٣٥
ڒْهَارْدْ وِيسّْ ثْڒَاثَا ن إِلِيهُو: ثَاسڭْذَا ن بْنَاذمْ وَارْ ثْنفّعْ زَّاثْ إِ أَربِّي
١ يَارَّا-د إِلِيهُو، إِنَّا:
٢ مَا إِتّْغِيڒْ أَشْ أَيَا نِيشَانْ، أَقَا ثقَّارذْ:
’ثَاسڭْذَا إِنُو كْثَارْ خْ ثنِّي ن أَربِّي‘؟
٣ مَاغَارْ ثنِّيذْ: ’مَانْ ڒفْضڒْ غَاركْ؟
مِينْ ذ أَيِي د غَا إِكَّارنْ
أَقَا نشّْ وَارْ تّڭّغْ دّْنُوبْ؟‘
٤ أَذْ خَاكْ د-أَرّغْ،
ؤُڒَا خْ إِمدُّوكَّاڒْ نّشْ أَكِيذكْ.
٥ خْزَارْ أَجنَّا، ؤُ خْزَارْ،
حكَّارْ إِسيْنُوثنْ ثِيوَا نّشْ قَاعْ!
٦ مَاڒَا ثخْضِيذْ،
مِينْ إِ ذ أَسْ ثتّڭّذْ س مَانْ أَيَا؟
مَاڒَا إِعذِّيينْ نّشْ ذ أَطَّاسْ،
مِينْ زَّايسْ إِ ذ أَسْ إِ غَا ثَاوْيذْ؟
٧ مَاڒَا شكْ ذ أَمْسڭّذْ،
مِينْ إِ ذ أَسْ ثتِّيشذْ س ؤُيَا،
نِيغْ مِينْ إِتّطّفْ نتَّا زڭْ ؤُفُوسْ نّشْ؟
٨ أَقَا ثُوعفّْنَا نّشْ
ثْڒقّفْ أَرْيَازْ أَمْ شكْ وَاهَا،
ؤُ ثَاسڭْذَا نّشْ ثتِّيڒِي
ذِي طّْوعْ ن إِجّْ ن مِّيسْ ن بْنَاذمْ وَاهَا.
٩ سْغُويُّونْ زڭْ وَاطَّاسْ ن ڒحْصَارَاثْ،
تّْڒَاغَانْ غَارْ ثْوِيزَا
زِي سِّيبّثْ ن ؤُغِيڒْ ن أَيْثْ ن بُو-صُّولْطَا.
١٠ مَاشَا ؤُڒَا ذ إِجّنْ إِقَّارْ:
’مَانِي إِدْجَا أَربِّي، ونِّي ذ أَيِي إِڭِّينْ،
ونِّي إِتِّيشنْ إِزْڒَانْ ن ؤُصبّحْ ذِي دْجِيڒثْ،
١١ ونِّي ذ أَنغْ إِسّڒْمَاذنْ
س ڒْْمَاڒْ ن ثمُّورْثْ،
ذ ونِّي ذ أَنغْ إِتّڭّنْ ذ إِمِيغِيسنْ
س إِجْضَاضْ ن ؤُجنَّا؟‘
١٢ ذِينِّي سْغُويُّونْ نِيثْنِي،
مَاشَا نتَّا وَارْ د-إِتَّارِّي،
زِي سِّيبّثْ ن نّْفَاخثْ ن إِعفَّاننْ.
١٣ س ثِيذتّْ، أَربِّي وَارْ إِتّسْڒِي
غَارْ إِغُويَّانْ إِبطّْڒنْ،
أَمْزمَّارْ خْ كُوڒْشِي وَارْ كِيذسْ إِڒهِّي.
١٤ وَاخَّا شكْ ثقَّارذْ،
أَقَا شكْ وَارْ ث ثتّْوِيڒِيذْ،
ثتّْغِيمَا ثْمسْڒَاشْثْ عَاذْ زَّاثْ إِ وُوذمْ نّسْ.
رَاجَا ث خنِّي.
١٥ مَاڒَا ڒخُّو أَخيّقْ نّسْ
وَارْ إِشِّيثْ عَاذْ،
مَا خنِّي نتَّا وَارْ إِسِّينْ
خْ ؤُعذِّي إِمْغَارْ؟
١٦ أَيُوبْ إِشَارّڭْ أَقمُّومْ نّسْ بَاطڒْ،
إِتّڭّْ أَوَاڒنْ إِمقّْرَاننْ نْهْڒَا ثُوسّْنَا.