11
Ating Melangkew neng Benwa na Tore dut Babel
1 Naꞌ, ating timpu sembebatu peꞌ bebresan et sengketawan bekeꞌ sembebatu peꞌ pegsugiren et beres.
2 Ganang negubuꞌ mengeꞌ taaw pesurung dut emihan nekebiaꞌ dye et derenasan dut lungsud et Sinar. Liminegdeng dye duun.
3-4 Itue pinegisun-isunan dye, kwan, “Atin ne, memaal tyu et kelang kebebenwanan bekeꞌ melangkew neng tore na kapet et langit binubungan ye. Baalen tyu itue apang kilelanen tyu et ginsan neng taw, supaya diki tyu megpekparak bekeꞌ diki megubuꞌ et sengkedunyaan.” Pegketbes nemegbisara-bisara dye, kwan, “Kinggaꞌ myu. Misiꞌ tyu et dekuten, pegketbes, initen itue et menunga apang mektul banar.” Kaya gasi batu dye, angkansa, inusul dye mektul neng dekuten. Kaya semento dye, angkansa, sineregket dye lang et aspalto.
5 Pagkaꞌ nesewran i Yahweh pegkeredyanen et taaw, angkansa, nineug ya apang birinen ye ating kebebenwanan bekeꞌ ating melangkew neng benwa na tore neng pegbaalen et mengeꞌ taaw.
6 Indyariꞌ kwan i Yahweh, kwan, “Itueng mengeꞌ taaw na itue, negkekesembatu sampay sembatu ga bebresan dye ginsan. Tegnanan peꞌ itue et pegkeredyanen dye. Baꞌ kwantin, diki ne mekedyari mepetngew keradya dye.
7 Pesanad tyu duntin. Ipeglein-lein tyu bebresan dye ginsan apang diki dye meretian bebresan et sebayaꞌ dye.”
8 Indyariꞌ, pineparak i Yahweh mengeꞌ taaw mawaꞌ duntin. Nemegubuꞌ dye et sengkedunyaan. Angkansa, kaya ne nepelembus pegbaal et kelang kebebenwanan.
9 Atin sabab angkansa, ngineranan et Babel ating lungsud, gay bersen Melipeng. Duntin pineglein-lein i Yahweh bebresan et ginsan taw. Duntin gasi pineparak i Yahweh taaw bekeꞌ pineubuꞌ dut sengkedunyaan.
Tihad Keupuꞌupuan i Sem seked si Abram
10 Itue mengeꞌ ingaran et mengeꞌ tungtung-inupuꞌ i Sem. Pegtalib et duwang teun teyeg et pegliyud pinengyegang de Sem, ganang si Sem duwang gatus teun umur ye.
11 Mawaꞌ et pegyegang ki Arpaksad, negbiyag nega si Sem et seled limang gatus neng teun bekeꞌ nekeyegang nega et ibang kelelekian bekeꞌ kelilibunan.
12 Si Arpaksad gasi ganang telumpuluꞌ limang teun umur ye nekeyegang et sembatung lelaki neng ngineranan Sela.
13 Pegketbes pinegyegang si Sela, negbiyag nega si Arpaksad et seled epat neng gatus telung teun. Nekeyegang dye nega et ibang kelelekian bekeꞌ kelilibunan.
14 Ganang telumpulung teun ne umur i Sela, pinegyegang si Eber.
15 Pegketbes pinegyegang si Eber, negbiyag nega si Sela et epat neng gatus bekeꞌ telung teun. Nekeyegang dye nega et ibang kelelekian bekeꞌ kelilibunan.
16 Ganang telumpuluꞌ epat neng teun umur i Eber, pinegyegang si Peleg.
17 Pegketbes pinegyegang si Peleg, negbiyag nega si Eber et epat neng gatus bekeꞌ telumpulung teun. Nekeyegang dye nega et ibang kelelekian bekeꞌ kelilibunan.
18 Ganang telumpulung teun umur i Peleg, pinegyegang si Reu.
19 Pegketbes pinegyegang si Reu, negbiyag nega si Peleg et duwang gatus bekeꞌ siyam neng teun. Nekeyegang dye nega et ibang kelelekian bekeꞌ kelilibunan.
20 Ganang telumpuluꞌ duwang teun umur i Reu, pinegyegang si Serug.
21 Negbiyag nega si Reu et duwang gatus bekeꞌ pitu neng teun. Pegketbes pinegyegang dye nega ibang kelelekian bekeꞌ kelilibunan.
22 Ganang telumpulung teun umur i Serug, pinegyegang si Nahor.
23 Pegketbes pinegyegang si Nahor, negbiyag nega si Serug et duwang gatus neng teun. Nekeyegang dye nega et ibang kelelekian bekeꞌ kelilibunan.
24 Ganang duwampuluꞌ siyam neng teun umur i Nahor, pinegyegang si Tera.
25 Pegketbes pinegyegang si Tera, negbiyag nega si Nahor et senggatus bekeꞌ sempuluꞌ siyam neng teun. Nekeyegang dye nega et ibang kelelekian bekeꞌ kelilibunan.
26 Pegketbes negbiyag nega si Tera et pitumpulung teun pinegyegang megtipused neng si Abram, si Nahor bekeꞌ si Haran.
Ating mengeꞌ Kegunggurangan et mengeꞌ Tawʼt Israel
(Tagnaꞌ 11:27—50:26)
27 Itue gasi mengeꞌ tutusan i Tera. Si Tera in amaꞌ de Abram, Nahor sampay si Haran. Nekeyegang de Haran et lelaki neng ingaran si Lot.
28 Nekeuna natey si Haran et amaꞌ ye dut lungsud et Ur et mengeꞌ tawʼt Kaldeo, neng bangsa et pinegyegang ye.
29 Nengesawa si Abram bekeꞌ si Nahor. Esawa i Abram si Sarai. Esawa gasi i Nahor si Milka neng yegang i Haran. Si Haran amaꞌ gasi i Iska.
30 Si Sarai kaya pegyegang sabab bantut ya.
31 Nemikir si Tera na megubuꞌ dut lungsud et Kanaan. Nugad ya dut Ur et Kaldeo iba ye yegang yeng si Abram bekeꞌ esawa i Abram neng si Sarai. Pinebayaꞌ ye nega upuꞌ yeng si Lot neng yegang i Haran. Segwaꞌ, pegdateng dye dut lungsud et Haran timineteg dye duntin.
32 Natey si Tera dut Haran. Duwang gatus limang teun ne umur ye ganang natey ya.