حَابَاقُّوقْ
١
أَشثْشِي ن حَابَاقُّوقْ
١ ڒْْحُوكْمْ إِسَّاڭّْوَاذنْ نِّي إِژْرَا ؤُنَابِي حَابَاقُّوقْ.
٢ ”أَ سِيذِي، أَڒْ مڒْمِي إِ غَا قِّيمغْ تّْڒَاغِيغْ
ؤُ شكْ وَارْ ذ أَيِي ثتّسْڒِيذْ،
أَڒْ مڒْمِي إِ غَا قِّيمغْ تّْڒَاغِيغْ ’لْعُونْفْ!‘،
ؤُ شكْ وَارْ ذ أَيِي ثسّنْجَامذْ!
٣ مَايمِّي ذ أَيِي ثسّشْنذْ ڒْْمُوعْصِييّثْ،
ؤُ ثتّْغِيمِيذْ ثْخزَّارذْ غَارْ ڒغْبنْ؟
مَاغَارْ أَردّدْجْ ذ لْعُونْفْ
أَقَا أَثنْ أَرنْذَاذْ إِنُو،
ؤُ إِمْسَارْ ؤُمْشُوبّشْ، إِكَّارْ-د ؤُرُودّزْ.
٤ خْ ؤُيَا ثذْوڒْ شَّارِيعَا بْڒَا جّهْذْ،
ؤُ وَارْ د-إِتّفّغْعمَّارْصْ ڒْْحقّْ،
مَاغَارْ أَعفَّانْ إِتّنّضْ إِ ؤُمْسڭّذْ.
خْ ؤُيَا إِ د-إِتّفّغْ ڒْْحقّْ إِفَارْغْ.
ثَامْوَارِّيثْ ن سِيذِي خْ ثْژَادْجِيثْ
٥ خْزَارمْ جَارْ ڒڭْنُوسْ، خْزَارمْ،
إِنُّورْزمْ ؤُقمُّومْ س ؤُثبْهثْ،
مَاغَارْ نشّْ أَذْ ڭّغْ
إِشْثْ ن ڒْْخذْمثْ ذڭْ وُوسَّانْ نْومْ
إِ وَارْ ثتِّيمْنمْ مَاڒَا ت حَاجَانْ.
٦ مَاغَارْ خْزَارمْ،
نشّْ سّكَّارغْ إِكَالْذَانِييّنْ،
ڒْْڭنْسْ إِقسْحنْ ؤُ إِمْقدْجْقنْ،
ونِّي إِڭُّورنْ ذِي ڒوْسعْ ن ثمُّورْثْ،
حِيمَا أَذْ إِطّفْ ثِيزذِّيغِينْ
نِّي وَارْ إِدْجِينْ نّسْ.
٧ إِسَّاڭّْوَاذنْ ؤُ إِسّْنخْڒَاعنْ إِدْجَانْ!
ڒْْحقّْ نّسْ ذ ؤُعُودْجِي نّسْ
تّفّْغنْ-د زَّايسْ.
٨ إِيْسَانْ نّسْ فْسُوسنْ خْ ؤُغِيڒَاسْ،
نِيثْنِي مُّوزَّارنْ
مَاهُو ؤُشَّاننْ ن دْجِيڒثْ،
إِمْنَاينْ نّسْ تّْرَابَاعنْ.
إِمْنَاينْ نّسْ تَّاسنْ-د زِي ڒَْاڭّْوَاجْ،
نِيثْنِي طَّاونْ أَمْ ؤُڭِيذرْ
نِّي إِتّْقدْجْقنْ مَاحنْذْ أَذْ يشّْ.
٩ أَقَا نتَّا إِتَّاسْ-د، أَمنْ إِكْمڒْ، إِ لْعُونْفْ،
إِغمْبَابْ نْسنْ خزَّارنْ غَارْ زَّاثْ،
ؤُ نتَّا إِسّْمُونَا إِمحْبَاسْ أَمْ يجْذِي.
١٠ نتَّا إِتّْقصَّارْ خْ إِجدْجِيذنْ
ؤُ إِنِّي إِ غَارْ ثدْجَا صُّولْطَا
إِتّڭّْ إِ-ثنْ ذ ثَاضحَّاشْثْ.
وَاهْ، نتَّا إِضحّشْ خْ كُوڒْ لْقلْعَا،
مِينْزِي نتَّا إِتّْعُورّشْ ؤُشَاڒْ
ؤُشَا أَذْ ثنْثْ إِطّفْ.
١١ خنِّي أَذْ إِنّعْثَارْ أَمْ ؤُسمِّيضْ،
أَذْ إِعْذُو، أَذْ إِذْوڒْ ذ أَمذْنُوبْ،
مَاغَارْ جّهْذْ نّسْ وَانِيثَا ذ أَربِّي نّسْ.
أَشثْشِي وِيسّْ ثْنَاينْ ن حَابَاقُّوقْ
١٢ زِي مشْحَاڒْ ؤُيَا
مَا شكْ وَارْ ثدْجِيذْ ذ سِيذِي،
أَربِّي إِنُو، أَمْقدَّاسْ إِنُو؟
نشِّينْ وَارْ نتّْمتِّي شَا!
أَ سِيذِي، شكْ ثَارِّيذْ إِ-ث إِ ڒْْحُوكْمْ،
أَ ثَاصْضَارْثْ، شكْ ثْفَارْزذْ ث
مَاحنْذْ أَذْ يِيڒِي إِ لْعِيقَابْ.
١٣ شكْ ذ أَمزْذَاڭْ أَطَّاسْ ن ثِيطَّاوِينْ
حِيمَا أَذْ ثْوَاڒَانْثْ ڒْْغَارْ.
شكْ وَارْ ثْزمَّارذْ
أَذْ ثْصوْضذْ ذِي ڒْْمُوعْصِييّثْ.
مَايمِّي ثْصوْضذْ وَاهَا
ذڭْ يِينِّي إِتّڭّنْ س ڒغْذَارثْ؟
مَايمِّي إِ ثسّغْضذْ
خْمِي إِصَارّضْ ؤُعفَّانْ
إِ ونِّي إِ خَاسْ إِسڭّْذنْ؟
١٤ شكْ ثڭِّيذْ إِوْذَانْ
أَمْ يِيسڒْمَانْ ن ڒبْحَارْ،
أَمْ إِمُّوذَارْ نِّي إِتّْبُوعنْ
خْ ثمُّورْثْ إِ وَارْ غَارْ إِدْجِي ڒْْحَاكمْ!
١٥ س ثْسنَّارْثْ إِسّْڭعَّاذْ إِ-ثنْ-د مَارَّا،
إِيَارُّو إِ-ثنْ س ثْرَاشَّا نّسْ،
ؤُشَا إِسّْمُونْ إِ-ثنْ ذِي ثْرَاشَّا نّسْ ن ؤُذلَّاعْ.
خْ ؤُيَا إِفَارّحْ ؤُ إِتّْفَاجَا.
١٦ خْ ؤُيَا إِوهّبْ ثِيغَارْصَا إِ ثْرَاشَّا نّسْ،
ؤُشَا إِبخَّارْ ثِيوْهِيبِينْ ن ڒبْخُورْ
إِ ثْرَاشَّا ن ؤُذلَّاعْ نّسْ.
مِينْزِي زَّايْسنْثْ إِ ثذْوڒْ
ثسْغَارْثْ نّسْ ثمْغَارْ،
ؤُڒَا ذ مَاشَّا نّسْ أَقَا ثْڒدّْ.
١٧ مَا إِعدّڒْ أَذْ إِقِّيمْ إِسّخْوَا
ثْرَاشَّا نّسْ خْ مَانْ أَيَا،
ؤُشَا أَذْ إِقِّيمْ ڒبْذَا إِنقّْ ڒڭْنُوسْ
بْڒَا مَا أَذْ يجّْ حذْ؟