٣
ثَاژَادْجِيثْ ن حَابَاقُّوقْ
١ ثَاژَادْجِيثْ ن حَابَاقُّوقْ، أَنَابِي، ذڭْ وَاطَّاسْ ن ثْمِيجِّيوِينْ.
٢ أَ سِيذِي، ؤُمِي سْڒِيغْ ڒخْبَارْ نّشْ،
ثُوغَا تّڭّْوذغْ.
أَ سِيذِي، سْندَّارْ ڒْْخذْمثْ نّشْ عَاوذْ
ذِي ڒْْوسْطْ ن إِسڭّْوُوسَا،
سشّنْ إِ-ت ذِي ڒْْوسْطْ ن إِسڭّْوُوسَا،
ذڭْ وغْضَابْ عْقڒْ خْ ڒحْنُونشْثْ نّشْ.
٣ أَربِّي يُوسَا-د زِي ثَايْمَانْ ؤُ أَمْقدَّاسْ
زڭْ وذْرَارْ ن فَارَانْ. سِيلَاهْ.
لْعَاضَامَا نّسْ ثذْڒَا إِجنْوَانْ
ؤُ أَصبّحْ نّسْ إِشُّورْ ثَامُّورْثْ.
٤ ثُوغَا ذِينْ إِشْثْ ن ثسِّيقْثْ أَمْ ثْفَاوْثْ،
فّْغنْثْ-إِ-د فْڒِيثْشَاثْ ن وَاسَّامْ
زڭْ ؤُفُوسْ نّسْ،
أَقَا-ثنْثْ غَارسْ،
ؤُ ذَايْسنْثْ ثْنُوفَّارْ ثْزمَّارْ نّسْ.
٥ طَّاعُونْ إِتِّيزْوَارْ إِ وُوذمْ نّسْ،
ڒْْحَاذُوقْ ن ثْمسِّي إِفّغْ-د
زڭْ إِضَارنْ نّسْ.
٦ نتَّا إِكَّارْ ؤُشَا يَارَّا ثَامُّورْثْ ثتّنْهزَّا،
نتَّا إِژْرَا ؤُ إِڭَّا أَذْ أَرْجِيجنْ ڒڭْنُوسْ!
إِذُورَارْ ن زِيشْ تّْوَاڒبْزنْ
أَڒَامِي ذوْڒنْ ذ ثَاعجَّاجْثْ،
ثِيوْرِيرِينْ زِي مشْحَاڒْ ؤُيَاغنْسنْثْ!
إِبْرِيذنْ إِتّْذُومَانْ إِ ڒبْذَا أَقَا أَثنْ نّسْ.
٧ نشّْ ژْرِيغْ إِقِيضَانْ ن كُوشَانْ تّْوَاحْصَارنْ،
ثِيجَارْثِيڒِينْ ن إِقِيضَانْ ن ثمُّورْثْ ن مِيذْيَانْ
إِتَّاوِي ثنْثْ ؤُسمِّيضْ س جّهْذْ.
٨ مَا يَارْغَا وغْضَابْ ن سِيذِي خْ إِغزْرَانْ؟
مَا ثُوغَا أَغْضَابْ نّشْ ضِيدّْ إِ إِغزْرَانْ؟
مَا ثُوغَا أَذُوقّزْ نّشْ ن ؤُفُوڭمْ
ضِيدّْ إِ ڒبْحَارْ،
ڒَْامِي ثْنذْهذْ خْ ييْسَانْ نّشْ،
خْ إِكَارُّوثنْ نّشْ ن ؤُسنْجمْ؟
٩ ڒْْقوْسْ نّشْ إِتّْوَاعَارَّا مَارَّا،
ثِيجَادْجِيثِينْ إِ ثسِّيوْڒذْ ثُوغَا أَثنْثْ
ذ إِعُومَاذْ نشّْ إِ ؤُسقْسَاحْ. سِيلَاهْ.
ثْفدْجْقذْ ثَامُّورْثْ س إِغزْرَانْ.
١٠ ڒَْامِي شكْ ژْرِينْ إِذُورَارْ، إِڒْقفْ إِ-ثنْ ڒوْجعْ،
ڒْْحمْڒثْ ن وَامَانْ ثُوغَا ثْعدُّو،
أَمَانْ إِهوْڒنْ أَرِّينْ
ثْمِيجَّا نْسنْ ثتّْوَاسڒْ،
ڭعّْذنْ إِفَاسّنْ نْسنْ غَارْ ؤُجنَّا.
١١ ثَافُوشْثْ، ؤُڒَا ذ ؤُيُورْ،
قِّيمنْ بدّنْ ذِي ثْزذِّيغْثْ نْسنْ.
أَقَا رُوحنْ زِي سِّيبّثْ ن ثْفَاوْثْ
ن فْڒِيثْشَاثْ ن ڒْْقوْسْ نّشْ،
زِي سِّيبّثْ ن ثِيسِّيقْثْ
ن لَانْسَا نّشْ إِتّحْذُوذُوقنْ.
١٢ س وسْخضْ ثصُّورُوفذْ ثِيوَا إِ ثمُّورْثْ،
س وغْضَابْ نّشْ ثْعفْسذْ خْ ڒڭْنُوسْ.
١٣ شكْ ثفّْغذْ إِ ؤُسنْجمْ ن ڒْْڭنْسْ نّشْ،
إِ ؤُسنْجمْ ن ؤُمذْهُونْ نّشْ.
أَقَا شكْ ثْقدْجْعذْ
ثَازقَّا ن ثَادَّارْثْ ن ؤُعفَّانْ،
ثْعَارِّيذْ ذْسَاسْ أَڒْ إِرِي. سِيلَاهْ.
١٤ أَزدْجِيفْ ن إِعسْكَارِييّنْ نّسْ إِمزْوُورَا،
أَقَا ثسّْنُوقّْبذْ إِ-ث س لَانْسَاثْ نْسنْ.
نِيثْنِي ؤُسِينْ-دعڒْفنْ-د
مَاحنْذْ أَذْ أَيِي زدْجْعنْ.
أَقَا ذ مژْرِي نْسنْ
مَاڒَا زمَّارنْ
أَذْ شّنْ ڒْْمسْكِينْ س ثْنُوفّْرَا.
١٥ أَكْ-ذ إِيْسَانْ نّشْ ثطّْفذْ أَبْرِيذْ ذِي ڒبْحَارْ،
أَكُوفُّو ن وَامَانْ إِمقّْرَاننْ.
١٦ ڒَْامِي سْڒِيغْ، يَارْجِيجْ ؤُعذِّيسْ إِنُو.
ؤُمِي سْڒِيغْ ڒْْحسّْ نِّي، أَرْجِيجنْ إِينْشِيشنْ إِنُو،
أَخسَّارْ يُوذفْ غَارْ إِغْسَانْ إِنُو،
ؤُ نشّْ أَرْجِيجغْ ذڭْ ومْشَانْ إِنُو.
وَاخَّا أَمنِّي أَذْ رَاجِيغْ ذِي ڒْْخَاضَارْ
خْ وَاسّْ ن ڒحْصَارثْ،
خْمِي غَا إِسّْڭعّذْ خْ ڒْْڭنْسْ،
ؤُ أَذْ أَنغْ إِحْصَارْ أَكْ-ذ بَانْذِييَّاثْ نّسْ.
ڒفْرَاحثْ ن حَابَاقُّوقْ
١٧ وَاخَّا وَارْ إِتّْنُووَّارْ وَارْثُو،
ؤُ وَارْ ذِينْ ثتِّيڒِي عَاذْ ڒْْغِيدْجثْ غَارْ ثْزَايَارْثْ،
وَاخَّا ڒْْغِيدْجثْ ن زِّيثُونْ أَذْ ثفْشڒْ
ؤُڒَا ذ إِيَّارنْ وَارْ تّْغِيمِينْ تِّيشنْ ڒْْمَاشُوڒْ،
ؤُ أَذْ تّْوَاقضْعنْ وُودْجِي زِي ڒْكُوڒِي
ؤُ وَارْ تِّيڒِينْ عَاذْ إِفُونَاسنْ
ذ ثْفُونَاسِينْ ذِي ڒْْكُورِيثْ،
١٨ عَاذْ أَمنِّي نشّْ أَذْ سْڒِيوڒْوغْ إِ سِيذِي،
أَذْ فَارْحغْ زِي أَربِّي ن ؤُسنْجمْ إِنُو.
١٩ سِيذِي، سِيذِي إِنُو، نتَّا ذ جّْهذْ إِنُو.
نتَّا إِتّڭّْ إِضَارنْ إِنُو فْسُوسنْ
أَمْ يِيضَارنْ ن ثُوذَاذِينْ،
نتَّا إِتّجَّا أَيِي صُّورُوفغْ خْ ڒڭْعُوذِي.
إِ ؤُمقّْرَانْ ن إِمغْنَاجنْ.
أَكْ-ذ ؤُزنْزُونْ إِنُو خْ إِفِيڒَانْ.