٣١
أَشُّورْ أَقَا-ث ذ إِجّْ ن وعْڒمْ إِ مِيصْرَا
١ ذڭْ ؤُسڭّْوَاسْ وِيسّْ حِيطَاشْ، ذڭْ ؤُيُورْ وِيسّْ ثْڒَاثَا، ذڭْ وَاسّْ أَمزْوَارُو ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، إِنِي إِ فِيرْعُونْ، أَجدْجِيذْ ن مِيصْرَا، ؤُ إِ مَارَّا ڒْْغَاشِي نّسْ إِنْهوْڒنْ:
’وِي أَكِيذكْ إِمْقُودَّانْ
س مَارَّا ڒمْغَارثْ نّشْ؟
٣ خْزَارْ، ثُوغَا أَشُّورْ ذ ثَاشجَّارْثْ ن ثنْڭلْثْ
خْ إِذُورَارْ ن لُوبْنَانْ
أَكْ-ذ ثْسضْوِينْ إِشْنَانْ ذ ثِيفْرَايْ إِ إِتِّيشنْ ثِيڒِي مْلِيحْ
ؤُ أَكْ-ذ ثِيذِّي ذ أَزِيرَارْ يُوعْڒَانْ،
أَڒَامِي ثُوشّنْثْ نّسْ
ثِيوضْ-د أَڒْ إِسيْنُوثنْ.
٤ أَمَانْ أَرِّينْ ت أَذْ إِيْمَا،
أَمَانْ إِهوْڒنْ سّْڭعّْذنْ ت أَطَّاسْ.
إِغزْرَانْ ن وَامَانْ نّسْ سِّيزّْڒنْ
ذڭْ ونّضْ ن ثبْهِيرْثْ نّسْ
ؤُشَا أَمَانْ إِهوْڒنْ أَرِّينْ
إِغزْرَانْ نّسْ أَذْ رَاحنْ
غَارْ مَارَّا ثِيشجِّيرَا ن ييَّارْ.
٥ خْ ؤُيَا إِتّْوَاسُّوعْڒَا ثِيذِّي نّسْ
خْ مَارَّا ثِيشجِّيرَا ن ييَّارْ،
ؤُ ثِيسضْوِينْ نّسْ ذوْڒنْثْ س وَاطَّاسْ
ؤُ إِفثْوَانْ نّسْ زُّوڭَّارْثنْ
س وَامَانْ إِفيّْضنْ،
خْمِي ثُوغَا ثسّْغمِّي.
٦ مَارَّا إِجْضَاضْ ن ؤُجنَّا
ڭِّينْ ڒْْعُوشّْ نْسنْ ذِي ثْسضْوِينْ نّسْ،
مَارَّا ڒْْمَاڒْ ن ييَّارْ
فرْخنْ سَاذُو إِفثْوَانْ نّسْ
ؤُ مَارَّا ڒڭْنُوسْ مْغَارنْ
ثُوغَا تّْغِيمَانْ ذِي ثِيڒِي نّسْ.
٧ ثُوغَا-ت ثشْنَا س ڒمْغَارثْ نّسْ
ؤُ س ثُوزّڭَّارْثْ ن ثْسضْوِينْ نّسْ،
مَاغَارْ أَژْوَارْ نّسْ
ثُوغَا-ث أَكْ-ذ وَاطَّاسْ ن وَامَانْ.
٨ ثِيشجِّيرَا ن ثنْڭلْثْ ذِي جّنّثْ ن أَربِّي
وَارْ خَاسْ عْذُونْثْ،
ثِيشجِّيرَا ن ؤُمرْزِي
وَارْ سكّْوِينْثْ ثْسضْوِينْ نّسْ
ؤُشَا ثِيشجِّيرَا ن ذُولْبْ
وَارْ سكّْوِينْثْ إِفثْوَانْ نّسْ.
ؤُڒَا ذ إِشْثْ ن ثْشجَّارْثْ ذِي جّنّثْ ن أَربِّي
ثَارْوسْ ذَايسْ ذڭْ وَاژْرِي نّسْ.
٩ ڭِّيغْ ت ثشْنَا أَكْ-ذ وَاطَّاسْ ن ثْسضْوِينْ نّسْ،
أَڒَامِي زَّايسْ ؤُسْمنْثْ
مَارَّا ثِيشجِّيرَا ن عَاذْنْ،
ثِينِّي ثُوغَا ذِي جّنّثْ ن أَربِّي.‘ “
١٠ ”س ؤُيَا، أَمُّو إِ إِقَّارْ سِيذِي إِنُو، سِيذِي:
’ؤُمِي ثسّْڭعّْذذْ إِخفْ نّمْ س ثِيذِّي نّمْ،
وَاهْ نتَّاثْ ثڭَّا ثُوشّنْثْ نّسْ
جَارْ إِسيْنُوثنْ
ؤُ ؤُڒْ نّسْ إِسّْڭعّذْ إِخفْ نّسْ
زِي سِّيبّثْ ن ڒُْوعْڒَا نّسْ،
١١ س ؤُينِّي وْشِيغْ ت ذڭْ ؤُفُوسْ
ن ونِّي ذ أَمْزمَّارْ قَاعْ جَارْ ڒڭْنُوسْ،
ونِّي إِڭِّينْ س ثِيذتّْ
أَمْ د-إِتّْڒِيقنْ أَكْ-ذ ثُوعفّْنَا نّسْ،
ؤُشَا أَمُّو إِ ؤُژّْڒغْ خَاسْ.
١٢ زذْمنْ ت إِبَارَّانِييّنْ،
ڒڭْنُوسْ إِقسْحنْ أَطَّاسْ،
زذْمنْ ث ؤُشَا جِّينْ ت.
ثِيسضْوِينْ نّسْ وْضَانْثْ خْ إِذُورَارْ
ؤُ ذِي مَارَّا ثِيغْزُورْثِينْ،
إِفثْوَانْ نّسْ تّْوَارْژنْ
ذِي مَارَّا ثِيغزْرَاثِينْ ن ثمُّورْثْ
ؤُ مَارَّا ڒڭْنُوسْ ن ثمُّورْثْ
هْوَانْ-د زِي سَاذُو ثِيڒِي نّسْ
ؤُشَا جِّينْ ت.
١٣ مَارَّا إِجْضَاضْ ن ؤُجنَّا زذْغنْ
خْ ؤُكشُّوضْ نّسْ نِّي إِوْضَانْ
ؤُشَا مَارَّا ڒْْمَاڒْ ن ييَّارْ
ثُوغَا أَثنْ خْ إِفثْوَانْ نّسْ.
١٤ نشّْ ڭِّيغْ ت،
حِيمَا مَارَّا ثِيشجِّيرَا وَارْ ذِيكّْوِيڒنْثْ عَاذْ
تّْنفّْخنْثْ س ثِيذِّي نْسنْثْ
ؤُشَا أَذْ ڭّنْثْ ثُوشّنْثْ نْسنْ ذڭْ إِسيْنُوثنْ،
ؤُ مَارَّا ثِيشجِّيرَا نِّي إِسْوِينْ أَمَانْ
س ؤُفيّضْ،
وَارْ تّْبذِّينْثْ عَاذْ س يِيخفْ نْسنْثْ
ذِي نّْفَاخثْ نْسنْثْ،
مَاغَارْ نِيثنْثِي مَارَّا
تّْوَاموْشنْثْ إِ ڒْْموْثْ،
غَارْ ڒَْادْجَاغْ ن ثمُّورْثْ،
ذِي ڒْْوسْطْ ن ثَارْوَا ن بْنَاذمْ،
أَكْ-ذ إِنِّي إِهكّْوَانْ
ذڭْ وحْفُورْ ن ونْضڒْ.‘ “
١٥ ”أَمُّو إِ إِقَّارْ سِيذِي إِنُو، سِيذِي:
’ذڭْ وَاسّْ نِّي ذِي ثهْوَا غَارْ ڒَْاخَارْثْ،
ڭِّيغْ إِجّْ وشْضَانْ.
ذِي طّْوعْ نّسْ ذْڒِيغْ أَمَانْ إِهوْڒنْ
ؤُشَا سّْبدّغْ إِغزْرَانْ نّسْ
ؤُشَا فشْڒنْ وَامَانْ إِمْغَارنْ.
ذِي طّْوعْ نّسْ سّْبَارّشْنغْ
إِذُورَارْ ن لُوبْنَانْ
ؤُشَا مَارَّا ثِيشجِّيرَا ن ييَّارْ شضْننْثْ خَاسْ.
١٦ س دّْرِيزْ ن ؤُوطُّو نّسْ سَّارْجِيجغْ ڒڭْنُوسْ،
ؤُمِي ت سّهْوِيغْ غَارْ ڒَاخَارْثْ
أَكْ-ذ إِنِّي إِهكّْوَانْ ذڭْ وحْفُورْ ن ونْضڒْ.
مَارَّا ثِيشجِّيرَا ن عَاذْنْ،
ثِينِّي إِعِيزّنْ أَطَّاسْ ذ ثِينِّي إِشْنَانْ قَاعْ
زِي لُوبْنَانْ،
ثِينِّي إِسْوِينْ أَطَّاسْ ن وَامَانْ مَارَّا،
أَقَا تّْوَاسّْفوّْجنْثْ س مَانْ أَيَا
ذِي ڒَْادْجَاغْ ن ثمُّورْثْ.
١٧ ؤُڒَا ذ نِيثنْثِي هْوَانْثْ أَكِيذسْ غَارْ ڒَْاخَارْثْ،
غَارْ إِنِّي إِتّْوَانْغنْ س سِّيفْ،
إِنِّي ثُوغَا أَغِيڒْ نّسْ إِجهْذنْ،
إِنِّي ثُوغَا إِقِّيمنْ ذِي ثِيڒِي نّسْ
ذِي ڒْوسْثْ ن ڒڭْنُوسْ.
١٨ أَكْ وِي ثْسَاوِيذْ أَمُّو ذِي ڒْْعزّْ ذ ڒمْغَارثْ
جَارْ ثْشجِّيرَا ن عَاذْنْ؟
وَاخَّا أَمنِّي أَذْ ثتّْوَاسّهْوِيذْ
أَكْ-ذ ثْشجِّيرَا نْ عَاذْنْ
أَڒْ رَادْجَاغْ ن ثمُّورْثْ.
أَذْ ثْبُوزّْڒذْ ذِي ڒْوسْثْ ن يِينِّي وَارْ إِتّْوَاخثْننْ،
أَكْ-ذ إِنِّي إِتّْوَانْغنْ س سِّيفْ.
ؤُشَا أَذْ إِنِينْ: وَا ذ فِيرْعُونْ
ذ مَارَّا ڒْْغَاشِي نّسْ إِنْهوْڒنْ!‘،
أَمُّو إِ إِقَّارْ سِيذِي إِنُو، سِيذِي.“