٣٨
أَربِّي إِسِّيوڒْ أَكْ-ذ أَيُوبْ خْ وخْڒَاقْ ن مَارَّا مِينْ إِدْجَانْ
١ أَوَارْنِي أَسْ يَارَّا-د سِيذِي خْ أَيُوبْ زِي ثْحَارْيَاضْثْ، إِنَّا:
٢ مَانْ ونْ إِسّْبَارّْشْننْ أَشَاوَارْ،
س وَاوَاڒنْ بْڒَا ثُوسّْنَا؟
٣ بْيسْ خنِّي ثِيجْعِينَّاثِينْ نّشْ أَمْ ورْيَازْ.
نشّْ خْسغْ أَذْ شكْ سّقْسِيغْ
ؤُ شكْ، أَرّْ-د خَافِي!
٤ مَانِي شكْ ثُوغَا
ؤُمِي ڭِّيغْ نشّْ ذْسَاسْ ن ثَامُّورْثْ؟
إِنِي ث مَاڒَا غَاركْ ڒفْهَامثْ س ثِيذتّْ.
٥ مَانْ ونْ إِڭِّينْ ڒعْبَارْ نّسْ،
وَاهْ، شكْ ثسّْنذْ ت،
مَا وَارْ إِدْجِي أَمنِّي؟
مَانْ ونْ خَاسْ إِمحْضنْ أَفِيڒُو ن ڒعْبَارْ؟
٦ مِينْ خفْ هْوَانْ ذْسُوسَا نّسْ،
نِيغْ مَانْ ونْ إِسَّارْسنْ
أَژْرُو ن ثغْمَارْثْ نّسْ،
٧ ؤُمِي إِثْرَانْ ن صّْبهْ
غنّْجنْ جْمِيعْ س ڒفْرَاحثْ،
ؤُمِي سْڒِيوْڒونْ
مَارَّا أَرَّاونْ ن أَربِّي؟
٨ مَانْ ونْ إِبلّْعنْ ڒبْحَارْ س ثوُّورَا،
ؤُمِي د-إِدُّوقّزْ
ؤُشَا إِفّغْ-د زڭْ ؤُعذِّيسْ ن يمَّاسْ،
٩ ؤُمِي ذ أَسْ ڭِّيغْ إِسيْنُوثنْ ذ أَرُّوضْ نّسْ،
إِجّْ ن ؤُسيْنُو إِبُّومْبسْ ذ أَمنْذِيڒْ
مَاحنْذْ أَذْ ذَايسْ ث سّهْنُونّْضغْ،
١٠ ؤُمِي ذ أَسْ أَرْژِيغْ أَفْرَايْ إِنُو
أَمْ إِجّْ ن وحْفُورْ يُودْجْغنْ،
ؤُ ؤُمِي ذ أَسْ ڭِّيغْ أَعْمُوذْ
إِ ؤُبلّعْ ذ ثوُّورَا،
١١ نِّيغْ: ’أَڒْ ذَا إِ د غَا ثَاسذْ، وَارْعدُّو.
ذَانِيثَا أَذْ ثتّْوَاسّْبدّْ
نّْفَاخثْ ن ڒمْوَاجْ نّشْ.‘
١٢ مَا ثُومُورذْ شكْ أَثفُّو ن صّْبحْ
ذڭْ وُوسَّانْ نّشْ؟
مَا ثسّْشَانذْ إِ ثْفَاوْثْ ن ڒفْجَارْ
أَمْشَانْ نّسْ،
١٣ مَاحنْذْ أَذْ ثطّفْ أَفْرِيونْ ن ثمُّورْثْ،
أَڒَامِي أَذْ زَّايسْ زّرْزنْ إِعفَّاننْ؟
١٤ أَذْ ثذْوڒْ ثمُّورْثْ
أَمْ ثَارِّيسْثْ سَاذُو طَّابعْ،
مَارَّا ثِيمسْڒَايِينْ
أَذْ خَاسْ تّْوَاسّْبدّنْثْ عَاوذْ
أَمْ مَامّشْ إِ ثدْجَا إِجّْ ن وَارُّوضْ.
١٥ إِعفَّاننْ أَذْ أَسنْ ثتّْوَاكّسْ
ثْفَاوْثْ نْسنْ
ؤُ أَغِيڒْ إِتّْوَاسّْڭعّْذنْ
أَذْ إِتّْوَارْژْ.
١٦ مَا ثِيوْضذْ غَارْ ڒْْعُونْصَارَاثْ ن ڒبْحَارْ،
مَا ثُويُورذْ عمَّارْصْ خْ وُوذمْ
ن ثمُّورْثْ ن وَامَانْ إِهوْڒنْ؟
١٧ مَا تّْوَاعَارَّانْثْ
ثوُّورَا ن ڒْْموْثْ إِ شكْ،
مَا ثژْرِيذْ ثِيوُّورَا ن ثِيڒِي ن ڒْْموْثْ؟
١٨ مَا ثتَّاوِي-د ڒفْهَامثْ نّشْ
أَڒْ إِنڭُّورَا ن ثمُّورْثْ؟
إِنِي ث مَاڒَا ثسّْنذْ أَيَا مَارَّا.
١٩ مَانِي إِدْجَا وبْرِيذْ غَارْ ثْزذِّيغْثْ ن ثْفَاوْثْ؟
ؤُ ثَادْجسْثْ، مَانِي ثدْجَا ثْزذِّيغْثْ نّسْ،
٢٠ حِيمَا أَذْ ثْزمَّارذْ أَذْ ت ثْنذْهذْ
غَارْ ومْشَانْ نّسْ،
ؤُ أَذْ ثسّْنذْ مْلِيحْ إِمسْرَاقْ
غَارْ ثَادَّارْثْ نّسْ؟
٢١ شكْ أَقَا ثسّْنذْ مَانْ أَيَا نِيغْ،
مِينْزِي شكْ ثُوغَا ثْخڒْقذْ، نِيغْ لَّا؟
ؤُ مَا وَارْ إِدْجِي
ڒْْقدّْ ن وُوسَّانْ نّشْ ذ أَطَّاسْ؟
٢٢ مَا ثُوذْفذْ غَارْ إِخَّامنْ
ن ڒخْزنْ ن وذْفڒْ،
مَا ثژْرِيذْ ڒهْرِيثْ ن ثبْرُورِي،
٢٣ نِّي خْ شطَّارغْ إِ ڒْْوقْثْ ن ڒحْصَارثْ،
إِ وَاسّْ ن ڭَارَّا ذ ؤُمنْغِي؟
٢٤ مَانِي إِدْجَا وبْرِيذْ إِتّْبطَّانْ ثِيفَاوْثْ،
ؤُڒَا ذ أَبْرِيذْ إِ زِي إِتّْوَابزّعْ
ؤُسمِّيضْ ن شَّارْقْ خْ ثمُّورْثْ؟
٢٥ مَانْ ونْ إِفدْجقْ ڒْْمِيزَابْ
إِ ڒْْحمْڒثْ ن ونْژَارْ،
ؤُڒَا ذ أَبْرِيذْ إِ وَاسَّامْ ن وَاجَّاجنْ
٢٦ حِيمَا أَذْ إِسّكّْ أَنْژَارْ خْ ثمُّورْثْ
نِّي ذِي وَارْ إِزْذِيغْ حذْ،
خْ ڒخْڒَا إِ وَارْ ذِي إِزْذِيغْ ؤُڒَا ذ إِجّْ،
٢٧ حِيمَا أَذْ إِسَّارْوَا
جّْوَايهْ إِخْڒَانْ ؤُ إِتّْوَاخْڒَانْ
ؤُ حِيمَا أَذْ إِسّغْمِي أَرْبِيعْ ذ طّْرِي؟
٢٨ مَا أَنْژَارْ غَارسْ شَا ن بَابَاسْ،
نِيغْ مَانْ ونْ إِ د-إِتّجَّانْ
ثُوذِّيمِينْ ن نّْذَا؟
٢٩ زِي مَانْ أَعذِّيسْ إِ زِي د-إِفّغْ وجْرِيسْ،
ؤُ نّْذَا إِجرْسنْ ن ؤُجنَّا،
وِي إِ-ث-إِ-د-يُورْونْ؟
٣٠ دَّاكّْوَاڒنْ وَامَانْ أَمْ وژْرُو
ؤُشَا إِجَارْسْ وُوذمْ ن وَامَانْ إِهوْڒنْ.
٣١ مَا ثْزمَّارذْ أَذْ ثْشدّذْ
أَڭْرَاوْ ن سبْعَا ن يثْرَانْ،
نِيغْ ثْفسّْيذْ سّْنَاسڒْ ن يثْرَانْ ن ؤُرِييُونْ؟
٣٢ مَا ثْزمَّارذْ أَذْ د-ثسُّوفّْغذْ
إِثْرَانْ ن زُوذْيَاكْ غَارْ ڒْْحَاڒْ نْسنْ،
ؤُڒَا ذ دُّوبْ أَمقّْرَانْ أَكْ-ذ ثَارْوَا نّسْ؟
٣٣ مَا ثسّْنذْ إِزرْفَانْ ن ؤُجنَّا،
نِيغْ ثْزمَّارذْ أَذْ ثْضبَّارذْ
خْ ؤُقَارِّي نْسنْ ذِي ثمُّورْثْ؟
٣٤ مَا ثْزمَّارذْ أَذْ ثسّْڭعّْذذْ
غَارْ إِسيْنُوثنْ ثْمِيجَّا نّشْ،
أَڒَامِي شكْ إِ غَا ثْذڒْ
إِشْثْ ن ڒْْحمْڒثْ ن وَامَانْ؟
٣٥ مَا ثْزمَّارذْ أَذْ ثسّكّذْ أَسَّامنْ
مَاحنْذْ أَذْ قدْجْقنْ،
أَذْ أَشْ إِنِينْ: ’أَقَا-نغْ ذَا‘؟
٣٦ مَانْ ونْ إِسَّارْسنْ ثِيغِيثْ
ذِي ذَاخڒْ ن بْنَاذمْ؟
نِيغْ مَانْ ونْ إِوْشِينْ ڒفْهَامثْ إِ ڒعْقڒْ؟
٣٧ مَانْ ونْ إِفَارّْزنْ إِسيْنُوثنْ س ڒعْقڒْ،
إِغَارَّافنْ ن وَامَانْ ن ؤُجنَّا
وِي ثنْ إِتّْزدْجَاعنْ،
٣٨ أَڒَامِي إِتّْوَافْسِييْ ؤُشَاڒْ،
إِذْوڒْ ذ أَبدْجَاعْ،
ؤُشَا ڒسْقنْ إِبُورْسَا ن ثمُّورْثْ؟
٣٩ مَا ثْزمَّارذْ
أَذْ ثطّْفذْ زَّارْذثْ إِ ثَايْرَاذْثْ،
نِيغْ أَذْ ثسّڒْهُوذْ
ڒَْاژْ ن وَايْرَاذنْ إِمژْيَاننْ،
٤٠ ڒَْامِي نُوفَّارنْ ذڭْ إِفْرَانْ نْسنْ،
ؤُ تّْحَامَانْ زِي ڒمْرَاڭحْ نْسنْ؟
٤١ مَانْ ونْ إِسّوْجَاذنْ
إِ ؤُبَاغڒْ مَاشَّا نّسْ،
خْمِي سْغُويُّونْ إِمژْيَاننْ نّسْ
غَارْ أَربِّي،
خْمِي تّمْهَافَانْ نْهْڒَا مَاشَّا؟