٢
سِيذِي أَذْ د-يَارّْ خْ حَابَاقُّوقْ إِ ثْوَاڒَا وِيسّْ ثْنَاينْ
١ نشّْ أَذْ بدّغْ
ذڭْ ومْشَانْ ن ثْعسَّاسْثْ إِنُو
ؤُ أَذْ سّْبدّغْ إِخفْ إِنُو
خْ صُّومْعثْ ن ثْعسَّاسْثْ،
أَذْ صوْضغْ مَاحنْذْ أَذْ ژَترغْ
مِينْ إِ ذ أَيِي غَا يِينِي نتَّا،
ؤُ مِينْ إِ د غَا يَارّغْ خْ ؤُشثْشِي إِنُو.
٢ يَارَّا-د خَافِي سِيذِي، إِنَّا:
أَرِي ڒوْحِييْ
أَرِي ث إِفَارْزْ خْ ثڒْوِيحِينْ،
مَاحنْذْ ونِّي إِعدُّونْ
أَمْ د-إِتَّازّڒْ، إِزمَّارْ أَذْ ث إِغَارْ.
٣ مَاغَارْ ڒوْحِييْ إِتّْرَاجَا عَاذْ
أَڒْ ڒْْوقْثْ نِّي يُورَانْ.
إِتّمْحِيزْوَارْ غَارْ ؤُقطُّو
ؤُ وَارْ إِسّْخَارِّيقْ شَا.
مَاڒَا إِقِّيمْ وَارْ د-إِتِّيسْ، قِّيمْ رَاجَا ث،
مَاغَارْ أَذْ د-يَاسْ س ثِيذتّْ،
وَارْ إِعطَّاڒْ.
٤ خْزَارْ، أَقَا إِتُّوفّْ، وَاهْ،
ڒعْمَارْ نّسْ وَارْ إِسڭّمْ ذَايسْ،
مَاشَا أَمْسڭّذْ س لْ-إِيمَانْ نّسْ أَذْ إِدَّارْ.
٥ س ثِيذتّْ، بِينُو أَقَا إِشمّثْ!
بِينُو أَقَا-ث أَمْ يِيجّْ ن بُو-نّْفَاخثْ
ونِّي وَارْ إِتَّاريّْحنْ،
ونِّي إِسّمْغَارَانْ ڒعْمَارْ نّسْ
أَمڒْهَافْ أَمْ ڒَْاخَارْثْ.
نتَّا وَارْ إِتّْجِّيوِينْ أَمْ ڒْْموْثْ
ؤُ إِيْرُو غَارسْ مَارَّا ڒڭْنُوسْ
ؤُ إِسّْمُونْ غَارسْ مَارَّا إِيْذُوذنْ.
٦ مَا وَارْ د خَاسْ تِّيوْينْ
إِجّْ ن وَاوَاڒْ إِوزْننْ
ؤُڒَا ذ إِجّْ ن يژْرِي
إِشُّورْ س ڒمْعَانِي إِنُّوفَارنْ، أَذْ إِنِينْ:
ؤُشْثْ خْ ونِّي إِجَارّْونْ
مِينْ وَارْ إِدْجِينْ نّسْ!
أَڒْ مڒْمِي عَاذْ؟
ؤُشْثْ خْ ونِّي إِسّْذقَّاڒنْ
إِخفْ نّسْ س ورْهَانْ!
٧ مَا وَارْ د-تّكَّارنْ س ڒْْغفْڒثْ
إِنِّي إِ شكْ غَا إِزعْفنْ،
ؤُ مَا وَارْ د-تّْفَاقَانْ شَا
إِنِّي شكْ غَا يَارّنْ ثتَّارْجِيجذْ،
ؤُ مَا وَارْ ذ أَسنْ ثتِّيڒِيذْ
ذ ثَاكشَّاضْثْ نْسنْ؟
٨ مَاغَارْ شكْ ثْكشّْضذْ أَطَّاسْ ن ڒڭْنُوسْ،
أَذْ شكْ كشّْضنْ مَارَّا ڒڭْنُوسْ إِقِّيمنْ
ذِي سِّيبّثْ ن إِذَامّنْ ن إِوْذَانْ
ذ لْعُونْفْ خْ ثمُّورْثْ،
ؤُ خْ ثنْذِينْثْ ؤُ خْ مَارَّا
إِنِّي ذَايسْ إِزدّْغنْ.
٩ ؤُشْثْ خْ ونِّي إِكسّْبنْ س ڒْْغشّْ
ثَاكشَّاضْثْ إِ ثَادَّارْثْ نّسْ،
مَاحنْذْ أَذْ إِبْنَا ڒْْعُوشّْ نّسْ ذِي ڒُْوعْڒَا،
حِيمَا أَذْ إِنْجمْ أَمُّو زڭْ ؤُفُوسْ ن ڒْْغَارْ.
١٠ شكْ ثْشَاوَارذْ ڒفْضِيحثْ إِ ثَادَّارْثْ نّشْ،
حِيمَا أَذْ ثقْضِيذْ خْ ڒڭْنُوسْ،
ؤُشَا أَمُّو إِ ثڭِّيذْ دّنْبْ
ذِي ڒعْمَارْ نّشْ.
١١ مِينْزِي أَژْرُو إِسْغُويُّو-د زِي ڒْْحِيضْ،
ؤُ ثَاحْنَاشْثْ ثتَّارَّا-د خَاسْ
زِي جَارْ ثفْڒَاوْثْ.
١٢ ؤُشْثْ خْ ونِّي إِبنَّانْ
إِشْثْ ن ثنْذِينْثْ س إِذَامّنْ
ؤُڒَا خْ ونِّي إِسّْرُوسَانْ ذْسَاسْ
ن يِيشْثْ ن ثنْذِينْثْ س ڒْْغشّْ!
١٣ خْزَارْ، مَا وَارْ إِدْجِي زِي سِيذِي ن ڒْْعسْكَارَاثْ،
أَقَا ڒڭْنُوسْ أَربّْرنْ إِخفْ نْسنْ إِ ثْمسِّي،
ؤُ شُّوعُوبْ تَّاحْڒنْ إِ وَالُو؟
١٤ مَاغَارْ ثَامُّورْثْ أَذْ ثتّْوَاشُّورْ
س ثُوسّْنَا ن ؤُعُودْجِي ن سِيذِي،
أَمْ مَامّشْ تّْذَاڒنْ وَامَانْ ڒبْحَارْ.
١٥ ؤُشْثْ خْ ونِّي إِ غَا إِسّسْونْ جَّارْ نّسْ،
ونِّي إِخدْجْضنْ بِينُو س سّمْ نّشْ
ؤُ خنِّي إِسّسْشَارْ إِ-ث،
مَاحنْذْ أَذْ إِژَارْ ثُوعَّارْيَانْثْ نْسنْ.
١٦ أَذْ ثسّجِّوْنذْ إِخفْ نّشْ س ڒفْضِيحثْ
ذڭْ ومْشَانْ ن شَّانْ.
سُو شكْ ڒخُّو عَاوذْ،
ؤُشَا أجّْ أَخْثَانْ نّشْ وَارْ إِدْجِينْ إِتّْبَانْ.
ڒْْكَاسْ زڭْ ؤُفُوسْ أَفُوسِي ن سِيذِي
أَذْ غَاركْ د-يَاسْ،
ؤُڒَا ذ ڒفْذِيحثْ خْ ؤُعُودْجِي نّشْ.
١٧ مَاغَارْ ڒْْعُونْفْ إِ ثڭِّيذْ ضِيدّْ إِ لُوبْنَانْ
أَذْ شكْ إِذڒْ
ؤُڒَا ذ أَردّدْجْ ن ڒْْمَاڒْ إِ زِي ثنْ ثسِّيڭّْوْذذْ،
ذِي سِّيبّثْ ن إِذَامّنْ ن إِوْذَانْ
ذ لْعُونْفْ خْ ثمُّورْثْ،
ؤُ خْ ثنْذِينْثْ ؤُ خْ مَارَّا إِنِّي ذَايسْ إِزدّْغنْ.
١٨ مَا ثِيزِي ن إِجّْ ن ڒخْيَاڒْ إِنقْشنْ،
ؤُمِي ث إِنْقشْ ؤُنقَّاشْ س يِيخفْ نّسْ،
مَانْ ثِيزِي ن يِيجّْ ن ڒخْيَاڒْ إِفسْينْ
ؤُمِي أَنقَّاشْ نّسْ
ذ إِجّْ ن ؤُمْسڒْمذْ ن إِخَارِّيقنْ،
ڒَْامِي ونِّي ث إِڭِّينْ إِتّْشڒْ خْ مِينْ إِڭَّا،
ؤُمِي إِتّڭّْ لْ-أَصْنَامْ إِڭْنَاونْ؟
١٩ ؤُشْثْ خْ ونِّي إِقَّارنْ إِ ؤُكشُّوضْ ’فَاقْ!‘
ؤُ إِ وژْرُو إِڭْنَاونْ: ’كَّارْ!‘.
مَا إِزمَّارْ أَذْ إِسّڒْمذْ؟
خْزَارْ، أَقَا ڒحّْفنْ ث س وُورغْ ذ نُّوقَارْثْ
ؤُ وَارْ ذَايسْ قَاعْ بُوحْبڒْ.
٢٠ سِيذِي أَقَا-ث ذِي زَّاوشْثْ نّسْ إِقدّْسنْ.
سُوسمْ زَّاثْ إِ وُوذمْ نّسْ،
مَارَّا ثَامُّورْثْ!