٣٦
ڒْهَارْدْ وِيسّْ أَربْعَا ن إِلِيهُو خْ ؤُجَارّبْ ذ وعْقَابْ غَارْ أَربِّي
١ يَارْنِي إِلِيهُو ذڭْ وَاوَاڒْ، إِنَّا:
٢ صْبَارْ شْوَايْثْ أَكِيذِي،
خنِّي نشّْ أَذْ أَشْ سّشْنغْ،
أَقَا ذِينْ عَاذْ ڒسْبَابْ كْثَارْ
ذِي طّْوعْ ن ثْمسْڒَاشْثْ ن أَربِّي.
٣ نشّْ أَذْ د-أَوْيغْ ثُوسّْنَا إِنُو
زِي ڒَْاڭّْوَاجْ،
أَذْ نعْمغْ ثَاسڭْذَا
ن ونِّي ذ أَيِي د-إِخڒْقنْ.
٤ مَاغَارْ س ثِيذتّْ،
أَوَاڒنْ إِنُو وَارْ دْجِينْ ذ إِخَارِّيقنْ،
أَقَا ذَا زَّاثكْ ونِّي ذ بُو-ثُوسّْنَا س ثِيذتّْ.
٥ خْزَارْ، أَربِّي إِمْغَارْ أَطَّاسْ،
مَاشَا وَارْ إِسّحْقِيرِي حذْ،
إِمْغَارْ جّْهذْ ن ڒفْهَامثْ نّسْ.
٦ أَعفَّانْ وَارْ ث إِتّجِّي أَذْ إِدَّارْ،
مَاشَا إِ إِمزْڒَاضْ إِتَّاغْ أَسنْ ثَاسْغَارْثْ نْسنْ.
٧ نتَّا وَارْ إِسّْحيِّيذْ ثِيطَّاوِينْ نّسْ
خْ ؤُمْسڭّذْ،
مَاشَا إِسّْغِيمِي ثنْ إِ ڒبْذَا
خْ ڒْْعَارْشْ أَكْ-ذ إِجدْجِيذنْ،
ؤُشَا أَمُّو إِ غَا تّْوَاسُّوعْڒَانْ.
٨ مَاڒَا تّْوَاوْثنْ نِيثْنِي ذِي ڒڭْيُوضْ،
تّْوَاحبّْسنْ ذِي سّْنَاسڒْ نْ ڒغْبنْ،
٩ خنِّي إِسّْشنْ أَسنْ ثِيمڭَّا نْسنْ
ذ إِعذِّيينْ نْسنْ،
أَقَا مْغَارنْ أَطَّاسْ.
١٠ يَارزّمْ أَمزُّوغْ نْسنْ إِ ؤُوبّخْ،
إِقَّارْ أَسنْ أَذْ د-ذوْڒنْ
زِي ڒْمُوعْصِييّثْ نْسنْ.
١١ مَاڒَا سْڒِينْ ؤُ سخَّارنْ أَسْ،
أَذْ سّْقفْڒنْ ذڭْ وفْڒَاحْ ؤُسَّانْ نْسنْ
ؤُ ذِي زّْهَارْ إِسڭّْوُوسَا نْسنْ.
١٢ مَاشَا مَاڒَا وَارْ سْڒِينْ،
أَذْ تّْوَاهلّْكنْ س لَانْسَا،
أَذْ سُّوفّْغنْ بُوحْبڒْ
أَمْ وَارْ غَارْسنْ ثدْجِي بُو ثُوسّْنَا.
١٣ نِيثْنِي إِنِّي إِسّْنِيعْمِيڒنْ ذڭْ وُوڒْ نْسنْ،
تّْستَّافنْ أَغْضَابْ،
وَارْ ثتَّارنْ أَعَاونْ
مَاڒَا نتَّا إِشَارْفْ إِ-ثنْ.
١٤ ڒعْمَارْ نْسنْ أَذْ إِمّثْ
ؤُمِي نِيثْنِي عَاذْ ذِي ثمْژِي،
مَاغَارْ دَّارنْ جَارْ إِمثْليّنْ.
١٥ أَذْ إِفكّْ أَمزْڒُوضْ ذِي ڒغْبنْ نّسْ،
ذِي دّدْجْ أَذْ يَارْزمْ أَمزُّوغْ نْسنْ.
١٦ أَمُّو إِ غَا إِعَارّنْ ؤُڒَا ذ شكْ
زڭْ وُوضُوفْ ن ڒحْصَارثْ،
غَارْ تَّاسِيعْ مَانِي وَارْ إِتِّيڒِي عَاذْ ؤُنذْقفْ،
مَانِي إِ غَا ثِيڒِي طَّابْڒَا نّشْ
ثشُّورْ س مَاشَّا إِ ذَايسْ ثَاذُونْثْ.
١٧ مَاشَا شكْ ثنُّوغذْ
ذِي شّْرعْ أَكْ-ذ ؤُعفَّانْ،
مَاشَا دّعْوثْ ذ ثنْفُوتْشْ
تَّاسنْثْ-إِ-د أَكْ-ذ وَايَاوَايَا.
١٨ حْضَا أَقَا أَسْعَارْ
وَارْ شكْ إِتّْغَارِّي إِ ؤُسْثهْزِي
ؤُ ڒْْقدّْ ن دّيّثْ
وَارْ شكْ إِسُّوفُّوغْ زڭْ وبْرِيذْ.
١٩ مَا إِغُويَّانْ نّشْ
أَذْ شكْ سَّارنْ زِي ڒحْصَارثْ،
نِيغْ مَارَّا مِينْ ثتّڭّذْ
س مَارَّا ثِيزمَّارْ نّشْ؟
٢٠ وَارْ تّْمژْرِي ذِي دْجِيڒثْ،
خْمِي غَا تّْوَاكّْسنْ ڒڭْنُوسْ
زڭْ ومْشَانْ نْسنْ.
٢١ حْضَا إِخفْ نّشْ، وَارْ ڭُّورْ
خْ ؤُغزْذِيسْ مَانِي إِتّْوَافّْ ڒْْغشّْ،
أَقَا شكْ أَذْ ثِيخْذَارذْ أَيَا خْ وَاضَارْ.
٢٢ خْزَارْ، أَربِّي إِسّْعُودْجْ س جّهْذْ نّسْ،
مَانْ ونْ إِدْجَانْ ذ أَمْسڒْمَاذْ أَمْ نتَّا؟
٢٣ مَانْ ونْ إِ ذ أَسْ إِسّْشَاننْ أَبْرِيذْ؟
نِيغْ مَانْ ونْ إِ ذ أَسْ إِنَّانْ:
’شكْ ثڭِّيذْ ڒْْغشّْ‘؟
٢٤ عْقڒْ أَذْ ثسّْعُودْجِيذْ
ڒْْخذْمثْ ن إِفَاسّنْ نّسْ،
ڒْْخذْمثْ نّسْ إِ زِي تّْغنَّاجنْ إِوْذَانْ.
٢٥ كُوڒْ بْنَاذمْ إِتّْوَاڒَا ت،
زِي ڒَْاڭّْوَاجْ تّْوَاڒَانْ ت إِوْذَانْ.
٢٦ خْزَارْ، أَربِّي ذ أَمقّْرَانْ،
وَارْ نْزمَّارْ أَذْ أَسْ نفْهمْ،
ڒْْقدّْ ن إِسڭّْوُوسَا نّسْ
وَارْ نْزمَّارْ أَذْ ذَايسْ نَارْزُو.
٢٧ مَاغَارْ نتَّا إِجبّذْ
ثُوذِّيمِينْ ن وَامَانْ،
ثِينِّي د-إِتّْوَاكّْسنْ زِي ثَايُّوثْ
خنِّي ذوْڒنْثْ ذ أَنْژَارْ،
٢٨ أَنْژَارْ نِّي زِي تّْنسْنِيسِينْ إِسيْنُوثنْ،
أَنْژَارْ نِّي د إِوطَّانْ
س ؤُفيّضْ خْ إِوْذَانْ.
٢٩ مَانْ ونْ إِتّْحَاكَانْ عمَّارْصْ
ذڭْ ؤُبزّعْ ن إِسيْنُوثنْ،
ؤُڒَا ذ ڒْْحسّْ إِسّڭّْوَاذنْ
زِي ثخْزَانْثْ نّسْ؟
٣٠ خْزَارْ، إِتّْبزّعْ ثَافَاوْثْ نّسْ
ثِيوَا ن يِيخفْ نّسْ،
إِتّْڒحَّافْ زَّايسْ
طّْڒُوفَا يُودْجْغنْ قَاعْ ن ڒبْحَارْ.
٣١ مَاغَارْ س ؤُيَا إِتّْشَارّعْ ڒڭْنُوسْ.
إِتِّيشّْ مَاشَّا س وَاطَّاسْ.
٣٢ إِتّْشُورَّا إِفَاسّنْ نّسْ س ثْفَاوْثْ،
إِوصَّا ت أَذْ ثڒْقفْ ثَانْذَايْثْ.
٣٣ أَضَارْضحْ ن وَاسَّامنْ إِتّْبَارّحْ زَّايسْ،
ؤُڒَا ذ ثَاحِيمَارْثْ ثتّْبَارّحْ
أَقَا نتَّا أَذْ د-يَاسْ.