Da 73. Psalm.
Gott Dutt Vass Recht Is
En Psalm fumm Asaph.
1 Gott is geviss goot zu Israel,
zu selli es rein sinn im hatz.
2 Avvah veyyich mich, mei fees sinn yusht shiah goah kshlibt;
ich habb shiah kenn foos-hohld may katt.
3 Fa ich habb di shtolsa's fagund
vo ich ksenna habb es es di gottlohsa so goot gayt.
4 Si henn kenn kfoah fumm doht,
si sinn shteik un ksund.
5 Si sinn nett in druvvel vi anri leit,
un si doon nett soffahra vi anri.
6 Fasell doon si iahra hohchmoot veahra vi en keshtlichi hals-kett,
un iahra unfashtand dekt si zu vi glaydah.
7 Si sinn so fett es iahra awwa raus shtayn,
un si doon yusht vass eena kfald.
8 Si shpodda un shvetza mitt hass;
si sinn grohs-feelich un droiya fa anri letz du.
9 Si shvetza geyyich Gott im himmel mitt iahra meilah,
un gevva shtolsi gebodda zu mennah uf di eaht mitt iahra zunga.
10 Fasell doon leit sich zu eena drayya,
un drinka iahra kshvetz ei vi vassah.
11 Si sawwa, “Vi kann Gott vissa?
Hott da Alli-Haychsht eisicht?”
12 Gukket, dess sinn di gottlohsa;
si henn kenn druvvel in di veld un si vadda reich.
13 Voah's fa nix es ich mei hatz rein kalda habb,
un mei hend gvesha habb in unshuld?
14 Ich voah gmacht leida da gans dawk lang;
ich voah kshtrohft alli meiya.
15 Vann ich ksawt hett, “Ich zayl shvetza vi si,”
dann hett ich dei leit falaykeld.
16 Vo ich broviaht habb fa dess fashtay,
dann voah's zu shveah fa mich,
17 biss ich in's haus funn Gott ganga binn.
No habb ich fashtanna vass iahra end sei zayld.
18 Du hosht si geviss in shlibbichi bletz ksetzt,
un bringsht si nunnah zu nix.
19 Si vadda bletzlich zu nix gebrocht,
si vadda vekk gekeaht zu en heslich end.
20 Vi en drohm fagayt vann ebbah uf vekt,
so, Hah, vann du uf veksht,
dann fa'achtsht du iahra bild.
21 Vo's miah vay gedu hott im hatz,
un ich innahlich kshtocha voah,
22 dann voah ich nett ksheit un habb nix fashtanna.
Ich voah vi en unksheit diah fannich diah.
23 Avvah ich bleib immah nayksht bei diah,
un du haybsht mich bei mei rechtsi hand.
24 Du fiahsht mich mitt deim roht,
un shpaydah nemsht mich oh mitt hallichkeit.
25 Veah habb ich im himmel unni dich?
Un siddah es ich dich habb, hott's nix anres uf di eaht es ich vill.
26 Mei leib un mei hatz mechta shvach vadda,
avvah Gott is di graft funn meim hatz un mei dayl fa'immah.
27 Selli es veit vekk sinn funn diah kumma um,
du bringsht selli um es nett shtandhaftich sinn zu diah.
28 Avvah fa mich, es is goot fa nayksht zu Gott sei;
ich habb mei fadrauwes in Gott da Hah gedu,
so es ich alles fazayla kann es du dusht.