٤٠
سِيذِي إِسِّيوڒْ أَكْ-ذ أَيُوبْ
١ يَارْنِي يَارَّا-د سِيذِي خْ أَيُوبْ، إِنَّا:
٢ مَا إِخْسْ ونِّي إِتّمْشَارَّاعنْ
أَكْ-ذ ؤُمْزمَّارْ خْ كُوڒْشِي أَذْ ث إِسڭّمْ؟
أجّْ ونِّي إِخْسنْ أَذْ إِذْعَا أَربِّي،
أَذْ د-يَارّْ!
٣ خنِّي يَارَّا-د أَيُوبْ خْ سِيذِي، إِنَّا:
٤ خْزَارْ، نشّْ ذْرُوسْ،
مِينْ زمَّارغْ أَذْ خَاكْ د-أَرّغْ؟
نشّْ أَذْ ڭّغْ أَفُوسْ إِنُو خْ ؤُقمُّومْ إِنُو.
٥ أَقَا سِّيوْڒغْ إِشْثْ ن ثْوَاڒَا،
مَاشَا وَارْ د-تَّارِّيغْ عَاذْ.
ثْوَاڒَا وِيسّْ ثْنَاينْ وَارْ ذ أَسْ أَرنِّيغْ!
٦ خَاسْ ؤُشَا يَارْنِي يَارَّا-د سِيذِي خْ أَيُوبْ زِي ثْحَارْيَاضْثْ، إِنَّا:
٧ بْيسْ خنِّي ثِيجْعِينَّاثِينْ نّشْ أَمْ ورْيَازْ.
نشّْ خْسغْ أَذْ شكْ سّقْسِيغْ
ؤُ شكْ، أَرّْ-د خَافِي!
٨ مَا ثخْسذْ س ثِيذتّْ أَذْ ثَارْژذْ ڒْْحُوكْمْ إِنُو؟
مَا ثخْسذْ أَذْ غَارِي د-ثَارّذْ ڒْْعِيبْ،
مَاحنْذْ أَذْ ثْبَانذْ شكْ ذ أَمْسڭّذْ؟
٩ مَا غَاركْ أَغِيڒْ أَمْ أَربِّي؟
مَا ثْزمَّارذْ أَذْ ثدَّارْذْحذْ
أَمْ وَاجَّاجْ س ثْمِيجَّا نّشْ؟
١٠ قّنْ خنِّي إِخفْ نّشْ
س لْعَاضَامَا ذ ؤُعُودْجِي،
أَرْضْ س ثِيسِّيقْثْ ذ ڒْْعزّْ.
١١ أجّْ أَذُوقّزْ ن ؤُفُوڭمْ نّشْ أَذْ إِزدْجعْ،
خْزَارْ غَارْ كُوڒْ بُو نّْفَاخثْ،
ؤُشَا سهْوَا إِ-ث!
١٢ خْزَارْ مْلِيحْ غَارْ مْكُوڒْ بُو-نّْفَاخثْ،
سهْوَا إِ-ث،
ڒْْبزْ إِعفَّاننْ ذڭْ ومْشَانْ نْسنْ.
١٣ فَّارْ إِ-ثنْ مَارَّا أَمْ مُوننْ ذڭْ ؤُشَاڒْ،
شْفنْ إِغمْبَابْ نْسنْ
ذِي ثْنُوفّْرَا سَاذُو ثَامُّورْثْ.
١٤ خنِّي ؤُڒَا ذ نشّْ أَذْ شكْ سّمْغَارغْ،
مِينْزِي أَفُوسْ نّشْ أَفُوسِي إِسّنْجمْ إِ شكْ.
١٥ خْزَارْ مَاشَا ڒْْوحْشْ، ’بهِيمُوثْ‘،
ونِّي ڭِّيغْ أَمْ مَامّشْ شكْ ڭِّيغْ.
إِتّتّْ أَرْبِيعْ أَمْ ؤُفُونَاسْ.
١٦ خْزَارْ جّهْذْ نّسْ ذِي ثجْعِينَّاثِينْ نّسْ،
ڒْْعزّْ نّسْ ذڭْ إِژوْرَانْ نّسْ ن ؤُعذِّيسْ!
١٧ مَاڒَا إِخْسْ، أَذْ إِڭّْ أَكنَّاسْ نّسْ
أَمْ ثْشجَّارْثْ ن ثنْڭلْثْ،
إِژوْرَانْ ن ثْمصَّاضِينْ نّسْ
محْضنْ مُّوذنْ.
١٨ إِخْسَانْ نّسْ تّڭّنْ
أَمْ يِيقُوذَاسْ ن نّْحَاسْ،
أَمْ بَارَّاثْ ن وُوزَّاڒْ
إِضَارنْ ذ إِغَادْجنْ نّسْ.
١٩ نتَّا ذ أَمزْوَارُو ن إِبْرِيذنْ ن أَربِّي.
ونِّي ث يڭِّينْ، إِوْشَا أَسْ سِّيفْ نّسْ.
٢٠ إِوَا، إِذُورَارْ تَّاوْينْ أَسْ-د أَرْبِيعْ،
مَارَّا ڒوْحُوشْ ن ييَّارْ تِّيرَارنْ ذِينِّي.
٢١ إِبُّوزّڒْ سَاذُو إِ ثْشجِّيرَا إِتّڭّنْ ثِيڒِي،
ذڭْ ؤُذُورِّي ن ؤُغَانِيمْ، ذِي سّبْخثْ.
٢٢ أَذْ خَاسْ دُّورْينْثْ ثْشجِّيرَا إِ إِتِّيشنْ ثِيڒِي،
كُوڒْ إِشْثْ س ثِيڒِي نّسْ،
ثِينمْرَاتْشْ ن ثْغزْرَاثِينْ تّنّْضنْثْ أَسْ-د.
٢٣ خْزَارْ، مَاڒَا إِهَاجْ يغْزَارْ، وَارْ إِتَّارْجِيجِي،
إِتّْغِيمَا يَارْسَا مَاڒَا ڒْْحمْڒثْ ن لْ-ؤُرْذُونْ
ثُوذفْ أَسْ-د غَارْ ؤُقمُّومْ.
٢٤ مَا إِزمَّارْ بْنَاذمْ أَذْ ث إِطّفْ
أَمْ إِخزَّارْ نتَّا نِيشَانْ ذِي ثِيطَّاوِينْ نّسْ،
أَذْ أَسْ إِسّْنُوقّبْ ثِينْزَارْثْ س ثسْغُونِينْ؟
٢٥ مَا ثْزمَّارذْ أَذْ ثْجبْذذْ ’لِيبِييَاثَانْ‘
س ثْسنَّارْثْ ن ويْمَارْ،
نِيغْ أَذْ ثسّهْوِيذْ إِڒسْ نّسْ
ذڭْ ؤُفِيڒُو ن ويْمَارْ؟
٢٦ مَا ثْزمَّارذْ أَذْ أَسْ ثڭّذْ
ثَاخَاذنْثْ ن ؤُغَانِيمْ ذِي ثنْزَارْثْ نّسْ،
نِيغْ أَذْ ثسّْنُوقّْبذْ
أَغسْمِيرْ نّسْ س ؤُغَانْتْشُو؟
٢٧ مَا أَذْ زَّايكْ إِتَّارْ أَحِينِّي؟
مَا أَذْ إِسِّيوڒْ أَكِيذكْ
س وَاوَاڒنْ إِمِيزِيضنْ؟
٢٨ مَا أَذْ يڭّْ أَكِيذكْ ڒْْعَاهْذْ؟
مَا ثْزمَّارذْ أَذْ ث ثكْسِيذْ
ذ إِسْمغْ إِ ڒبْذَا؟
٢٩ مَا ثْزمَّارذْ أَكِيذسْ ثتِّيرَارذْ
أَمْ أَكْ-ذ إِجّْ ن ؤُجْضِيضْ،
نِيغْ أَذْ ث ثقّْنذْ إِ ثحْرَامِينْ نّشْ؟
٣٠ مَا زمَّارنْ إِنيْمَارنْ
أَذْ ذَايسْ سبّبنْ؟
مَا زمَّارنْ أَذْ ث بْضَانْ
جَارْ أَيْثْ ن كنْعَانْ؟
٣١ مَا ثْزمَّارذْ أَذْ ثجِّيذْ
ثِيڒْمشْثْ نّسْ س فْڒِيثْشَاثْ،
نِيغْ س لَانْسَا ن إِسڒْمَانْ أَزدْجِيفْ نّسْ؟
٣٢ سَارْسْ خَاسْ أَفُوسْ نّشْ،
خمّْ غَارْ ؤُمنْغِي،
وَارْ ث تّڭِّيذْعمَّارْصْ عَاذْ.