٣٤
ڒْهَارْذْ وِيسّْ ثْنَاينْ ن إِلِيهُو خْ مَامّشْ إِتّڭّْ أَربِّي ڒبْذَا س ڒْْحقّْ
١ إِطّفْ إِلِيهُو عَاوذْ ذڭْ وَاوَاڒْ، إِنَّا:
٢ سْڒمْ-د غَارْ وَاوَاڒنْ إِنُو، أَ إِمِيغِيسنْ،
وْشمْ أَيِي أَمزُّوغْ،
أَ كنِّيوْ، أَيْثْ ن ثُوسّْنَا.
٣ مَاغَارْ أَمزُّوغْ إِنبّشْ ذڭْ وَاوَاڒنْ،
أَمْ مَامّشْ إِتّْقَاسَا وَانغْ مَاشَّا.
٤ جّمْ أَنغْ أَذْ نِيخْضَارْ جَارْ أَنغْ
مِينْ إِدْجَانْ نِيشَانْ،
جّمْ أَنغْ أَذْ نسّنْ جَارْ أَنغْ
مِينْ إِدْجَانْ ذ أَصبْحَانْ.
٥ مَاغَارْ أَيُوبْ إِنَّا: ’نشّْ ذ أَمْسڭّذْ،
أَربِّي إِكّسْ أَيِي ثَاسْغَارْثْ إِنُو!
٦ وَاخَّا غَارِي ڒْْحقّْ،
عَاذْ تّْغِيمغْ تّْبَانغْ
أَمْ يِيجّْ ن بُو-إِخَارِّيقنْ!
أَيزِّيمْ ن فْڒِيثْشَا إِ ذَايِي إِدْجَا،
وَارْ إِزمَّارْ أَذْ إِتّْوَاسّْڭنْفَا
أَمْ وَارْ ذِينْ إِدْجِي ؤُعذِّي.‘
٧ مَانْ ونْ إِدْجَانْ ذ أَرْيَازْ أَمْ أَيُوبْ،
ونِّي إِسسّنْ أَسْثهْزِي أَمْ وَامَانْ؟
٨ نتَّا إِڭُّورْ ذڭْ وبْرِيذْ أَمْ إِتّْعَاشَارْ
إِنِّي إِتّڭّنْ ڒْْمُوعْصِييّثْ،
إِڭُّورْ أَكْ-ذ إِرْيَازنْ إِعفَّاننْ.
٩ مَاغَارْ إِنَّا: ’وَارْ إِنفّعْ وَالُو إِ بْنَاذمْ،
مَاڒَا نتَّا ذ أَمَارْضِي غَارْ أَربِّي.‘
١٠ س ؤُيَا سْڒمْ-د غَارِي،
كنِّيوْ إِرْيَازنْ إِ ذِي ثدْجَا ڒفْهَامثْ:
’إِڭّْوجْ خْ أَربِّي مَاحنْذْ أَذْ يڭّْ ثُوعفّْنَا،
ؤُڒَا خْ ؤُمْزمَّارْ خْ كُوڒْشِي
مَاحنْذْ أَذْ يڭّْ مِينْ إِفَارْغنْ.‘
١١ مَاغَارْ نتَّا إِخْڒفْ زِي بْنَاذمْ
عْلَاحْسَابْ ثِيمڭَّا نّسْ،
ؤُ أَمْ مَامّشْ إِدْجَا وبْرِيذْ ن ورْيَازْ،
أَمُّو إِ ذ أَسْ غَا يَارّْ أَذْ ث يَافْ.
١٢ س ثِيذتّْ،عمَّارْصْ وَارْ إِتّڭّْ
أَربِّي ثُوعفّْنَا،
أَمْزمَّارْ خْ كُوڒْشِي وَارْ إِسّْفَارِّيغْ شّْرعْ.
١٣ مَانْ ونْ ث إِوكّْڒنْ خْ ثمُّورْثْ،
مَانْ ونْ إِسَّارْسنْ مَارَّا دُّونشْثْ؟
١٤ مَاڒَا نتَّا أَذْ خَاسْ إِسّْنقْڒبْ ؤُڒْ نّسْ،
مَاڒَا أَذْ غَارسْ د-يَاوِي عَاوذْ
بُوحْبڒْ نّسْ ذ نّفْسْ نّسْ،
١٥ مَارَّا بْنَاذمْ ذ ڒْْمَاڒْ
أَذْ سُّوفّْغنْ بُوحْبڒْ
ؤُ بْنَاذمْ أَذْ إِعْقبْ غَارْ ؤُشَاڒْ.
١٦ مَاڒَا ذَايكْ ڒفْهَامثْ، سڒْ خنِّي إِ مَانْ أَيَا،
أوْشْ أَمزُّوغْ نّشْ
إِ ڒْْحسّْ ن وَاوَاڒنْ إِنُو.
١٧ مَا إِزمَّارْ ونِّي إِشَارّْهنْ ڒْْحقّْ
أَذْ إِحْكمْ،
نِيغْ ثخْسذْ شكْ أَذْ ثذْعِيذْ
خْ ونِّي إِدْجَانْ ذ أَمْسڭّذْ ذ أَمقّْرَانْ؟
١٨ مَا أَذْ إِنِينْ إِ ؤُجدْجِيذْ:
’شكْ وَارْ ثْسكّْوِيذْ وَالُو!‘
ؤُ إِ ثَارْوَا ن ثَاصِيڒثْ: ’كنِّيوْ ذ إِعفَّاننْ‘؟
١٩ مَامّشْ خنِّي إِ ونِّي
وَارْ إِسِّيزْوِيڒِينْ ڒْْحُوكَّامْ
ؤُ وَارْ إِتّْرِيحْ أَكْ-ذ بُو-وَاڭْڒَا خْ ؤُمزْڒُوضْ،
مَاغَارْ مَارَّا نِيثْنِي
ذ ڒْْخذْمثْ ن إِفَاسّنْ نّسْ.
٢٠ مُّوثنْ ذڭْ ورْمَاشْ ن وَابْڒِيونْ،
ذڭْ وزْينْ ن دْجِيڒثْ.
تّْوَانْهزّنْ نِيثْنِي، ڒْْڭنْسْ نِّي،
ؤُشَا هلّْكنْ.
ونِّي غَارْ ثدْجَا صُّولْطَا
إِتّْوَاعَارّنْ غَارْ ؤُغزْذِيسْ،
بْڒَا مَا إِحَاذَا إِ-ث ؤُفُوسْ ن بْنَاذمْ.
٢١ مَاغَارْ ثِيطَّاوِينْ نّسْ خزَّارنْثْ
غَارْ إِبْرِيذنْ ن مْكُوڒْ إِجّْ،
نتَّا إِتّْوَاڒَا مْلِيحْ مَارَّا إِصُورَافْ نْسنْ.
٢٢ وَارْ ثدْجِي ثُوبَّارْشنْثْ
ؤُ وَارْ ثدْجِي ثِيڒِي ن ڒْْموْثْ،
مَانِي زمَّارنْ أَذْ نُّوفَّارنْ
إِنِّي إِتّڭّنْ ڒْْغَارْ.
٢٣ وَارْ ذ أَسْ إِتّْخصِّي أَذْ إِخْزَارْ
ذِي بْنَاذمْ أَطَّاسْ ن ڒْْوقْثْ،
قْبڒْ إِ د غَا يَاذفْ غَارْ دّعْوثْ
زَّاثْ إِ ؤُغمْبُوبْ ن أَربِّي.
٢٤ إِڒبّزْ جّْوَاحڒْ بْڒَا أَسقْسِي
ؤُشَا إِڭَّا إِنّغْنِي ذڭْ ومْشَانْ نْسنْ.
٢٥ مَاغَارْ نتَّا إِسّنْ ثِيمڭَّا نْسنْ،
إِسّْنقْڒَابْ إِ-ثنْ ذِي دْجِيڒثْ ؤُشَا تّْوَاڒبْزنْ.
٢٦ إِشَّاثْ إِ-ثنْ جَارْ إِعفَّاننْ،
ذڭْ إِجّْ ومْشَانْ
مَانِي تّْبدَّانْ إِوْذَانْ تّْوَاڒَانْ،
٢٧ مِينْزِي نِيثْنِي حيّْذنْ خَاسْ،
وَارْ تّْحكِّيرنْ مَارَّا إِبْرِيذنْ نّسْ،
٢٨ مَاحنْذْ أَذْ خَاسْ إِسِّيوضْ
ثْغُويِّيثْ ن إِمزْڒَاضْ،
ؤُ مَاحنْذْ أَذْ إِسْثَاجبْ
إِ إِغُويَّانْ ن ڒْْمُوسَاكِينْ.
٢٩ مَاڒَا نتَّا يِيوِي-د ڒْْهُوذْنثْ،
مَانْ ونْ ذَايسْ إِ غَا إِڭّنْ ڒْْعِيبْ؟
مَاڒَا إِسّْنُوفَّارْ أَغمْبُوبْ نّسْ،
وِي ث غَا إِژَارنْ؟
إِحكّمْ ڒَْا خْ ڒْْڭنْسْ أَمْ خْ بْنَاذمْ،
٣٠ حِيمَا وَارْ إِحكّمْ ؤُڒَا ذ إِجّْ ن بْنَاذمْ
إِ إِتّڭّنْ س ثْنَاينْ ن وُوذْمَاونْ،
ؤُ حِيمَا وَارْ تِّيڒِينْثْ عَاذْ ثْخشِيفِينْ إِ ڒْڭنْسْ.
٣١ مْڒِي إِنَّا بْنَاذمْ نِّي إِ أَربِّي
’سّْڭعّْذغْ إِخفْ إِنُو،
وَارْ تّْعِيوِيذغْ أَذْ ڭّغْ ڒْْغَارْ.
٣٢ مِينْ وَارْ تّْوِيڒِيغْ، سْغَارْ أَيِي ث شكْ!
مَاڒَا ڭِّيغْ مِينْ وَارْ إِسڭّْذنْ،
وَارْ ث تّڭّغْ عَاذْ.‘
٣٣ مَا إِتّْخصَّا أَذْ إِخْڒفْ نتَّا
أَمْ مَامّشْ ث ثخْسذْ شكْ؟
أَقَا ثسّحْقَارذْ ث!
أَقَا ثخْسذْ أَذْ ثِيخْضَارذْ س يِيخفْ نّشْ،
نشّْ مَاشَا لَّا!
مَاڒَا إِتّْغِيڒْ أَشْ أَقَا ثسّْنذْ ت، إِنِي ت!
٣٤ إِرْيَازنْ س ڒفْهَامثْ أَذْ أَيِي إِنِينْ،
أَمْ قَاعْ أَرْيَازْ أَمِيغِيسْ إِتّسْڒَا-د غَارِي،
٣٥ أَقَا أَيُوبْ وَارْ إِسِّيوڒْ س ثُوسّْنَا،
أَقَا أَوَاڒنْ نّسْ بْڒَا ڒفْهَامثْ إِ يدْجَانْ.
٣٦ إِوَا، أجّْ أَيُوبْ أَذْ إِتّْوَاقدْجبْ أَڒْ أَنڭَّارْ،
مِينْزِي إِتَّارَّا-د
أَمْ إِرْيَازنْ شُّورنْ س ڒْْمُوعْصِييّثْ.
٣٧ مَاغَارْ إِ دّنْبْ نّسْ يَارنِّي عَاذْ أَعذِّي،
جَارْ أَنغْ إِشَّاثْ شَامْخَا س إِفَاسّنْ
ؤُ تّْمَارنْينْ وَاوَاڒنْ نّسْ
ضِيدّْ إِ أَربِّي.