٢٩
أَوَاڒْ خْ مِيصْرَا أَمْ إِشْثْ ن ڒْْهَايْشثْ
١ يُوسَا-د غَارِي وَاوَاڒْ ن سِيذِي ذڭْ ؤُسڭّْوَاسْ وِيسّْعشْرَا، ذڭْ ؤُيُورْ وِيسّْعشْرَا، ذڭْ وَاسّْ وِيسّْ ثنْعَاشْ ن ؤُيُورْ، إِنَّا:
٢ ”أَ مِّيسْ ن بْنَاذمْ، أَرّْ ؤُذمْ نّشْ غَارْ فِيرْعُونْ، أَجدْجِيذْ ن مِيصْرَا ؤُشَا نَابّْ خَاسْ ؤُ خْ مَارَّا ثَامُّورْثْ ن مِيصْرَا.
٣ سِيوڒْ، إِنِي:
’أَمُّو إِ إِقَّارْ سِيذِي إِنُو، سِيذِي:
خْزَارْ، نشّْ ضِيدّْ نّشْ،
أَ فِيرْعُونْ، أَجدْجِيذْ ن مِيصْرَا،
شكْ ذ ڒْْهَايْشثْ ثَامقّْرَانْثْ
نِّي إِزّْڒنْ ذِي ڒْْوسْطْ ن إِغزْرَانْ نّسْ،
ثنِّي إِقَّارنْ: إِغْزَارْ إِنُو،
نشّْ ڭِّيغْ ث إِ يِيخفْ إِنُو!
٤ نشّْ أَذْ ڭّغْ ثِيسنَّارِينْ ذڭْ ؤُغسْمَارْ نّشْ،
أَذْ سّْڒسْقغْ إِسڒْمَانْ ن إِغزْرَانْ نّشْ
غَارْ ثقْشُورِينْ نّشْ.
أَذْ شكْ د-جبْذغْ زِي ڒْْوسْطْ ن إِغزْرَانْ نّشْ
ؤُشَا مَارَّا إِسڒْمَانْ ن إِغزْرَانْ نّشْ
أَذْ ڒسْقنْ غَارْ ثقْشُورِينْ نّشْ.
٥ نشّْ أَذْ شكْ نْضَارغْ بَارَّا ذِي ڒخْڒَا،
شكْ ذ مَارَّا إِسڒْمَانْ ن إِغزْرَانْ نّشْ.
خْ وُوذمْ ن ييَّارْ أَذْ ثوْضِيذْ.
وَارْ ذِينْ ونِّي شكْ إِ غَا يَاوْينْ
نِيغْ شكْ إِ غَا إِطّْفنْ.
نشّْ أَذْ شكْ وْشغْ ذ مَاشَّا
إِ ڒوْحُوشْ ن ثمُّورْثْ
ؤُ إِ إِجْضَاضْ ن ؤُجنَّا.
٦ مَارَّا إِمزْذَاغْ ن مِيصْرَا أَذْ سّْننْ
بلِّي نشّْ ذ سِيذِي،
مَاغَارْ نِيثْنِي ثُوغَا أَثنْ ذ أَزدْجَاضْ ن ؤُغَانِيمْ
إِ خْ ثُوغَا ثْسنّذْ ثَادَّارْثْ ن إِسْرَائِيل.
٧ مَاڒَا نِيثْنِي كْسِينْ شكْ س ؤُفُوسْ نّشْ،
ثْفدْجْقذْ ؤُشَا ثسّْنُوقّْبذْ غَارْسنْ
ثَاغْرُوضْثْ نْسنْ مَارَّا،
ؤُ مَاڒَا خَاكْ سّنْذنْ،
ثَارْژِيذْ ؤُشَا ثسَّارْجِيجذْ
ثِيجْعِينَّاثِينْ نْسنْ مَارَّا.‘ “
٨ ”س ؤُيَا، أَمُّو إِ إِقَّارْ سِيذِي إِنُو، سِيذِي: ’خْزَارْ، نشّْ أَذْ خَاكْ سّعْذُوغْ سِّيفْ ؤُشَا أَذْ قسّغْ زَّايكْ بْنَاذمْ ذ ڒْْمَاڒْ.
٩ ثَامُّورْثْ ن مِيصْرَا أَذْ ثذْوڒْ إِ ؤُردّدْجْ ؤُ إِ ڒْْخِيرْبثْ ؤُشَا نِيثْنِي أَذْ سّْننْ بلِّي نشّْ ذ سِيذِي، مِينْزِي نتَّا إِنَّا: ’إِغْزَارْ إِنُو ؤُ نشّْ ڭِّيغْ ث!‘ “
١٠ ”س ؤُيَا، خْزَارْ، نشّْ خَاكْ ؤُ خْ إِغزْرَانْ نّشْ ؤُ نشّْ أَذْ ڭّغْ ثَامُّورْثْ ن مِيصْرَا ذ ڒخْرَابِي، وَاهْ، ذ إِشْثْ نْ ڒْخِيرْبثْ ن وَاردّدْجْ زِي مَاجْذَالْ أَڒْ أَسْوَانْ، أَڒْ أَيْمِيرْ ن ثمُّورْثْ ن كُوشْ.
١١ ؤُڒَا ذ إِجّْ ن بْنَاذمْ وَارْ زَّايسْ إِژكّْوِي خْ ؤُضَارْ ؤُ ؤُڒَا ذ إِجّْ ن ؤُضَارْ ن ڒْْمَاڒْ أَذْ خَاسْ إِژْوَا. وَارْ ذَايكْ تِّيڒِينْ إِمزْضَاغْ إِ يِيجّْ ن ڒْْمِيجَارْ ن أَربْعِينْ ن إِسڭّْوُوسَا.
١٢ مِينْزِي نشّْ أَذْ ڭّغْ ثَامُّورْثْ ن مِيصْڒَا ذ أَردّدْجْ ذِي ڒْْوسْطْ ن ثمُّورَا تّْوَارذْدْجنْثْ ؤُشَا ثِيندَّامْ أَذْ إِڒِينْثْ ذ أَردّدْجْ ذِي ڒْْوسْطْ ن ثْندَّامْ نّغْنِي نِّي إِذوْڒنْ ذ ڒْْخِيرْبَاثْ، ڒْْمِيجَارْ ن أَربْعِينْ ن إِسڭّْوُوسَا، ؤُ نشّْ أَذْ سُّويْسغْ إِمِيصْرِييّنْ جَارْ ڒڭْنُوسْ ؤُشَا أَذْ ثنْ بزّْعغْ خْ ثمُّورَا.“
١٣ ”مَاشَا أَمُّو إِ إِقَّارْ سِيذِي إِنُو، سِيذِي: ’أَوَارْنِي ڒَْامِي إِ غَا عْذُونْ أَربْعِينْ ن إِسڭّْوُوسَا نشّْ أَذْ سّْمُونغْ إِمِيصْرِييّنْ زِي ڒڭْنُوسْ نِّي مَانِي ثُوغَا تّْوَابزّْعنْ.
١٤ نشّْ أَذْ بدّْڒغْ ثَامحْبَاسْثْ ن إِمِيصْرِييّنْ ؤُشَا أَذْ ثنْ سّْعقْبغْ ذِي ثمُّورْثْ ن فَاثْرُوسْ، ذِي ثمُّورْثْ إِ زَّايسْ د-إِفّْغنْ، ؤُشَا ذِينِّي أَذْ إِڒِينْ ذ إِشْثْ ن ثْڭلْذِيثْ ثَامعْنَانُوشْثْ.
١٥ ثَاڭلْذِيثْ نْسنْ أَذْ ثِيڒِي ذ ثَامعْنَانُوشْثْ زِي ثْڭلْذَاثِينْ نّغْنِي ؤُ وَارْ ثسّْڭعَّاذْ إِخفْ نّسْ عَاذْ خْ ڒڭْنُوسْ، مِينْزِي نشّْ أَذْ ثنْ سّْمژْيغْ أَڒَامِي وَارْ تّْصلّْطنْ عَاذْ خْ ڒڭْنُوسْ.
١٦ وَارْ ثتِّيڒِي عَاذْ إِ ثَادَّارْثْ ن إِسْرَائِيل ذ أَثشْڒِي نِّي ثنْ إِ غَا إِسِّيذَارْ ڒْْمُوعْصِييّثْ، ڒَْامِي ذوْڒنْ غَارْسنْ، ضفَّارنْ ثنْ. نِيثْنِي أَذْ سّْننْ بلِّي نشّْ ذ سِيذِي، ذ سِيذِي إِ دْجِيغْ.‘ “
ڒْمُونثْ ن نَاپُوخَاذْرَاصَّارْ خْ ؤُمنْغِي نّسْ ضِيدّْ ن صُورْ
١٧ ذڭْ ؤُسڭّْوَاسْ وِيسّْ سبْعَا ؤُ-عِيشْرِينْ، ذڭْ ؤُيُورْ وِيسّْ أَمزْوَارُو، ذڭْ وَاسّْ أَمزْوَارُو ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:
١٨ ”أَ مِّيسْ ن بْنَاذمْ، نابُوخَاذْرَاصَّارْ، أَجدْجِيذْ ن بَابِيلْ، يَارَّا ڒْْعسْكَارْ نّسْ أَذْ يڭّْ إِشْثْ ن ڒْْخذْمثْ ثَامقّْرَانْثْ ضِيدّْ إِ صُورْ. مَارَّا أَزدْجِيفْ إِقِّيمْ ذ أَقشَّارْ ؤُ مَارَّا ثَاغْڒُوضْثْ ثَارْكشْ، مَاشَا وَارْ غَارسْ ثُوغِي ڒخْڒَاصْ زِي ثنْذِينْثْ ن صُورْ، إِ نتَّا ؤُ إِ ڒْعسْكَارْ نّسْ خْ ڒْْخذْمثْ إِ يڭَّا ضِيدّْ نّسْ.
١٩ س ؤُيَا، أَمُّو إِ إِقَّارْ سِيذِي إِنُو، سِيذِي: ’خْزَارْ، نشّْ أَذْ وْشغْ ثَامُّورْثْ ن مِيصْرَا إِ نابُوخَاذْرَاصَّارْ، أَجدْجِيذْ ن بَابِيلْ. نتَّا أَذْ زَّايسْ د-يَاوِي أَفيّضْ ن وَاڭْڒَا نّسْ ؤُشَا أَذْ إِكشّضْ ثَاكشَّاضْثْ نّسْ ؤُشَا أَذْ إِكّسْ ثُوكَّارْضَا. أَيَا أَذْ يِيڒِي ذ ڒخْڒَاصْ نّسْ إِ ڒْْعسْكَارْ نّسْ.
٢٠ خْ ڒْْخذْمثْ نِّي يڭَّا ضِيدّْ صُورْ وْشِيغْ أَسْ ثَامُّورْثْ ن مِيصْرَا ذ ڒخْڒَاصْ، مِينْزِي نِيثْنِي ڭِّينْ ت ذِي طّْوعْ إِنُو، أَمُّو إِ إِقَّارْ سِيذِي إِنُو، سِيذِي.
٢١ ذڭْ وَاسّْ نِّي أَذْ أَرّغْ إِشّْ ن إِسْرَائِيل أَذْ د-إِفّغْ ؤُشَا أَذْ أَرْزْمغْ أَقمُّومْ نّشْ ذِي ڒْْوسْطْ نْسنْ. خنِّي أَذْ سّْننْ بلِّي نشّْ ذ سِيذِي.‘ “