٣٣
إِلِيهُو يَارنِّي ذِي ڒْحَارْضْ أَمزْوَارُو نّسْ
١ سڒْ ڒخُّو غَارْ ڒْْهَارْذْ إِنُو، أَيُوبْ،
أوْشْ أَمزُّوغْ إِ وَاوَاڒنْ إِنُو مَارَّا.
٢ خْزَارْ، أَرْزْمغْ أَقمُّومْ إِنُو،
إِسَّاوَاڒْ يِيڒسْ إِنُو سَاذُو وَانغْ إِنُو.
٣ تّفّْغنْ وَاوَاڒنْ إِنُو
زِي ڒصْفَايثْ ن وُوڒْ إِنُو،
ثُوسّْنَا ثقُّورْ أَذْ خَاسْ هَارّْذنْ
إِينْشِيشنْ إِنُو.
٤ أَرُّوحْ ن أَربِّي إِڭَّا أَيِي،
أَسُوضِي ن نّفْسْ ن ؤُمْزمَّارْ خْ كُوڒْشِي
إِوْشَا أَيِي ثُوذَارْثْ.
٥ مَاڒَا ثْزمَّارذْ، أَرّْ-د خَافِي.
سَارْسْ أَيِي ثَامسْڒَاشْثْ، بدّْ زَّاثِي!
٦ خْزَارْ، نشّْ أَمْ شكْ زَّاثْ إِ أَربِّي،
ؤُڒَا ذ نشّْ تّْوَاڭّغْ زڭْ ؤُبدْجَاعْ.
٧ خْزَارْ، أَهُوذِّي إِنُو
وَارْ شكْ إِسِّيڭّْوِيذْ شَا،
وَارْ خَاكْ تّْزيَّارغْ شَا أَطَّاسْ.
٨ س ثِيذتّْ، أَقَا ثنِّيذْ ث
ذڭْ إِمزُّوغنْ إِنُو،
سْڒِيغْ إِ ڒْْحسّْ ن وَاوَاڒنْ-أَ:
٩ ’نشّْ ذ أَمزْذَاڭْ، بْڒَا دّنْبْ،
ذ أَفُورِّي إِ دْجِيغْ،
وَارْ ذَايِي شَا ن ڒْْمُوعْصِييّثْ.
١٠ خْزَارْ، نتَّا يَارزُّو سِّيبّثْ
حِيمَا أَذْ زَّايِي إِشثْشَا،
إِحسّبْ أَيِي ذ ڒعْذُو نّسْ.
١١ إِضَارنْ إِنُو إِقّنْ إِ-ثنْ غَارْ ؤُكشُّوضْ،
إِحطَّا مَارَّا إِمسْرَاقْ إِنُو.‘
١٢ خْزَارْ، أَذْ أَشْ إِنِيغْ،
وَارْ ثدْجِيذْ شَا ذ أَمْسڭّذْ ذڭْ ؤُيَا،
مَاغَارْ أَربِّي ذ أَمقّْرَانْ خْ بْنَاذمْ.
١٣ مِينْ خفْ كِيذسْ ثتّمْعَارِّيذْ؟
أَقَا نتَّا وَارْ إِتّڭّْ ڒحْسَابْ
إِ مَارَّا ثِيمڭَّا نّسْ!
١٤ مَاغَارْ أَربِّي إِسَّاوَاڒْ إِشْثْ ن ثْوَاڒَا،
وَاهْ، ثْنَاينْ ن ثْوَاڒَاوِينْ،
مَاشَا بْنَاذمْ وَارْ إِحطِّي:
١٥ ذِي ثِيرْجَا، س إِجّْ ن ڒوْحِييْ ذِي دْجِيڒثْ،
خْمِي د-إِوطَّا يِيضصْ يُودْجْغنْ خْ إِوْذَانْ،
ذڭْ ؤُنُوذمْ ذِي ڒشْثُو.
١٦ خنِّي يَارزّمْ نتَّا
أَمزُّوغْ ن إِوْذَانْ،
إِتّْشمّعْ س ؤُشمِّيعْ نّسْ
خْ ؤُودّبْ نْسنْ،
١٧ حِيمَا أَذْ إِسّْحيّذْ بْنَاذمْ
خْ ثْمڭِّيثْ نّسْ ثَاعفَّانْثْ،
حِيمَا أَذْ إِسّْبدّْ نّْفَاخثْ خْ ورْيَازْ.
١٨ نتَّا إِمنّعْ ڒعْمَارْ نّسْ زِي ثُورْصُوضِي،
ثُوذَارْثْ نّسْ زڭْ ؤُهلّكْ س لَانْسَا.
١٩ إِجيّحْ إِ-ث ڒحْرِيقْ ذِي قَامَا نّسْ
ؤُڒَا ذ أَمنْغِي ڒبْذَا ذڭْ إِغْسَانْ نّسْ.
٢٠ ثُوذَارْثْ نّسْ ثَارَّا إِ-ث إِتّْعِيفَّا أَغْرُومْ
ؤُ ڒعْمَارْ نّسْ يَارَّا إِ-ث إِتّْعِيفَّا
مَاشَّا إِصبْحنْ أَطَّاسْ.
٢١ إِقطَّا ويْسُومْ نّسْ زڭْ وُوذمْ نّسْ،
إِخْسَانْ نّسْ نِّي وَارْ تّْوَاژْرِينْ عمَّارْصْ،
أَقَا تّْبَاننْ ڒخُّو.
٢٢ إِتّْقَارَّابْ ڒعْمَارْ نّسْ غَارْ ثُورْصُوضِي،
ثُوذَارْثْ نّسْ غَارْ إِجَارَّاينْ ن ڒْْموْثْ.
٢٣ مَاڒَا خنِّي ذِينْ إِجّْ ن لْمَالَاكْ
إِبدّْ أَسْ-د غَارْ ؤُغزْذِيسْ،
إِجّْ ن ڒْْعَاذڒْ، إِجّنْ زڭْ وَاڒفْ،
حِيمَا أَذْ إِسّْشنْ إِ بْنَاذمْ ثَاسڭْذَا نّسْ،
٢٤ خنِّي أَذْ خَاسْ إِحِينّْ، أَذْ يِينِي:
’فكّْ إِ-ث، أَڒَامِي نتَّا
وَارْ إِهكّْوِي غَارْ ثُورْصُوضِي ذڭْ ونْضڒْ،
أَقَا نشّْ ؤُفِيغْ أَصْڒَاحْ خَاسْ!‘
٢٥ خنِّي أَذْ ثْنعْنعْ أَرِّيمثْ نّسْ
كْثَارْ زِي طّْرِي ن ثمْژِي،
أَذْ د-إِذْوڒْ غَارْ وُوسَّانْ ن ثمْژِي نّسْ.
٢٦ نتَّا أَذْ إِتَّارْ أَربِّي س ثُوثْرَا يُودْجْغنْ
ؤُ نتَّا أَذْ خَاسْ يَارْضَا،
أَڒَامِي وَانِيثَا أَذْ إِژَارْ ؤُذمْ نّسْ
ذڭْ ؤُسْڒِيوْڒوْ ن ڒفْرَاحثْ،
ؤُ أَمُّو إِ غَا يَارّْ نتَّا
إِ بْنَاذمْ ثَاسڭْذَا نّسْ.
٢٧ أَذْ إِغنّجْ إِ يوْذَانْ، أَذْ يِينِي:
’نشّْ خْضِيغْ، سّْفَارْغغْ مِينْ إِسڭّْذنْ،
مَاشَا نتَّا وَارْ زَّايِي ت يخْڒِيفْ.
٢٨ إِفكّْ أَربِّي ڒعْمَارْ إِنُو
زِي ثُورْصُوضِي ذڭْ ونْضڒْ،
ثُوذَارْثْ إِنُو ثْخزَّارْ
أَمُّو ذ وَامُّو ذِي ثْفَاوْثْ.‘
٢٩ خْزَارْ، مَارَّا أَيَا إِتّڭّْ إِ-ث أَربِّي،
ثْنَاينْ نِيغْ ثْڒَاثَا ن ثْوَاڒَاوِينْ
أَكْ-ذ ورْيَازْ،
٣٠ حِيمَا أَذْ إِسّعْقبْ ڒعْمَارْ نّسْ
زِي ثُورْصُوضِي ذڭْ ونْضڒْ،
حِيمَا أَذْ ث يَارّْ يَارقّْ س ثْفَاوْثْ ن ثُوذَارْثْ.
٣١ حْضَا، أَيُوبْ! سڒْ-د غَارِي!
سْقَارْ، خنِّي نشّْ أَذْ سِّيوْڒغْ.
٣٢ مَاڒَا غَاركْ أَوَاڒنْ وجْذنْ،
أَرّْ-د خَافِي،
سِيوڒْ، مَاغَارْ غَارِي س ڒْْخَاضَارْ
أَذْ خَاكْ بَارِّيغْ.
٣٣ مَاڒَا لَّا، سڒْ-د غَارِي!
سْقَارْ، ؤُ أَذْ أَشْ سّْغَارغْ ثِيغِيثْ.