Da 74. Psalm.
En Gebayt Fa Hilf An Di Zeit Funn Noht In Israel
En Psalm fumm Asaph.
1 Oh Gott, favass hosht du uns falossa vi dess fa'immah?
Favass shmohkt dei zann geyyich di shohf funn dei vayt-feld?
2 Fagess dei leit nett es du gekawft hosht lang zrikk;
selli es du frei gmacht hosht fa di leit funn dei eahbshaft sei
am Berg Zion, datt vo du gvoond hosht.
3 Dray dei shritt geyyich demm vass so lang nunnah grissa voah,
da feind hott alles fasaut im heilicha tempel.
4 Dei feinda henn laut gegrisha in di mitt funn dei fasamling-blatz;
un henn iahra aykni zaycha datt ufketzt.
5 Si henn sich ohkshikt vi mennah mitt ex
am baym nunnah hakka im bush.
6 Si henn awl's kshnitzeld hols fabrocha mitt iahra ex un hammahra.
7 Si henn dei tempel nunnah uf da bodda gebrend,
un henn da voon-blatz funn deim Nohma unrein gmacht.
8 In iahra hatza henn si ksawt, “Vella si gans nunnah drikka.”
Si henn awl di fasamling-heisah funn Gott fabrend im land.
9 Miah sayna unsah zaycha nimmi;
es sinn kenn brofayda may do,
un nimmand unnich uns vayst vi lang es dess so sei zayld.
10 Vi lang, oh Gott, zayld da feind dich fashpodda?
Zayld eah dei nohma faleshtahra fa'immah?
11 Favass zeeksht du dei hand zrikk?
Nemm dei rechtsi hand aus dei shohs
un mach en end funn eena.
12 Avvah Gott is mei kaynich funn lang zrikk;
du bringsht saylichkeit in di mitt funn di eaht.
13 Du hosht da say kshpalda mitt dei graft,
un hosht di kebb fabrocha funn di veeshta diahra im vassah.
14 Du hosht di kebb fabrocha funn di grohs say-shlang,
un hosht iahra flaysh zu di diahra in di vildahnis gevva fa ess-sach.
15 Du hosht di shprings un di grikka uf gmacht,
un hosht di grohsa revvahra ufgedrikkeld.
16 Da dawk is dei, un so is di nacht;
du hosht di sunn un da moon in iahra bletz ksetzt.
17 Du hosht alli dayl uf di eaht gmeikt un abksetzt,
un hosht summah un vindah gmacht.
18 So denk droh vi dei feinda dich fashpott henn, oh Hah,
un vi di unksheida leit dei nohma faleshtaht henn.
19 Dray nett's layva funn dei daddel-daub ivvah zu vildi diahra,
fagess nett's layva funn dei aylendichi leit fa'immah.
20 Denk an dei bund,
fa di dunkla bletz fumm land sinn foll unfashtendlichi leit.
21 Loss nett di nunnah-gedreddana in shohm gebrocht sei;
loss di oahma un selli es noht henn dei nohma preisa.
22 Shtay uf, oh Gott, un fecht fa dei recht,
denk droh vi di gottlohsa dich fashpodda da gans dawk.
23 Fagess nett's gegreish funn dei feinda,
un's ufruah es si macha di gans zeit.