9
Ndo Jesús juinchexruenꞌen ndo naa xi tsikenꞌen tutée
(Mr. 2:1-12; Lc. 5:17-26)
1 Tjumeꞌe ndo Jesús kuixinꞌin ndo nta̱barco ko kuatsinga ndo tuenxin ndalago ko kuiji ndo tjajnée ndo.
2 Ko ntiꞌa kaxin chujni bikaoꞌe na̱ ndo naa xi tsikenꞌen tutée jitsingataꞌa xa naa kania. Ko ndo Jesús bikon ndo ixi nduaxin chujni meꞌe chuntia na̱ ngajin ndo, méxin nichjeꞌe ndo xi niꞌe ko ndachro ndo:
―Chjanꞌna, takeꞌé juaxruxin, ixi kain ti ndakoꞌa juincheꞌe, janꞌan ndachrja̱n ó koméꞌe jía.
3 Tjumeꞌe kaxin ni nchekuenꞌen chujni chijnie ndo Dio stendachro na̱ ngaya aséen na̱:
―Xi jiꞌi nichjangíꞌe xa ndo Dio.
4 Ko ndo Jesús noꞌe ndo ngeꞌe stexraxaon xa ngaya aséen xa, meꞌe ndachro ndo:
―¿Sonda ndakoꞌa xraxaonnta ngaya asáanta?
5 ¿Ngeꞌe ícha tangiꞌa xrondachroni: “Ti ndakoꞌa juincheꞌe ó juintamáꞌa”, o̱ xrondacheni xi jiꞌi: “Tingatjen ko tjasían ko tajia”?
6 Méxin, sintanoꞌanta ixi Chjenꞌen ndo Dio, xjan jongíꞌe xranchi chujni, tsango tituanꞌan xjan ngataꞌa nunte ntiꞌi ixi sincheméꞌe xjan ti ndakoꞌa juincheꞌe chujni.
Tjumeꞌe ndache ndo xi niꞌe:
―Tingatjen, tama kaniꞌa ko satjia ndúya.
7 Ko xi tsikenꞌen tutée bingatjen xa ko sakjui xa ndoꞌa xa.
8 Ko kain ni ste ntiꞌa bikon na̱ naa ixra̱ tsango ijié konꞌen, xronka na̱ ko kuaxi na̱ kuajon na̱ juasaya ngajin ndo Dio ixi tsango ijié juachaxin tsikajon ndo ngajin chujni ste ngataꞌa nunte xasintajni.
Ndo Jesús kuiyeꞌe ndo ndo Mateo
(Mr. 2:13-17; Lc. 5:27-32)
9 Hora sakui̱xi̱n ndo Jesús ntiꞌa, tjumeꞌe bikon ndo naa xi ndatinꞌin Mateo jitayéꞌe xa tomi neꞌe xi tituanꞌan. Meꞌe ndachro ndo Jesús:
―Jaꞌa ruaꞌna̱na.
Ko jeꞌe xi Mateo bingatjen xa ko ruéꞌe xa ndo Jesús.
10 *Nchakon meꞌe ndo Jesús ko sen teyuu chrikao ndo ikjui sen ndoꞌa xi Mateo bijine sen, ko ntiꞌa ste ikaxin xi tayéꞌe tomie xi tituanꞌan ko ikaxin ni ndakoꞌa ncheꞌe.
11 Ko kaxin xi fariseo bikon xa ndo Jesús ngakjenꞌen chujni meꞌe, méxin juanchangiꞌe xa sen teyuu chrikao ndo Jesús, ko ndachro xa:
―¿Sonda ndo ntakuanꞌannta nekao ndo ni xengeꞌe na̱ tomie xi tituanꞌan ko ni ndakoꞌa ncheꞌe?
12 Ko ndo Jesús kuinꞌen ndo ngeꞌe stendachro na̱, meꞌe juatingíexin ndo:
―Jeꞌa sen chao ste xrokondeꞌe xi nchexruan; sen niꞌe, meꞌe sen xrokondeꞌe xa.
13 *Itjinta ko tanginta ngeꞌe jitaxin xroon chijnie ndo Dio ti ndachro: “Janꞌan tjaꞌon ixi jaꞌanta tsikonóeꞌenta chujni; jeꞌa jeꞌo tsonꞌinta iko ko xroche jnié ba, meꞌe tsayáꞌa̱.” Jaꞌin ndachro chijnie ndo Dio. Ixi janꞌan juiꞌa ntiꞌi ixi tsiyaꞌa chujni jian ncheꞌe. Naꞌi. Janꞌan juiꞌi ixi tsiyaꞌa chujni ndakoꞌa ncheꞌe ko jeꞌe na̱ tsintuꞌe na̱ ti ndakoꞌa ncheꞌe na̱.
Kaxin chujni juanchangi na̱ ixi ti nchekatse ñaoni jinta
(Mr. 2:18-22; Lc. 5:33-39)
14 Naa nchakon konchjiñeꞌe sen chrikao ndo Juan Bautista ko juanchangiꞌe sen ndo Jesús:
―Sonda janꞌanna ko ni fariseo nanaó ntekatse ñaoꞌo na̱ jinta, ko sen chrjikuꞌunta, ¿sonda naꞌi?
15 Tjumeꞌe juatingíexin ndo Jesús:
―Sen tsikiyeꞌe xi tsuteꞌe ko sen ste kiée xa, ¿á chao xrotsjanga sen siá jeꞌe xa xrajíi xa ngajin sen? Ko tsi̱i̱ nchakon satsjikao na̱ xi tsuteꞌe, nchakon meꞌe tsaxi sinchekatse ñao sen jinta.
16 ’Xroꞌan ngisen tjao̱n mantée ti tsikichje ko takeꞌe tuꞌo manta natjúá ixi nchakon tsijma manta tsixeꞌe ti natjúá ko ícha tsinchje ti nta̱xi.
17 Ko juaꞌi tsikia ndée tu uva ti nandá tsikoña ixran ngaya naa tjua̱nxra̱n nta̱xi ixi xroxruji xran ko tsinchje xran tjua̱nxra̱n nta̱xi ko íxroꞌan tsonda tjua̱nxra̱n ko kaxon tsintji xran. Méxin, xran natjúá xrokonda tsikia xran tjua̱nxra̱n natjúá, jaña yui jian tsonda.
Ndo Jesús juinchexechón ndo naa ichjan ko juinchexruenꞌen ndo naa nchri
(Mr. 5:21-43; Lc. 8:40-56)
18 Ko xrajinichja ndo Jesús, kui̱i̱ naa xi tituenꞌen sen tjajna judío bakeꞌexin ntatuchiꞌin xa ngajin ndo ko kuinóatée xa:
―Nchrichajanꞌna nandákua juexin kuenꞌen nchrichan. Ko siá suixinnta itsjinta ko tsakée tjáanta ngataꞌa nchrichan, jeꞌe nchrichan xroxechón nchrichan.
19 Ko ndo Jesús bingatjen ndo ko sabikao ndo sen kuarueꞌe ndo.
20 Kaxon konchjiñeꞌe naa nchri, ó teyuu nano níexin nchra jnié nchra ko imao konchjiñeꞌe nchra tuenxin ndo Jesús ko itsé nchra ngandeꞌe manta jitsáa ndo.
21 Ixi jeꞌe nchra jaña tsixraxaon nchra:
―Maski ngandeꞌe manta jitsáa ndo Jesús xrotse̱, meꞌe tsoxruanna.
22 Ndo Jesús tuinxin ngatjia ndo ko bikon ndo nchra, ko ndachro ndo:
―Chjanꞌna, takeꞌé juaxruxin jaꞌa ixi ti chuntiana meꞌe juintaxruanꞌan.
Ko jeꞌe nchra koxruenꞌen nchra hora meꞌe.
23 Ko hora kuiji ndo Jesús ndoꞌa xi tituenꞌen ni judío, bikon ndo ixi ó tsikiji ni tanoa ntaxro ixi itsji na̱ tsijabaa na̱ nchrichajan. Ko chujni ste ntiꞌa stetsjanga na̱.
24 Meꞌe ndachro ndo Jesús:
―Tachrjexinnta ntiꞌi ixi xjan jiꞌi tsikenꞌa xjan; jeꞌo jijua xjan.
Ko jeꞌe na̱ kuaxi juanoa na̱ ndo.
25 Ko hora kuachrje chujni ste ntiꞌa, ndo Jesús kuixinꞌin ndo ko itsé ndo itjáa xjanchrichjan tsikenꞌen ko jeꞌe xjan xechón xjan ko tuinxin bingatjen xjan.
26 Ko tsango ijié ixra̱ juincheꞌe ndo Jesús, nchijíi nunte meꞌe konoꞌe na̱.
Ndo Jesús juinchexruenꞌen ndo yuu ni tikonꞌa
27 Tjumeꞌe sajuixin ndo Jesús ntiꞌa ko yuu chujni tikonꞌa jiruéꞌe na̱ ndo, ko jaꞌin stetoyako na̱:
―Tikonóaꞌnananta, jaꞌanta ti tsikachrjexinnta ndo David.
28 Ko kuixinꞌin ndo Jesús naa nchia, tjumeꞌe konchjiñeꞌe ni tikonꞌa, ko ndo Jesús juanchangiꞌe ndo na̱ ko ndachro ndo:
―¿Á titikaonnta ixi janꞌan nduaxin sintaxruanꞌannta?
Ko jeꞌe na̱ juatingíexin na̱:
―Jaán, Nchána̱na, janꞌanna chuntiana ngajinnta.
29 Tjumeꞌe ndo Jesús bakeꞌe ndo itjáa ndo ngataꞌa ikon na̱ ko ndachro ndo:
―Jaꞌanta tsoxruanꞌannta ixi chuntianta ngajin.
30 Ko tuinxin ó chao bikon na̱. Ko ndo Jesús kuetuanꞌan ndo:
―Xroꞌan ngisen tekiꞌénta jiꞌin.
31 Ko jeꞌe na̱ kuachrjexón na̱ ntiꞌa, tuinxin bekiꞌena kain chujni kuetan na̱ ko nchijíi nunte meꞌe konoꞌe na̱ ngeꞌe jian juincheꞌe ndo Jesús.
Ndo Jesús juinchexruenꞌen ndo naa xi nosin
32 Ko hora sakjui ni bakikonꞌa, kaxin chujni bikaꞌo na̱ naa xi nosin ko chónda xa espíritue Xixronꞌanxrée.
33 Ko hora kuantsje ndo espíritue Xixronꞌanxrée, xi nosin chao kuaxi nichja xa. Ko kain chujni ste ntiꞌa xronka na̱ ixi kain ngeꞌe tsango ijié konꞌen ntiꞌa ko ndachro na̱:
―Xroꞌan ngeꞌe tsango ijié bakonꞌen nchijíi nunte Israel xranchi ti konꞌen jai.
34 *Ko ni fariseo stendachro na̱:
―Xi jiꞌi tantsje xa espíritue Xixronꞌanxrée ixi Xixronꞌanxrée tsikajon xa juachaxin ngajin xi jiꞌin.
Ndo Jesús bikonóeꞌe ndo chujni
35 *Ndo Jesús kuaji ndo itsjé tjajna, tjajna ijié ko tjajna nchínchín banchekuenꞌen ndo chujni Israel ngaxinꞌin ningue na̱, ko chronga ndo ti juachaxin jian bikaoxin ndo ti tetuanꞌan ndo Dio. Ko juinchexruenꞌen ndo kain chujni kuachónda ichin ko kain ti tiín na̱.
36 *Ko bikon ndo ixi itsjé chujni kuiji ntiꞌa, ko tsango bikonóeꞌe ndo na̱ ixi ichrji na̱ xranchi kutuchjon chóndaꞌi ngisen tsjeꞌe ba.
37 *Tjumeꞌe ndache ndo sen teyuu chrikao ndo:
―Tsango itsjé ngeꞌe jii tsandáani, ko kueyaꞌi sen ncheꞌe ixra̱ jiꞌi.
38 Méxin tjancheꞌenta nchée nunte jiꞌi xroxruanꞌan ndo itsjé sen nchexra̱, sen tsandáa.