٣٩
١ مَا ثسّْنذْ مڒْمِي تَّارْونْثْ
ثْغَايْذِينْ ن ثْصُوضَارْ؟
مَا ثْحطِّيذْ ثِيرْوَا ن ثُوذَاذِينْ؟
٢ مَا ثْزمَّارذْ أَذْ ثْحسْبذْ
إِيُورنْ ن ثْكسِّيثْ نْسنْثْ،
مَا ثسّْنذْ ڒْْحَاڒْ ن ثِيرْوَا نْسنْثْ؟
٣ نِيثنْثِي تّقْوِيسنْثْ،
تَّارْونْثْ إِمژْيَاننْ نْسنْثْ،
ڒوْجعْ نْ ثَارُوثْ نْسنْثْ سُّوفُّوغنْ ثنْ.
٤ محْضنْ إِمژْيَاننْ نْسنْثْ،
مقَّارنْ ذِي ڒخْڒَا،
تّفّْغنْ غَارْ بَارَّا
ؤُ وَارْ غَارْسنْثْ تّْعِيقِّيبنْ.
٥ مَانْ ونْ يَارْخُونْ إِ وغْيُوڒْ ن ڒخْڒَا
ؤُ ثِيسَارِّيفِينْ ن وغْيُوڒْ ن ڒخْڒَا،
مَانْ ونْ ثنْثْ إِفسْينْ؟
٦ نشّْ وْشِيغْ أَسْ ثَانزْرُوفْثْ ذ ثَادَّارْثْ،
ڒوْضَا أَمدْجَاحْ ذ ثِيزذِّيغِينْ نّسْ.
٧ نتَّا إِضحّشْ
خْ ڒْْغَاشِي إِنْهوْڒنْ ن ثنْذِينْثْ،
وَارْ إِتّسْڒِي إِغُويَّانْ
ن يِينِّي إِزيَّارنْ إِسمْغَانْ.
٨ جّْوَايهْ ن إِذُورَارْ
ذ دّْمَانِي نّسْ ن ثَاروْسَا،
يَارزُّو ذَايْسنْ خْ قَاعْ مِينْ إِدْجَانْ ذ أَزِيزَا.
٩ مَا أَذْ إِخْسْ إِغَايْضْ ن ڒخْڒَا
أَكْ-ذ وَاشَّاونْ ذ إِزِيرَارنْ
أَذْ خَاكْ إِسخَّارْ؟
مَا أَذْ إِسّنْسْ غَارْ ڒْمذْوذْ نّشْ؟
١٠ مَا ثْزمَّارذْ أَذْ ثْمنْعذْ
إِغَايْضْ ن ڒخْڒَا
أَكْ-ذ وَاشَّاونْ ذ إِزِيرَارنْ
س وسْغُونْ نّسْ غَارْ ؤُعيّذْ ن وشْرَازْ؟
مَا أَذْ إِشَارْزْ ثِييْسَارِينْ أَوَارْنِي أَشْ؟
١١ مَا ثتّْشَاڒذْ خَاسْ،
مِينْزِي نتَّا إِجْهذْ أَطَّاسْ،
مَا أَذْ أَسْ ثجِّيذْ ڒْْخذْمثْ نّشْ؟
١٢ مَا أَذْ خَاسْ ثتّشْڒذْ
أَذْ غَاركْ د-يَارّْ زَّارِيعثْ نّشْ،
أَذْ ت يَاوِي غَارْ ؤُنذْرَارْ نّشْ؟
١٣ أَفْرِيونْ ن نّْعَامثْ شَّاثنْ س ڒْْخَاضَارْ.
مَاشَا مَا أَقَا-ثنْ ذ أَفْرِيونْ
ذ وَارِّيشْ إِذَاڒْفنْ ن ؤُبلَّارْجْ؟
١٤ مَاغَارْ ثتّجَّا ثِيمدْجَاڒِينْ نّسْ
ذڭْ ؤُشَاڒْ ن ثمُّورْثْ،
ثتّجَّا إِ-ثنْثْ تّحْمَانْثْ ذڭْ إِجْذِي.
١٥ ثتّتُّو أَقَا إِجّْ ن ؤُضَارْ
إِزمَّارْ أَذْ ثنْثْ إِڒْبزْ،
أَقَا ڒوْحُوشْ ن ڒخْڒَا
زمَّارنْ أَذْ خَاسنْثْعفْسنْ.
١٦ نتَّاثْ ثْقسّحْ ذڭْ إِمژْيَاننْ نّسْ
أَخْمِي وَارْ دْجِينْ نّسْ.
بَاطڒْ إِ ثتّڭّْ ثِيزمَّارْ نّسْ،
مَاغَارْ نتَّاثْ وَارْ ثْكسِّي س ومْنُوسْ،
١٧ مَاغَارْ أَربِّي إِجَّا إِ-ت أَذْ ثتُّو ثِيغِيثْ،
وَارْ ذ أَسْ إِوْشِي بُو ثسْغَارْثْ ذِي ڒفْهَامثْ.
١٨ مَاشَا مَاڒَا ثكْسِي ذڭْ ؤُضَارْ نّسْ،
ثسّْڭعَّاذْ إِخفْ نّسْ،
ثْضحّشْ خْ ؤُيِيسْ ذ ونِّي خَاسْ إِنْيِينْ.
١٩ مَا ثْزمَّارذْ أَذْ ثوْشذْ جّهْذْ إِ ؤُيِيسْ؟
مَا ثْزمَّارذْ أَذْ ثسّْيَارْضذْ
إِجِيمَانْ نّسْ س سّْبِيبْ؟
٢٠ مَا ثْزمَّارذْ أَذْ ث يَارّْ إِنطُّو
أَمْ ؤُبُورْخسْ؟
ڒْْعزّْ ن ؤُسْنحْنحْ نّسْ
إِسَّاڭّْوَاذْ أَطَّاسْ.
٢١ خبّْشنْ إِيْسَانْ س إِضَارنْ نْسنْ
أَمْ تّْرَاجَانْ ذِي ڒوْضَا ن ثغْزُورْثْ،
إِفَارْحْ ؤُيِيسْ س جّهْذْ نّسْ،
إِتّفّغْ، مَاحنْذْ أَذْ إِمّڒْقَا
أَكْ-ذ ڒسْنَاحْ.
٢٢ إِضحّشْ خْ مَارَّا مِينْ إِسَّاڭّْوَاذنْ،
وَارْ إِتّْنخْڒِيعْ زِي وَالُو،
وَارْ إِذِّيكّْوِيڒْ غَارْ ضفَّارْ زِي سِّيفْ.
٢٣ إِتّْقَارْقُوبْ وقْرَابْ ن فْڒِيثْشَاثْ
سنّجْ نّسْ،
لَانْسَا ذ فْڒِيثْشَا تِّيسِّيقنْ.
٢٤ س دّْرِيزْ ن ثْشضْيِينْ ذ زّْعَامثْ
إِصَارّضْ ثَامُّورْثْ،
وَارْ إِزمَّارْ أَذْ إِتّْوَاسّْبدّْ
غَارْ ؤُسُوضِي ن ؤُيِيشّْ ن إِشَارِّي.
٢٥ غَارْ ثْمِيجَّا ن ؤُسُوضِي ذڭْ ؤُيِيشّْ ن إِشَارِّي
إِسّْنحْنِيحْ: ’هههْ!‘
إِتَّاشَا أَكْ-ذ ؤُمنْغِي زِي ڒَْاڭّْوَاجْ،
زّْڭَا ن ڒْْحُوكَّامْ ذ إِغُويَّانْ ن ؤُمنْغِي.
٢٦ مَا إِطَّاوْ ڒْْبَازْ زِي ڒفْهَامثْ نّشْ،
أَقَا إِتّْبزَّاعْ أَفْرِيونْ نّسْ غَارْ لْجَانُوبْ؟
٢٧ مَا إِسّْڭعَّاذْ ؤُڭِيذَارْ إِخفْ نّسْ
سنّجْ قَاعْ س ڒُْومُورْ نّشْ،
إِتّڭّْ ڒْْعُوشّْ نّسْ ذِي ڒُْوعْڒَا؟
٢٨ إِزدّغْ ؤُ إِسّْنُوسَا خْ جَّارْفْ،
خْ ؤُشنْقُوبْ ن جَّارْفْ، أَقَا-ث ذ لْبُورْجْ نّسْ.
٢٩ سّنِّي إِحطَّا زَّارْذثْ،
ثِيطَّاوِينْ نّسْ خزَّارنْثْ إِ-ت-د
زِي ڒَْاڭّْوَاجْ.
٣٠ إِمژْيَاننْ نّسْ سكّْفنْ إِذَامّنْ
ؤُ مَانِي دْجَانْ إِنِّي إِتّْوَانْغنْ، أَقَا-ث ذِينْ إِ يدْجَا.