12
Piniliꞌ et Empuꞌ si Abram
1 Naꞌ tihad et itueng eldew, sinugid i Yahweh neng Empuꞌ Banar ki Abram, kwan, “Ugariꞌ ne dimyung bangsa, bekeꞌ mengeꞌ ketipusdan mu, sampay mengeꞌ kesengbenwa et dimung amaꞌ, indyariꞌ sumurung ke ne dut bangsa na ipebiriꞌ ku dimu.
2 Itue keredyanen ku dimu. Ipekansang ku keupuꞌupuan mu apang baalen ku et kelang bangsa. Inunganen ku ikew. Mekilala ke et mengeꞌ taaw sabab ipebantug ku ingaran mu. Meinunga ku gasi mengeꞌ taaw sabab et dimu.
3 Inunganen ku mengeꞌ taaw neng menginunga dimu.
Segwaꞌ, busungen ku mengeꞌ taaw baꞌ memusung dimu.
Sabab et dimu inunganen ku ginsan neng mengeꞌ bangsa atuʼt dunyaꞌ.”
4 Pegketbes nugad si Abram samat tinahag kenye i Yahweh. Nibut gasi kenye si Lot. Pitumpuluꞌ limang teun umur i Abram pegugad ye et Haran.
5 Pineiba ye si Sarai neng esawa ye bekeꞌ si Lot neng yegang et lelaki neng tipused ye. Binibit dye ginsan neng pengarta neng netimung dye dut Haran bekeꞌ pinebayaꞌ gasi mengeꞌ taaw neng nenimuru kedye. Siminurung dye ginsan dut bangsa et Kanaan.
6 Ganang dut Kanaan dye, neglembus de Abram dut lungsud et Sekem, dut kelang kayu et More. Mengeꞌ Kananeo nega meglelegdeng duntin.
7 Nepebiriꞌ duun si Yahweh ki Abram bekeꞌ negsugid kenye,
“Ibgey dut tutusan mu itueng lungsud.”
Pegketbes nemaal si Abram et sisimayaan apang isimayaꞌ duun ki Yahweh neng nepebiriꞌ kenye.
8 Mawaꞌ duntin negubuꞌ de Abram dut kebudbukiran et sebangan et lungsud et Betel. Pinetiyeg ye tetluan ye duntin, dut ledpan lungsud et Betel bekeꞌ dut tampar sebangan lungsud et Ai. Nepetiyeg peuliꞌ ya duun et sisimayan apang isimayaꞌ ki Yahweh. Nenelangin ya duun ki Yahweh.
9 Pegketbes negubuꞌ peuliꞌ de Abram pelembus dut lungsud et Negeb, gay bersen tampar barat.
(Tagnaꞌ kapitulo 12 bersikulo 10 seked kapitulo 50:26 kaya seled itueng buuk, segwaꞌ mekebatsaꞌ dut Biblia neng Tagalog.)