٣٢
إِزْڒِي ن وشْضَانْ خْ فِيرْعُونْ
١ ذڭْ ؤُسڭّْوَاسْ وِيسّْ ثنْعَاشْ، ذڭْ ؤُيُورْ وِيسّْ ثنْعَاشْ، ذڭْ وَاسّْ أَمزْوَارُو ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، سْڭعّذْ إِجّْ ن يزْڒِي ن وشْضَانْ خْ فِيرْعُونْ، أَجدْجِيذْ ن مِيصْرَا، ؤُشَا إِنِي أَسْ:
’ثُوغَا شكْ أَمْ ويْرَاذْ ذ أَمژْيَانْ
جَارْ ڒڭْنُوسْ
ؤُ ثُوغَا شكْ أَمْ ڒْْهَايْشثْ ذِي ڒبْحُورْ.
ثْغضْڒذْ إِخفْ نّشْ ذڭْ إِغزْرَانْ،
ثسّنْهزّذْ أَمَانْ س إِضَارنْ نّشْ
ؤُشَا ثسّفْسَاذْ إِغزْرَانْ نْسنْ.‘
٣ أَمُّو إِ إِقَّارْ سِيذِي إِنُو، سِيذِي:
’نشّْ أَذْ خَاكْ سّْوِيژّْضغْ ثْرَاشَّا إِنُو،
س يِيجّْ ن وڭْرَاوْ ن ڒڭْنُوسْ أَطَّاسْ.
نِيثْنِي أَذْ شكْ سِّيڒْينْ أَكْ-ذ ثْرَاشَّا إِنُو.
٤ نشّْ أَذْ شكْ جّغْ ذِي ثمُّورْثْ،
أَذْ شكْ نْضَارغْ خْ وُوذمْ ن ييَّارْ.
أَذْ خَاكْ سّْزذْغغْ مَارَّا إِجْضَاضْ ن ؤُجنَّا
ؤُشَا أَذْ زَّايكْ سّْجِيوْنغْ إِمُودَّارنْ
زِي مَارَّا ثَامُّورْثْ.
٥ أَذْ ڭّغْ ويْسُومْ نّشْ خْ إِذُورَارْ
ؤُشَا أَذْ شُّورغْ ثِيغْزُورِينْ
س ڒڭْعُوذِي ن وَارَّايمْ نّشْ.
٦ نشّْ أَذْ سّسْوغْ ثَامُّورْثْ أَڒْ إِذُورَارْ،
س ؤُفيّضْ ن إِذَامّنْ نّشْ،
ؤُشَا ثِيغزْرَاثِينْ أَذْ شُّورنْثْ زَّايكْ.‘
٧ ’نشّْ أَذْ سّْذُورْيغْ أَجنَّا
خْمِي شكْ غَا سّْخسْيغْ.
أَذْ سّْبَارّشْنغْ إِثْرَانْ نّسْ،
أَذْ سّْذُورْيغْ ثَافُوشْثْ س إِسيْنُوثنْ،
ؤُشَا ثَازِيرِي وَارْ تّجِّي عَاذْ
أَذْ ثَارْغَا ثْفَاوْثْ نّسْ.
٨ مَارَّا ثِيفَاوِينْ يَارقّنْ ذڭْ ؤُجنَّا
أَذْ ثنْثْ سّْبَارّشْنغْ ذِي طّْوعْ نّشْ
ؤُشَا أَذْ سّكّغْ ثَادْجسْثْ خْ ثمُّورْثْ نّشْ!‘،
أَمُّو إِ إِقَّارْ سِيذِي إِنُو، سِيذِي.
٩ ’نشّْ أَذْغزِّيغْ ؤُڒْ ن وَاطَّاسْ ن ڒڭْنُوسْ،
ؤُمِي إِ غَا يَاوْيغْ ڒخْبَارْ ن ثْرژِّيثْ نّشْ
غَارْ ڒڭْنُوسْ، غَارْ ثمُّورَا
إِ وَارْ ثنْثْ ثسِّينذْ شَا.
١٠ نشّْ أَذْ سّْنخْڒْعغْ أَطَّاسْ نْ ڒڭْنُوسْ
ذِي سِّيبّثْ نّشْ
ؤُ أَشُوَّافْ ن إِجدْجِيذنْ نْسنْ
أَذْ ڭعّْذنْ زڭْ وَارْجفْ ذِي طّْوعْ نّشْ،
خْمِي غَا سّنْهزّغْ سِّيفْ إِنُو سَّا ذ سَّا
زَّاثْ إِ وُوذْمَاونْ نْسنْ.
نِيثْنِي أَذْ أَرْجِيجنْ ڒبْذَا،
كُوڒْ إِجّْ ذِي سِّيبّثْ ن ثُوذَارْثْ نّسْ،
ذڭْ وَاسّْ ن ؤُوطُّو نّشْ.‘
١١ مِينْزِي أَمُّو إِ إِقَّارْ سِيذِي إِنُو، سِيذِي:
’سِّيفْ ن ؤُجدْجِيذْ ن بَابِيلْ أَذْ خَاكْ يمَّارْسْ.
١٢ س ڒسْيُوفْ ن أَيْثْ ن بُو-ثغْرُوضْثْ
أَذْغضْڒغْ ڒْْغَاشِي نّشْ إِنْهوْڒنْ.
أَقَا-ثنْ ڒڭْنُوسْ إِقسْحنْ أَطَّاسْ مَارَّا،
نِيثْنِي أَذْ قْضَانْ خْ نّْفَاخثْ ن مِيصْرَا
ؤُشَا مَارَّا ڒْْغَاشِي نّسْ إِنْهوْڒنْ
أَذْ إِتّْوَاثحَّا.
١٣ نشّْ أَذْ قْضِيغْ خْ إِمُودَّارنْ نّسْ
إِنِّي إِدْجَانْ غَارْ وَاطَّاسْ ن وَامَانْ،
ؤُڒَا ذ إِجّْ ن ؤُضَارْ ن بْنَاذمْ
أَذْ ثنْ إِسَّارْوِي عَاوذْ
ؤُشَا ؤُڒَا ذ إِشْثْ ن ثشْضشْثْ ن ڒْْمَاڒْ
أَذْ ثنْ ثسَّارْوِي عَاذْ.‘
١٤ ’خنِّي أَذْ سّهْوِيغْ أَمَانْ نْسنْ
أَڒَامِي إِ غَا صْفَانْ
ؤُ نشّْ أَذْ ڭّغْ إِغزْرَانْ نْسنْ
أَذْ سِّيزّْڒنْ أَمْ زّشْثْ!‘،
أَمُّو إِ إِقَّارْ سِيذِي إِنُو، سِيذِي.
١٥ ’أَڒَامِي ڭِّيغْ ثَامُّورْثْ ن مِيصْرَا ذ أَردّدْجْ
ؤُشَا أَذْ ثِيڒِي ثمُّورْثْ ثتّْوَاردّدْجْ،
ثحْفَا زِي مَارَّا مِينْ ذَايسْ،
أَڒَامِي وْثغْ مَارَّا إِنِّي ذَايسْ إِزدّْغنْ،
خنِّي أَذْ سّْننْ بلِّي نشّْ ذ سِيذِي.‘ “
١٦ ”وَا ذ إِزْڒِي ن وشْضَانْ ؤُشَا أَذْ ثغنّْجنْ أَمْ يزْڒِي ن وشْضَانْ، يسِّيثْسنْثْ ن ثمُّورَا أَذْ ثغنّْجنْثْ أَمْ يزْڒِي ن وشْضَانْ، أَذْ ثغنّْجنْثْ أَمْ يزْڒِي ن وشْضَانْ خْ مِيصْرَا ؤُ خْ مَارَّا ڒْْغَاشِي نّسْ إِنْهوْڒنْ!، أَمُّو إِ إِقَّارْ سِيذِي إِنُو، سِيذِي.“
إِژْرِي ن وشْضَانْ غَارْ ونْضڒْ ن فِيرْعُونْ أَكْ-ذ ؤُبَارُّو نّسْ
١٧ ذڭْ ؤُسڭّْوَاسْ وِيسّْ ثنْعَاشْ، ذڭْ ؤُيُورْ وِيسّْ ثنْعَاشْ، ذڭْ وَاسّْ وِيسّْ خمّسْطَاشْ ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:
١٨ ”أَ مِّيسْ ن بْنَاذمْ،
وّثْ أَڭجْذُورْ خْ ڒْْغَاشِي إِنْهوْڒنْ ن مِيصْرَا.
أجّْ إِ-ث أَذْ إِهْوَا،
مِيصْرَا أَكْ-ذ يسِّيسْ ن ڒڭْنُوسْ إِجهْذنْ،
ذِي ڒَْادْجَاغْ ن ثمُّورْثْ،
أَكْ-ذ يِينِّي إِهْوَانْ ذڭْ وحْفُورْ ن ونْضڒْ.
١٩ مَا شكْ إِعِيزّنْ خْ مَانْ مَّا؟
هْوَا، أجّْ أَذْ شكْ سَّارْسنْ
أَكْ-ذ يِينِّي وَارْ إِتّْوَاخثْننْ.
٢٠ أَذْ وْضَانْ ذِي ڒْْوسْطْ
ن يِينِّي إِتّْوَانْغنْ س سِّيفْ.
أَقَا إِمّوْشْ سِّيفْ.
جَارّْ مِيصْرَا زڭْ وبْرِيذْ
أَكْ-ذ مَارَّا ڒْْغَاشِي نّسْ إِنْهوْڒنْ.
٢١ إِنِّي غَارْ ثدْجَا صُّولْطَا أَطَّاسْ
زڭْ أَيْثْ ن بُو-ثغْرُوضْثْ
أَذْ سِّيوْڒنْ أَكِيذسْ
ؤُ أَكْ-ذ يِينِّي ث إِعَاوَاننْ
زِي ڒْْوسْطْ ن ڒَْاخَارْثْ.
هْوَانْ نِيثْنِي، أَقَا زّْڒنْ ذِينِّي،
إِنِّي وَارْ إِتّْوَاخثْننْ،
إِنِّي إِتّْوَانْغنْ س سِّيفْ.‘
٢٢ ’ذِيهَا إِدْجَا أَشُّورْ أَكْ-ذ مَارَّا أَڭْرَاوْ نّسْ،
نّْضنْ أَسْ-د إِمضْڒَانْ نّسْ.
مَارَّا نِيثْنِي تّْوَانْغنْ، وْضَانْ س سِّيفْ.
٢٣ إِمضْڒَانْ نّسْ أَقَا أَثنْ ذِي ثْغمَّارْ
ن وحْفُورْ ن ونْضڒْ
ؤُ أَڭْرَاوْ نّسْ أَقَا-ث ذڭْ ونّضْ ن ونْضڒْ نّسْ.
مَارَّا نِيثْنِي تّْوَاسّْنُوقّْبنْ،
وْضَانْ س سِّيفْ،
إِنِّي ثُوغَا إِسَّاڭّْوَاذنْ
ذِي ثمُّورْثْ ن يِينِّي إِدَّارنْ.‘
٢٤ ’ذِيهَا عِيلَامْ ذ مَارَّا ڒْْغَاشِي نّسْ إِنْهوْڒنْ
ذڭْ ونّضْ ن ونْضڒْ نّسْ.
مَارَّا نِيثْنِي تّْوَاسّْنُوقّْبنْ، وْضَانْ س سِّيفْ،
هْوَانْ بْڒَا أَخْثَانْ ذِي ڒَْادْجَاغْ ن ثمُّورْثْ،
إِنِّي ثُوغَا إِسَّاڭّْوَاذنْ
ذِي ثمُّورْثْ ن يِينِّي إِدَّارنْ.
نِيثْنِي إِوْينْ ڒفْضِيحثْ نْسنْ أَكِيذْسنْ،
أَكْ-ذ يِينِّي إِهكّْوَانْ
ذڭْ وحْفُورْ ن ونْضڒْ.
٢٥ ڭِّينْ أَسْ إِجّْ ن ومْشَانْ ن أَرَّاحثْ
ذِي ڒْوسْثْ ن يِينِّي إِتّْوَانْغنْ،
غَارْ مَارَّا ڒْْغَاشِي نّسْ إِنْهوْڒنْ.
إِمضْڒَانْ نّسْ نّْضنْ أَسْ-د.
مَارَّا نِيثْنِي وَارْ إِتّْوَاخثْننْ،
وْضَانْ س سِّيفْ،
مِينْزِي ثُوغَا سَّاڭّْوَاذنْ إِوْذَانْ
ذِي ثمُّورْثْ ن يِينِّي إِدَّارنْ.
نِيثْنِي إِوْينْ ڒفْضِيحثْ نْسنْ أَكِيذْسنْ،
جْمِيعْ أَكْ-ذ يِينِّي إِهكّْوَانْ
ذڭْ وحْفُورْ ن ونْضڒْ.
أَقَا نتَّا إِتّْوَاسَّارْسْ
ذِي ڒْوسْثْ ن يِينِّي إِتّْوَانْغنْ.‘
٢٦ ذِيهَا مَاشِيخْ-ثُوبَالْ
ذ مَارَّا ڒْْغَاشِي نّسْ إِنْهوْڒنْ.
نّْضنْ أَسْ-د إِمضْڒَانْ نّسْ.
مَارَّا نِيثْنِي وَارْ تّْوَاخثْننْ،
تّْوَاسّْنُوقّْبنْ س سِّيفْ،
مَاغَارْ نِيثْنِي ثُوغَا سَّاڭّْوَاذنْ إِوْذَانْ
ذِي ثمُّورْثْ ن يِينِّي إِدَّارنْ.
٢٧ إِنِّي إِوْضَانْ زڭْ يِينِّي وَارْ إِتّْوَاخثْننْ
وَارْ زِّيڒنْ أَكْ-ذ أَيْثْ ن بُو-ثغْرُوضْثْ
نِّي إِهْوَانْ غَارْ ڒَْاخَارْثْ
أَكْ-ذ ڒسْنَاحْ نْسنْ ن ؤُمنْغِي.
مَّارْسنْ ڒسْيُوفْ نْسنْ سَاذُو إِزدْجِيفنْ نْسنْ
ؤُشَا ڒْْمُوعْصِييّثْ نْسنْ أَقَا-ت خْ ييْسَانْ نْسنْ،
وَاخَّا ثُوغَا نِيثْنِي ذ ثِيڭّْوُوذِي إِ أَيْثْ ن بُو-ثغْرُوضْثْ
ذِي ثمُّورْثْ ن يِينِّي إِدَّارنْ.
٢٨ ؤُڒَا ذ شكْ أَذْ ثِيڒِيذْ ثَارْژذْ
ذِي ڒْْوسْطْ ن يِينِّي وَارْ إِتّْوَاخثْننْ
ؤُشَا أَذْ ثزّْڒذْ
أَكْ-ذ يِينِّي إِتّْوَاسّْنُوقْبنْ س سِّيفْ.‘
٢٩ ’ذِيهَا إِذُومْ، إِجدْجِيذنْ نّسْ ذ مَارَّا ڒْْحُوكَّامْ نّسْ،
إِنِّي إِ ذِينْ إِتّْوَاڭّنْ
س مَارَّا صُّولْثَا نْسنْ
أَكْ-ذ يِينِّي إِتّْوَاسّْنُوقّْبنْ س سِّيفْ.
زّْڒنْ ذِينِّي أَكْ-ذ يِينِّي وَارْ إِتّْوَاخثْننْ
ؤُ أَكْ-ذ يِينِّي إِهْوَانْ
ذڭْ وحْفُورْ ن ونْضڒْ.‘
٣٠ ’ذِيهَا أَيْثْ ن بُو-صُّولْطَا زِي شّْمَالْ،
مَارَّا نِيثْنِي، ؤُ مَارَّا أَيْثْ ن صِيذُونْ،
إِنِّي إِهْوَانْ أَكْ-ذ يِينِّي إِتّْوَانْغنْ.
أَقَا تّْسضْحَانْ ذِينِّي،
وَاخَّا ثُوغَا سَّاڭّْوَاذنْ إِوْذَانْ
س ثرْيَاسْثْ نْسنْ ن أَيْثْ ن بُو-ثغْرُوضْثْ.
أَقَا زّْڒنْ ذِينِّي بْڒَا أَخْثَانْ
أَكْ-ذ يِينِّي إِتّْوَانْغنْ س سِّيفْ
ؤُشَا أَربُّونْ ڒفْضِيحثْ نْسنْ
أَكْ-ذ يِينِّي إِهْوَانْ ذڭْ وحْفُورْ ن ونْضڒْ.‘
٣١ ’فِيرْعُونْ أَذْ ثنْ إِژَارْ ؤُشَا أَذْ إِتّْوَاسّْفوّجْ
زِي مَارَّا ڒْْغَاشِي نّسْ إِنْهوْڒنْ،
إِنِّي إِتّْوَاسّْنُوقّْبنْ س سِّيفْ،
فِيرْعُونْ ذ مَارَّا ڒْْعسْكَارْ نّسْ،
أَمُّو إِ إِقَّارْ سِيذِي إِنُو، سِيذِي٬‘ “
٣٢ ’مِينْزِي نشّْ جِّيغْ ث أَذْ إِسِّيڭّْوذْ
إِنِّي ذِي ثمُّورْثْ ن يِينِّي إِدَّارنْ.
نتَّا أَذْ إِمَّارْسْ ذِي ڒْْوسْطْ
ن يِينِّي وَارْ إِتّْوَاخثْننْ،
غَارْ يِينِّي إِتّْوَاسّْنُوقّْبنْ س سِّيفْ،
فِيرْعُونْ ذ مَارَّا ڒْْغَاشِي نّسْ إِنْهوْڒنْ،‘
أَمُّو إِ إِقَّارْ سِيذِي إِنُو، سِيذِي.“