٣٠
ڒْحُوكْمْ خْ مِيصْرَا س سِّيفْ
١ يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، نَابّْ ؤُشَا إِنِي:
’أَمُّو إِ إِقَّارْ سِيذِي إِنُو، سِيذِي:
رُومْ! أَيّهَّاثْ خْ وَاسّْ نِّي!
٣ مِينْزِي يُوذسْ إِ يدْجَا وَاسّْ نِّي،
يُوذسْ إِ يدْجَا وَاسّْ إِ سِيذِي،
أَسّْ ن إِسيْنُوثنْ.
أَذْ يِيڒِي ذ ثَاسَاعّثْ ن ڒڭْنُوسْ.
٤ أَذْ د-يَاسْ سِّيفْ ذِي مِيصْرَا.
أَذْ يِيڒِي وَارْجفْ أَمقّْرَانْ
ذِي ثمُّورْثْ ن كُوشْ،
خْمِي غَا وْضَانْ إِنِّي إِتّْوَاسّْنُوقّْبنْ ذِي مِيصْرَا،
مِينْزِي أَذْ أَوْينْ أَفيّضْ ن وَاڭْڒَا نّسْ،
أَذْ أَردّْدْجنْ ذْسُوسَا نّسْ.
٥ كُوشْ ذ فُوطْ ذ لُوذْ ذ عْڒَامْ كُوڒْ إِبَارَّانِييّنْ،
ذ كُوبْ ذ أَيْثْ ن ثمُّورْثْ ن ڒْْعَاهْذْ
أَذْ كِيسنْ وْضَانْ س سِّيفْ.‘ “
٦ ”أَمُّو إِ إِقَّارْ سِيذِي:
’إِنِّي إِتّْشَاڒنْ خْ مِيصْرَا أَذْ وْضَانْ
ؤُ نّْفَاخثْ ن صُّولْطَا نّسْ أَذْ ثْغَارْقْ.
زِي مَاجْذَالْ أَڒْ أَسْوَانْ أَذْ وْضَانْ
س سِّيفْ ذِي ثمُّورْثْ!‘،
أَمُّو إِ إِقَّارْ سِيذِي إِنُو، سِيذِي.
٧ ‘نِيثْنِي أَذْ تّْوَارذْدْجنْ
ذِي ڒْْوسْطْ ن ثمُّورَا إِتّْوَارذْدْجنْثْ
ؤُ ثِيندَّامْ نّسْ أَذْ إِڒِينْثْ
ذِي ڒْْوسْطْ ن ثْندَّامْ نّغْنِي إِتّْوَاخَارّْبنْ.
٨ خنِّي أَذْ سّْننْ بلِّي نشّْ ذ سِيذِي،
خْمِي غَا سَّارْغغْ ثِيمسِّي ذِي مِيصْرَا
ؤُشَا مَارَّا إِنِّي ت إِتّْعَاوَاننْ أَذْ تّْوَارْژنْ.‘
٩ ’ذڭْ وَاسّْ نِّي
أَذْ فّْغنْ إِرقَّاسنْ س ثْغَارُّوبَا
زِي زَّاثْ ن وُوذمْ إِنُو،
مَاحنْذْ أَذْ سِّيڭّْوذنْ كُوشْ
ونِّي ؤُمِي إِتّْغِيڒْ أَقَا نتَّا ذِي ڒَامَانْ.
أَذْ ذَايْسنْ يِيڒِي وَارْجفْ أَمقّْرَانْ،
أَمشْنَاوْ ذڭْ وَاسّْ نِّي ن مِيصْرَا،
مَاغَارْ خْزَارْ، أَذْ د-يَاسْ!‘ “
١٠ ”أَمُّو إِ إِقَّارْ سِيذِي إِنُو، سِيذِي:
’نشّْ أَذْ سّْبدّغْ ڒْْغَاشِي إِنْهوْڒنْ ن مِيصْرَا
س ؤُفُوسْ ن نابُوخَاذْرَاصَّارْ، أَجدْجِيذْ ن بَابِيلْ.
١١ نتَّا ذ ڒْْڭنْسْ نّسْ أَكِيذسْ،
إِمْسَاڭّْوَاذنْ قَاعْ ن ڒڭْنُوسْ
أَذْ د-أَسنْ حِيمَا أَذْ ثحَّانْ ثَامُّورْثْ.
نِيثْنِي أَذْ سُّوفّْغنْ ڒسْيُوفْ نْسنْ ضِيدّْ إِ مِيصْرَا
ؤُشَا أَذْ شُّورنْ ثَامُّورْثْ
س يِينِّي إِتّْوَاسّْنُوقّْبنْ.
١٢ نشّْ أَذْ سِّيژْغغْ إِغزْرَانْ
ؤُشَا أَذْ زّنْزغْ ثَامُّورْثْ إِ إِعفَّاننْ
ؤُ نشّْ أَذْ أَردّْدْجغْ ثَامُّورْثْ ذ مَارَّا مِينْ ذَايسْ
س ؤُفُوسْ ن إِبَارَّانِييّنْ.
نشّْ، سِيذِي، ونِّي إِنَّانْ أَيَا.‘ “
١٣ ”أَمُّو إِ إِقَّارْ سِيذِي إِنُو، سِيذِي:
’نشّْ أَذْ أَردّْدْجغْ إِميْضَا ن لْ-أَصْنَامْ
ؤُشَا أَذْ قْضِيغْ خْ لْ-أَصْنَامْ زِي نُوفْ.
وَارْ إِتّْغِيمِي عَاذْ ؤُڒَا ذ إِجّْ ن ڒْْحَاكمْ زِي مِيصْرَا.
نشّْ أَذْ سِّيذْفغْ ڒْْعُورّثْ ذِي ثمُّورْثْ ن مِيصْرَا.
١٤ نشّْ أَذْ أَردّْدْجغْ فَاثْرُوسْ
ؤُ أَذْ سَّارْغغْ صُوعَانْ
ؤُ أَذْ أَوْيغْ ڒحْكَامَاثْ إِنُو ذِي نُو.
١٥ نشّْ أَذْ سّْفَارْغغْ أَسْعَارْ إِنُو خْ سِينْ،
لْبُورْجْ ن مِيصْرَا،
أَذْ قضْعغْ ڒْْغَاشِي إِنْهوْڒنْ ن نُو.
١٦ نشّْ أَذْ سِّيذْفغْ ثِيمسِّي غَارْ مِيصْرَا،
سِينْ أَذْ ثفْسِي س ڒحْرِيقْ،
ثَامُّورْثْ ن نُو أَذْ ثتّْوَافدْجقْ
ؤُ نُوفْ أَذْ ثِيڒِي ذِي ڒحْصَارثْ كُوڒْ أَسّْ.
١٧ إِحُوذْرِييّنْ زِي أَوَانْ ذ فِيبِيسْثَا
أَذْ وْضَانْ س سِّيفْ
ؤُ ثِيمْغَارِينْ أَذْ ؤُيُورنْثْ ذِي ثْمحْبَاسْثْ.
١٨ أَسّْ أَذْ إِتّْبَارْشنْ ذِي ثَاحْفَاحِيسْ
خْمِي غَا يْأَرْژغْ نشّْ أَزَايْڒُو ن مِيصْرَا،
ؤُ أَذْ أَسْ سّْبدّغْ
نّْفَاخثْ ن جّهْذْ نّسْ ذِينِّي.
إِجّْ ن ؤُسيْنُو أَذْ ت إِسّْذُورِّي
ؤُشَا يسِّيسْ أَذْ ؤُيُورنْثْ
ذِي ثْمحْبَاسْثْ.
١٩ نشّْ أَذْ سِّيوْضغْ ڒحْكَامَاثْ خْ مِيسْڒَا
ؤُ نِيثْنِي أَذْ سّْننْ بلِّي نشّْ ذ سِيذِي.‘ “
ڒْحُوكْمْ خْ فِيرْعُونْ ذ ؤُزُّوزَارْ ن ڒْْڭنْسْ نّسْ
٢٠ ذڭْ ؤُسڭّْوَاسْ وِيسّْ حِيطَاشْ، ذڭْ ؤُيُورْ أَمزْوَارُو، ذڭْ وَاسّْ وِيسّْ سبْعَا ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:
٢١ ” ’أَ مِّيسْ ن بْنَاذمْ، نشّْ أَرْژِيغْ أَغِيڒْ ن فِيرْعُونْ، أَجدْجِيذْ ن مِيصْرَا. خْزَارْ، وَارْ ث إِجبَّارْ ؤُڒَا ذ إِجّنْ مَاحنْذْ أَذْ إِتّْوَاسّْڭنْفَا، وَارْ ث تّنّْضنْ س بِينْذَاثْ أَڒَامِي زَّايْسنْثْ ث غَا سّْجهْذنْ، حِيمَا أَذْ إِطّفْ سِّيفْ عَاوذْ!‘
٢٢ س ؤُيَا، أَمُّو إِ إِقَّارْ سِيذِي إِنُو، سِيذِي: ’خْزَارْ، نشّْ خْ فِيرْعُونْ، أَجدْجِيذْ ن مِيصْڒَا، ؤُ نشّْ أَذْ أَرْژغْ إِغَادْجنْ نّسْ، أَمْ ؤُغِيڒْ إِجهْذنْ عَاذْ أَمْ ونِّي إِتّْوَارْژِينْ. نشّْ أَذْ أَرّغْ سِّيفْ نّسْ أَذْ إِوْضَا زڭْ ؤُفُوسْ نّسْ.
٢٣ نشّْ أَذْ زُوزَّارغْ إِمِيصْرِييّنْ جَارْ ڒڭْنُوسْ ؤُ أَذْ ثنْ بزّْعغْ خْ ثمُّورَا.
٢٤ نشّْ أَذْ سّْجهْذغْ إِغَادْجنْ ن ؤُجدْجِيذْ ن بَابِيلْ ؤُشَا أَذْ وْشغْ سِّيفْ إِنُو ذڭْ ؤُفُوسْ نّسْ، مَاشَا إِغَادْجنْ ن فِيرْعُونْ أَذْ ثنْ أَرْژغْ، أَڒَامِي إِ غَا إِسْغُويْ أَمْ إِسْغُويُّو ونِّي إِسّْنُوقْبنْ.
٢٥ وَاهْ نشّْ أَذْ سّْجهْذغْ إِغَادْجنْ ن ؤُجدْجِيذْ ن بَابِيلْ، مَاشَا إِغَادْجنْ ن فِيرْعُونْ أَذْ وْضَانْ. خنِّي أَذْ سّْننْ بلِّي نشّْ ذ سِيذِي، خْمِي غَا ڭّغْ سِّيفْ إِنُو ذڭْ ؤُفُوسْ ن ؤُجدْجِيذْ ن بَابِيلْ ؤُ نتَّا أَذْ ث إِسّْوِيژّضْ خْ ثمُّورْثْ ن مِيصْرَا.
٢٦ نشّْ أَذْ زُوزَّارغْ إِمِيصْرِييّنْ جَارْ ڒڭْنُوسْ، أَذْ ثنْ بزّْعغْ خْ ثمُّورَا. أَمُّو إِ غَا سّْننْ بلِّي نشّْ ذ سِيذِي.‘ “