٧١
١ أَركّْوَاڒغْ غَاركْ، أَ سِيذِي،
أجّْ أَيِيعمَّارْصْ
وَارْ تّْسضْحِيغْ إِ ڒبْذَا.
٢ فكّْ أَيِي س ثْسڭْذَا نّشْ ؤُ أَرْخُو أَيِي.
أَرّْ-د غَارِي أَمزُّوغْ نّشْ
ؤُ سنْجمْ أَيِي.
٣ إِڒِي ذ إِشْثْ ن ثصْضَارْثْ إِ ثْزذِّيغْثْ إِ نشّْ،
حِيمَا أَذْ غَارسْ د-أَسغْ ڒبْذَا.
شكْ ثْوصِّيذْ حِيمَا أَذْ تّْوَاسّْنجْمغْ،
مَاغَارْ شكْ ذ ثَاسْضَارْثْ إِنُو ذ لْبُورْجْ إِنُو.
٤ أَربِّي إِنُو، سنْجمْ أَيِي
زڭْ ؤُفُوسْ ن ؤُعفَّانْ،
زڭْ ؤُفُوسْ ن مِّيسْ ن ڒْْمُوعْصِييّثْ
ؤُ زِي بُو -غزُّو.
٥ مَاغَارْ شكْ ذ ڒَْايَاسْ إِنُو،
سِيذِي إِنُو، سِيذِي،
شكْ ذ أَثشْڒِي إِنُو زِي ثمْژِي إِنُو.
٦ زڭْ ؤُعذِّيسْ ن يمَّا،
ثُوغَا أَيِيعمّْذغْ خَاكْ.
زڭْ ؤُعذِّيسْ ن يمَّا،
أَقَا شكْ ذ ونِّي ذ أَيِي إِحُوزنْ،
نشّْ صبْحغْ شكْ ڒبْذَا.
٧ إِ وَاطَّاسْ نشّْ أَمْ يِيشْثْ نْ ڒعْڒَامثْ ن ڒعْجبْ،
مَاشَا شكْ ذ أَمْشَانْ إِنُو إِجْهذْ إِ ثَاروْڒَا.
٨ أجّْ أَقمُّومْ إِنُو أَذْ إِشُّورْ
س ؤُصبّحْ نّشْ،
أَسّْ إِمُونْ س شَّانْ نّشْ.
٩ وَارْ خَافِي تّْمنْضَارْ
ذڭْ وُوسَّانْ ن ثوْسَارْ إِنُو،
وَارْ ذ أَيِي سمّحْ
مَاڒَا جّهْذْ إِنُو إِرُوحْ.
١٠ مَاغَارْ ڒْْعذْيَانْ إِنُو سَّاوَاڒنْ خَافِي،
إِنِّي يَارزُّونْ ڒعْمَارْ إِنُو،
مْشَاوَارنْ خَافِي جْمِيعْ.
١١ نِيثْنِي قَّارنْ: ”أَربِّي إِسْمحْ ذَايسْ.
ضْفَارمْ ث ؤُ منْعمْ ث،
مَاغَارْ وَارْ ذِينْ ونِّي إِ غَا إِفكّنْ.
١٢ أَ أَربِّي، وَارْ تّْغِيمِي ثِيڭّْوجذْ خَافِي،
أَ أَربِّي إِنُو، أوْشْ أَيِي ذغْيَا أَفُوسْ.
١٣ أجّْ إِغْرِيمنْ ن ثُوذَارْثْ إِنُو
أَذْ تّْوَاسضْحَانْ ؤُ أَذْ تّْوَاشّنْ،
أجّْ إِنِّي يَارزُّونْ أَذْ أَيِي ڭّنْ ڒْْغَارْ
أَذْ تّْوَاذْڒنْ س ؤُسحْقَارْ ذ ڒفْضِيحثْ.
١٤ نشّْ مَاشَا أَذْ قِّيمغْ تّْرَاجِيغْ شكْ ڒبْذَا،
ؤُ أَذْ أَرْنِيغْ عَاذْ غَارْ ؤُصبّحْ نّشْ.
١٥ أَقمُّومْ إِنُو أَذْ إِبَارّحْ
س ثْسڭْذَا نّشْ،
أَسنْجمْ نّشْ، أَسّْ إِمُونْ،
مَاغَارْ وَارْ سِّينغْ ڒْْقدّْ نّسْ.
١٦ نشّْ أَذْ د-أَسغْ س ثْمڭَّا ثِيمقّْرَانِينْ
ن سِيذِي إِنُو، سِيذِي،
أَذْ إِذَارغْ ثَاسڭْذَا نّشْ،
مْغِيرْ ثنِّي نّشْ وَاهَا.
١٧ أَ أَربِّي، شكْ ثُوغَا ثسّڒْمَاذذْ أَيِي
زِي ثمْژِي إِنُو،
ؤُ نشّْ أَڒْ أَسّْ-أَ تّْبَارّْحغْ
س لْمُوعْجِيزَاثْ نّشْ.
١٨ أَ أَربِّي، وَارْ ذ أَيِي سمّحْ شَا،
وَاخَّا وْسَارغْ شَابغْ،
أَڒْ غَا حَاجِيغْ إِ جِّيڒْ-أَ
خْ ثْمڭَّا ن ؤُفُوسْ نّشْ
ؤُڒَا خْ ثْمڭَّا نّشْ ثِيمقّْرَانِينْ،
إِ مَارَّا مِينْ إِ د غَا يَاسنْ.
١٩ أَ أَربِّي، ثَاسڭْذَا نّشْ
ثِيوضْ أَڒْ سنّجْ قَاعْ،
مَاغَارْ شكْ ثڭِّيذْ ثِيمڭَّا ثِيمقّْرَانِينْ،
أَ أَربِّي، مَانْ ونْ إِدْجَانْ أَمْ شكْ!
٢٠ أَقَا شكْ ثجِّيذْ ثكَّا خَافِي
أَطَّاسْ ن ڒحْصَارَاثْ ذ ڒْْغَارْ،
مَاشَا وَاخَّا أَمنِّي
شكْ أَذْ أَيِي ثسّدَّارذْ عَاوذْ،
شكْ أَذْ أَيِي ثسُّوفّْغذْ
زڭْ وَامَانْ إِهوْڒنْ ن ثمُّورْثْ.
٢١ شكْ أَذْ ثَارِّيذْ ڒمْغَارثْ إِنُو أَذْ ثمْغَارْ،
أَذْ أَيِي د-ثنّْضذْ س ؤُفوّجْ نّشْ.
٢٢ أَذْ شكْ قَاذِيغْ عَاوذْ س لهَارْپَا،
خْ ڒَْامَانْ نّشْ، أَ أَربِّي،
أَذْ شكْ زهّْذغْ س ڒْْڭَامْبْرِي،
أَ أَمْقدَّاسْ ن إِسْرَائِيل.
٢٣ إِينْشِيشنْ إِنُو أَذْ سْڒِيوْڒونْ،
أَقَا أَذْ زهّْذغْ إِ شكْ،
ؤُڒَا ذ ڒعْمَارْ إِنُو نِّي ثفْذِيذْ شكْ.
٢٤ ؤُڒَا ذ إِڒسْ إِنُو أَذْ إِحَاجَا
خْ ثْسڭْذَا نّشْ أَسّْ مَارَّا،
مَاغَارْ إِنِّي يَارزُّونْ
أَذْ أَيِي ڭّنْ ڒْْغَارْ،
سضْحَانْ، إِوَا، تّْوَافضْحنْ.