٣٢
ڒْهَارْدْ أَمزْوَارُو ن إِلِيهُو: ثَامزْوَارُوثْ
١ خنِّي سّْبدّنْ ثْڒَاثَا ن يرْيَازنْ نِّي مَاحنْذْ أَذْ د-أَرّنْ خْ أَيُوبْ، مِينْزِي ثُوغَا ذ أَمْسڭّذْ جَارْ ثِيطَّاوِينْ ن يِيخفْ نّسْ.
٢ خَاسْ ؤُشَا يَارْغَا لْغَاضَابْ ن إِلِيهُو، مِّيسْ ن بَارَاخْيِيلْ، زِي ثمُّورْثْ ن بُوزْ، زِي ڒَْادْجْ ن رَامْ. يَارْغَا لْغَاضَابْ نّسْ خْ أَيُوبْ مِينْزِي إِڭَّا وَانِيثَا إِخفْ نّسْ ذ أَمْسڭّذْ خْ أَربِّي.
٣ يَارْغَا لْغَاضَابْ نّسْ ؤُڒَا خْ ثْڒَاثَا ن إِمدُّوكَّاڒْ نّسْ، مَاغَارْ نِيثْنِي، وَاخَّا وَارْ ؤُفِينْ مِينْ زِي خَاسْ إِ د غَا يَارّنْ، أَرِّينْ ڒْْعِيبْ ذِي أَيُوبْ.
٤ إِلِيهُو مَاشَا ثُوغَا إِرَاجَا س وَاوَاڒنْ قِيبَاتْشْ إِ أَيُوبْ، مِينْزِي نِيثْنِي ثُوغَا مْغَارنْ خَاسْ.
٥ ؤُمِي إِژْرَا إِلِيهُو، أَقَا ثْڒَاثَا ن يرْيَازنْ نِّي وَارْ ؤُفِينْ مِينْ زِي د غَا يَارّنْ عَاذْ، يَارْغَا ؤُخيّقْ نّسْ.
٦ ؤُشَا إِطّفْ إِلِيهُو، مِّيسْ ن بَارَاخِيلْ، زِي بُوزْ، ذڭْ وَاوَاڒْ، إِنَّا:
نشّْ ذ أَمژْيَانْ ذڭْ إِسڭّْوُوسَا
ؤُ كنِّيوْ ذ إِمشَّايْبُوثنْ.
خْ ؤُيَا رَاجِيغْ ؤُ بُّورّْنغْ
مَاحنْذْ أَذْ أَومْ سّشْنغْ ثُوسّْنَا إِنُو.
٧ نشّْ نِّيغْ:
’أجّْ إِنِّي إِمْغَارنْ ذڭْ وُوسَّانْ أَذْ سِّيوْڒنْ،
أجّْ ڒْْقدّْ أَمقّْرَانْ
ن إِسڭّْوُوسَا ن ؤُمشَّايْبُو أَذْ إِسَّارْڭبْ ثِيغِيثْ.‘
٨ س ثِيذتّْ، بُوحْبڒْ إِزْذغْ ذِي بْنَاذمْ،
أَسُوضِي ن نّفْسْ ن ؤُمْزمَّارْ خْ كُوڒْشِي
إِتِّيشْ أَسنْ ڒفْهَامثْ.
٩ إِنِّي إِمْغَارنْ ذڭْ إِسڭّْوُوسَا
وَارْ ذَايْسنْ ثدْجِي ثِيغِيثْ،
إِوسُّورَا وَارْ فهّْمنْ إِ شّْرعْ.
١٠ س ؤُيَا قَّارغْ: ’سْڒمْ-د غَارِي،
خنِّي ؤُڒَا ذ نشّْ أَذْ سّشْنغْ ثُوسّْنَا إِنُو.‘
١١ خْزَارْ، رَاجِيغْ أَوَاڒنْ نْومْ،
سّْحسّغْ غَارْ ڒفْهَامثْ نْومْ،
أَمْ ثُوغَا ثَارزُّومْ خْ وَاوَاڒنْ إِسڭّْمنْ.
١٢ نشّْ حْضِيغْ كنِّيوْ مْلِيحْ،
أَقَا ذَا، ؤُڒَا ذ إِجّنْ ثُوغَا إِزمَّارْ
أَذْ إِسّقْنعْ أَيُوبْ،
ؤُڒَا ذ إِجّنْ زَّايْومْ وَارْ إِزمَّارْ
أَذْ د-يَارّْ خْ وَاوَاڒنْ نّسْ.
١٣ س ؤُيَا وَارْ قَّارمْ:
’نشِّينْ نُوفَا ثِيغِيثْ!
أَربِّي إِزمَّارْ أَذْ ث إِنْضَارْ،
وَارْ إِدْجِي بْنَاذمْ.‘
١٤ وَارْ دْجِينْ وَاوَاڒنْ نّسْ خَافِي
ؤُ س وَاوَاڒنْ نْومْ وَارْ خَاسْ د-أَرِّيغْ.
١٥ تّْوَارْنَانْ نِيثْنِي، وَارْ د-تَّارِّينْ عَاذْ،
أَوَاڒنْ تّْوَاكّْسنْ زَّايْسنْ.
١٦ ڒَْاجِيغْ، مَاشَا وَارْ سِّيوْڒنْ،
مَاغَارْ سّْبدّنْ أَوَاڒْ،
وَارْ د-تَّارِّينْ عَاذْ.
١٧ ؤُڒَا ذ نشّْ خْسغْ
أَذْ د-أَرّغْ ذِي نُّوبثْ إِنُو،
ؤُڒَا ذ نشّْ أَذْ سّشْنغْ ثُوسّْنَا إِنُو.
١٨ مَاغَارْ شُّورغْ س وَاوَاڒنْ،
إِحسَّارْ أَيِي بُوحْبڒْ ذِي ذَاخڒْ إِنُو.
١٩ خْزَارْ، أَعذِّيسْ إِنُو إِتّڭّْ
أَمْ ثْزِييَّاثْ ن بِينُو
وَارْ يَارْزِيمنْ عَاذْ،
أَمْ ثْخُونْشَايْ ن يِيڒمْ ن جْذِيذْ،
أَقَا إِتّڭّْ أَخْمِي إِ غَا إِدُّوقّزْ.
٢٠ أَذْ سِّيوْڒغْ، حِيمَا أَذْ فْسُوسغْ،
أَذْ أَرْزْمغْ إِينْشِيشنْ إِنُو، أَذْ د-أَرّغْ.
٢١ وَارْ تّڭِّيغْ س وُوذْمَاونْ أَكْ-ذ ؤُڒَا ذ إِجّْ،
وَارْ سِّيوْڒغْ ؤُڒَا أَكْ-ذ إِجّْ ن بْنَاذمْ
س وَاوَاڒنْ إِمِيژِيذنْ.
٢٢ مَاغَارْ وَارْ زمَّارغْ أَذْ ڭّغْ
س وَاوَاڒنْ إِمِيزِيضنْ،
مَاغَارْ خنِّي أَذْ أَيِي إِكّسْ
ونِّي إِ ذ أَيِي إِڭِّينْ.