٤١
١ خْزَارْ، قَاعْ أَرَاجِي أَذْ إِفْشڒْ،
مْغِيرْ ثَامُوغْڒِي نّسْ
ثسّعْڭَازْ بْنَاذمْ.
٢ وَارْ إِدْجِي ؤُڒَا ذ إِجّنْ أَمُّو ذ أَزعَّامْ
أَڒَامِي ث إِ غَا إِهْوڒْ،
مَانْ ونْ خنِّي إِزمَّارنْ
أَذْ إِقِّيمْ إِبدّْ
زَّاثْ إِ ؤُغمْبُوبْ إِنُو؟
٣ مَانْ ونْ إِ ذ أَيِي إِوْشِينْ شَا ذ أَمزْوَارُو،
أَڒَامِي ذ أَيِي إِتّْخصَّا
أَذْ غَارسْ ث-إِ-د-أَرّغْ؟
مَارَّا مِينْ إِدْجَانْ سَاذُو إِجنْوَانْ إِنُو!
٤ نشّْ وَارْ تّسْقَارِيغْ خْ إِضَارنْ نّسْ،
خْ ڒمْغَارثْ ن جّهْذْ نّسْ
ؤُ خْ ؤُشُووَّارْ ن وَادُّوذْ نّسْ.
٥ مَانْ ونْ إِزعّْمنْ أَذْ إِقجّعْ
ثَاقْشُورْثْ ن وَارُّوضْ نّسْ،
مَانْ ونْ إِزعّْمنْ أَذْ د-إِقَارّبْ
غَارْ ثْيُويَا ن ڒسْذُوذْ ن ثغْمَاسْ
ن إِغسْمَارْ نّسْ؟
٦ مَانْ ونْ إِزمَّارنْ
أَذْ يَارْزمْ ثِيوُّورَا
غَارْ ؤُغمْبُوبْ نّسْ؟
مِينْ إِنّْضنْ إِ ثغْمَاسْ نّسْ
مْغِيرْ ذ أَنخْڒِيعْ.
٧ ڒسْذُوذْ ن ثْسدَّارِييِينْ
خْ وعْرُورْ نّسْ شنّْعنْ،
كُوڒْ إِجّْ زَّايْسنْ إِتّْوَابلّعْ
س طَّابعْ إِقّْننْ نِيشَانْ.
٨ إِجّنْ إِقّْننْ نِيشَانْ غَارْ إِجّْ ن نّغْنِي،
وَارْ إِزمَّارْ أَذْ ذِينْ د-يَاذفْ
أَرِّيحْ جَارْ أَسنْ.
٩ ڒسّْقنْ ذڭْ وَايَاوْيَا،
ؤُذْفنْ ذڭْ إِخفْ نْسنْ
مَاحنْذْ وَارْ ثمّْسبْضِينْ.
١٠ مَاڒَا إِعْضسْ، ثتّْشعْشِيعْ ثْفَاوْثْ،
ثِيطَّاوِينْ نّسْ ڭِّينْثْ
أَمْ وَابْڒِيونْ ن ثْفَاوْثْ نْ ڒفْجَارْ.
١١ زڭْ ؤُجقْمِيمْ نّسْ
تّفّْغنْ-د إِصفْضَاونْ،
ثِيفطُّوثِينْ ن ثْمسِّي دُّوقُّوزنْثْ زَّايسْ.
١٢ دّخَّانْ إِتّْفوَّارْ
زڭْ إِخُوبَاشْ ن ونْزَارنْ نّسْ،
أَمْ زڭْ إِجّْ ن ؤُطنْجِيرْ إِتّْننَّانْ
س ؤُغَانِيمْ إِدُّوخُّوننْ.
١٣ ثْوَارِّيثْ ن نّفْسْ نّسْ ثسّكَّارَا
ثِيمسِّي ذِي ڒفْحمْ،
زڭْ ؤُحرْقُومْ نّسْ
إِتّفّغْ-د ؤُحَاذُوقْ ن ثْمسِّي.
١٤ جّهْذْ إِزْذغْ ذڭْ إِجِيمَانْ نّسْ،
غَارْ زَّاثْ نّسْ إِنطُّو ؤُنخْڒِيعْ.
١٥ طّْرُوفَا ن ويْسُومْ ن ؤُعذِّيسْ نّسْ
مّْڒسْقنْ،
أَمْ خَاسنْ فسْينْ،
وَارْ زمَّارنْ أَذْ تّْوَانْهزّنْ.
١٦ ؤُڒْ نّسْ إِقْسحْ أَمْ وژْرُو،
إِقْسحْ أَمْ ثصْضَارْثْ ن سْوَادَّايْ ن ثْسِيرْثْ.
١٧ خْمِي إِسّْڭعَّاذْ إِخفْ نّسْ،
تّْنخْڒَاعنْ إِنِّي إِجهْذنْ،
زڭْ ؤُقزّبْ خطَّانْ ذِي ثنْذَايْثْ.
١٨ مَاڒَا إِڒْقفْ إِ-ث شَا ن يِيجّنْ س سِّيفْ،
وَارْ إِتِّيڒِي، وَارْ إِدْجِي س ؤُحْرِيشْ،
ڒَْا س لَانْسَا ؤُڒَا س فْڒِيثْشَا.
١٩ ؤُزَّاڒْ غَارسْ أَمْ ؤُڒُومْ،
نّْحَاسْ أَمْ ؤُكشُّوضْ يَارْشَانْ.
٢٠ فْڒِيثْشَا ن ڒْْقوْسْ وَارْ ث ثسّْثوّجْ،
إِژْرَا ن إِدْجِييْ دَّاكّْوَاڒنْ زَّاثسْ ذ أَقشْقَاشْ.
٢١ إِذبُّوزنْ إِحسّبْ إِ-ثنْ أَمْ ؤُقشْقَاشْ،
إِضحّشْ خْ ؤُزبْزبْ ن ؤُحْرِيشْ.
٢٢ غَارْ وَادَّايْ ن ؤُعذِّيسْ نّسْ
أَقَا ذِينْ إِشقْفَانْ إِقضْعنْ،
إِتّْجَارَّا ڒمْوَاسْ إِقضْعنْ نِّي
أَمْ ثڒْوِيحْثْ إِتّحْڒُودْجُوضنْ إِ ؤُسَارْوثْ
ثِيوَا ن ؤُبدْجَاعْ.
٢٣ إِڭَّا ڒَْادْجَاغْ أَذْ إِسّْثخْثخْ أَمْ ثيْذَارْثْ،
إِتّڭّْ ڒبْحَارْ أَمْ ؤُمقْرَاجْ إِتّْهَاجَانْ.
٢٤ إِتّجَّا أَوَارْنِي أَسْ جُّورّثْ
ثَارقّْ ذ أَمسْرَاقْ،
أَمَانْ إِهوْڒنْ تّْبَاننْ
أَمْ ؤُشُوَّافْ ن ؤُمشَّايْبُو.
٢٥ وَارْ ذِينْ إِدْجِي ؤُڒَا ذ إِجّْ خْ ثمُّورْثْ
يَارْوسْ ذَايسْ،
إِتّْوَاڭّْ حِيمَاعمَّارْصْ وَارْ إِتّڭّْوذْ.
٢٦ إِنْضَارْ ثِيطَّاوِينْ نّسْ خْ مَارَّا وِي يُوعْڒَانْ،
أَقَا-ث ذ أَجدْجِيذْ خْ مَارَّا
إِيْرَاذنْ إِمژْيَاننْ إِنفّْخنْ.