٧٢
١ ن سُولِيمَانْ.
 
أَ أَربِّي، أوْشْ إِ ؤُجدْجِيذْ
مَاحنْذْ أَذْ إِحْكمْ عْلَاحْسَابْ ڒْْحقّْ نّشْ،
ؤُ أوْشْ ثَاسڭْذَا نّشْ إِ مِّيسْ ن ؤُجدْجِيذْ.
٢ خنِّي نتَّا أَذْ إِحَاكمْ
ڒْْڭنْسْ نّشْ س ثْسڭْذَا،
ڒْْمُوسَاكِينْ نّشْ س ڒْْحقّْ.
٣ إِذُورَارْ أَذْ إِوْينْ ڒهْنَا إِ ڒْڭنْسْ،
ؤُڒَا ذ ثِيوْرِيرِينْ ثَاسڭْذَا.
٤ نتَّا أَذْ يَاغْ ثسْغَارْثْ
ن ڒْْمُوسَاكِينْ ن ڒْْڭنْسْ،
أَذْ إِسّنْجمْ ثَارْوَا ن إِمزْڒَاضْ،
ؤُشَا أَذْ إِڒْبزْ ونِّي ثنْ إِحصَّارنْ.
 
٥ نِيثْنِي أَذْ زَّايكْ ڭّْوذنْ
مِينْ غَا ثكّْ ثْفُوشْثْ ثدْجَا،
ؤُ ثَازِيرِي أَذْ ثسّْشنْ ؤُذمْ نّسْ،
زِي جِّيڒْ أَڒْ جِّيڒْ.
٦ نتَّا أَذْ د-إِهْوَا خْ إِيَّارْ
أَوَارْنِي إِ وحْثَاشْ،
أَمْ ثِينشْنَاشِينْ إِ إِسَّارْضَابنْ ثَامُّورْثْ.
٧ ذڭْ وُوسَّانْ نّسْ
أَذْ إِنُّووَارْ ؤُمْسڭّذْ،
أَذْ ذِينْ يِيڒِي ڒهْنَا إِفيّْضنْ
أَڒْ غَا ثَافذْ ثَازِيرِي وَارْ ثدْجِي عَاذْ.
٨ نتَّا أَذْ إِحْكمْ زِي ڒبْحَارْ أَڒْ ڒبْحَارْ،
زڭْ إِغْزَارْ ن لْفُورَاطْ
أَڒْ ثِينڭُّورَا ن ثمُّورْثْ.
 
٩ إِمزْذَاغْ نْ ڒخْڒَا
أَذْ قُّونْجڒنْ زَّاثسْ،
مَاشَا ڒْْعذْيَانْ نّسْ أَذْ ڒسْحنْ ؤُشَاڒْ.
١٠ إِجدْجِيذنْ ن ثَارْشِيشْ
أَذْ د-إِوْينْ إِشْثْ ن ثوْهِيبْثْ،
إِجدْجِيذنْ ن شَابَا ذ سبَا
أَذْ د-قَارّْبنْ ثَارْزفِينْ.
١١ مَارَّا إِجدْجِيذنْ أَذْ أَسْ أَضَارنْ،
مَارَّا ڒڭْنُوسْ أَذْ أَسْعبْذنْ.
 
١٢ مَاغَارْ نتَّا أَذْ إِفكّْ أَمزْڒُوضْ،
ونِّي غَارسْ إِتّْڒَاغَانْ،
ؤُڒَا ذ ڒْْمسْكِينْ
ذ ونِّي وَارْ غَارسْ أَمْعَاونْ.
١٣ نتَّا أَذْ إِعْثقْ أَمَارْخُو ذ ؤُمزْڒُوضْ،
نتَّا أَذْ إِسّنْجمْ ڒعْمَارْ ن إِمزْڒَاضْ.
١٤ نتَّا أَذْ إِفكّْ ڒعْمَارْ نْسنْ
زِي دّدْجْ ذ لْعُونْفْ،
إِذَامّنْ نْسنْ أَذْ سكّْوَانْ أَطَّاسْ
ذِي ثِيطَّاوِينْ نّسْ.
١٥ نتَّا أَذْ إِدَّارْ!
ؤُ أَذْ أَسْ إِمّوْشْ وُورغْ زِي شَابَا.
ؤُ نِيثْنِي أَذْ ژَّادْجنْ ڒبْذَا
ذِي طّْوعْ نّسْ،
أَسّْ مَارَّا أَذْ ث بَارْكنْ.
 
١٦ أَذْ يِيڒِي إِجّْ ن ؤُفيّضْ ن إِمنْذِي
ذِي ثمُّورْثْ
خْ ثْقِيشَّاثْ ن إِذُورَارْ،
ڒْْغِيدْجثْ نّسْ أَذْ ثنْهزّْ
أَمْ ثْشجِّيرَا ن لُوبْنَانْ،
ؤُ إِنِّي زِي ثنْذِينْثْ أَذْ نُّووَارنْ
أَمْ أَغمُّويْ أَزِيزَا ذِي ثمُّورْثْ.
١٧ إِسمْ نّسْ أَذْ إِقِّيمْ إِ ڒبْذَا،
إِڒِي أَذْ إِنُّووَارْ إِسمْ نّسْ
زَّاثْ إِ وُوذمْ ن ثْفُوشْثْ.
أَذْ ذَايسْ تّْوَابَارْكنْ نِيثْنِي،
مَارَّا ڒڭْنُوسْ أَذْ ث سّمْغَارنْ.
١٨ أَذْ إِتّْوَابَاركْ سِيذِي أَربِّي،
أَربِّي ن إِسْرَائِيل.
نتَّا إِتّڭّْ لْمُوعْجِيزَاثْ، نتَّا وَاهَا.
١٩ أَذْ إِتّْوَابَاركْ
إِسمْ ن ؤُعُودْجِي نّسْ إِ ڒبْذَا.
أَذْ ثتّْوَاشُّورْ مَارَّا ثَامُّورْثْ
س ؤُعُودْجِي نّسْ. أَمِينْ، وَاهْ، أَمِينْ.
 
٢٠ ثِيژِيدْجَاثِينْ ن ذَاوُوذْ، مِّيسْ ن يَاسَّا، أَقَا كمّْڒنْثْ.
 
 
٧٢:٥ إِزهد. 89‏:‏37، 38 ٧٢:٦ 2 صم. 23‏:‏4 ٧٢:١٢ أَيُوبْ 29‏:‏12 ٧٢:١٣ ’ڒعْمَارْ‘ - إِخْسْ أَذْ يِينِي ’ثُوذَارْثْ‘.