيفنْ ن ڒْْهَايْشَاثْ
ثدّْزذْ إِ-ثنْ خْ وَامَانْ.
١٤ شكْ ثْڒبْزذْ إِزدْجِيفنْ ن ’لِيبِييَاثَانْ‘،
ثوْشِيذْ إِ-ث ذ مَاشَّا إِ ڒوْحُوشْ ن ڒخْڒَا.
١٥ شكْ ثْفدْجْقذْ ڒْْعُونْصَارْ ذ ثغْزَارْثْ،
شكْ ثسِّيژْغذْ إِغزْرَانْ إِتَّازّْڒنْ
بْڒَا قطُّو.
١٦ أَسّْ نّشْ، نّشْ ؤُڒَا ذ دْجِيڒثْ،
شكْ ثڭِّيذْ ذِينْ ثَافَاوْثْ ذ ثْفُوشْثْ.
١٧ شكْ ثسّْمثْنذْ
مَارَّا إِيْمِيرنْ ن ثمُّورْثْ،
أَنبْذُو ذ ثْڭرْسْثْ
أَقَا ثڭِّيذْ أَسنْ ثِيفْرَاسْ نْسنْ.
١٨ عْقڒْ خْ مَانْ أَيَا:
ڒعْذُو إِسّحْقَارْ سِيذِي،
إِجّْ ن ڒْْڭنْسْ أَبُوهَاڒِي إِشقّفْ
ذڭْ يِيسمْ نّشْ.
١٩ وَارْ تِّيشْ ڒعْمَارْ ن ثجْلِيلّحْثْ نّشْ
إِ ڒوْحُوشْ،
وَارْ ثتُّو إِ ڒبْذَا
ثُوذَارْثْ ن ڒْْمُوسَاكِينْ نّشْ.
٢٠ خْزَارْ غَارْ ڒْْعَاهْذْ،
مَاغَارْ ذڭْ إِمُوشَانْ ن طّْڒَامْ ذِي ثمُّورْثْ
أَقَا ذَايْسنْ ثُوذْرِينْعمَّارنْثْ س لْعُونْفْ.
٢١ وَارْ تّجِّي ونِّي إِتّْوَاحصَّارنْ
أَذْ د-إِعْقبْ س ؤُسضْحِي،
أجّْ ڒْْمسْكِينْ ذ ؤُمزْڒَاضْ
أَذْ صبّْحنْ إِسمْ نّشْ.
٢٢ كَّارْ بدّْ، أَ أَربِّي،
بلّعْ دّعْوثْ نّشْ،
خمّْ مَامّشْ شكْ إِسّحْقَارَانْ
إِبُوهَاڒِييّنْ أَسّْ إِمُونْ.
٢٣ وَارْ تّتُّو شَا أَغُويِّي ن إِغْرِيمنْ نّشْ،
أَسْبُوعَارْ ن يِينِّي إِ خَاكْ إِغوّْغنْ
إِتّْڭعَّاذْ غَارْ ؤُجنَّا بْڒَا أَقطُّو.